പരിശോധനയ്ക്കയച്ച ശരീരഭാഗങ്ങള്‍ കാണാതായ സംഭവം: മെഡിക്കല്‍ കോളേജ് ജീവനക്കാരന് സസ്‌പെന്‍ഷന്‍
തിരുവനന്തപുരം മെഡിക്കല്‍ കോളേജ് ആശുപത്രിയില്‍ പരിശോധനയ്ക്കയച്ച ശരീരഭാഗങ്ങള്‍ കാണാതായ സംഭവത്തില്‍ ആശുപത്രി ജീവനക്കാരന് സസ്‌പെന്‍ഷന്‍. ഹൗസ് കീപ്പിംഗ് വീഭാഗം ജീവനക്കാരന് അജയകുമാറിനെയാണ് സസ്‌പെന്‍ഡ് ചെയ്തത്. ശരീരഭാഗങ്ങള്‍ ആക്രിക്കാരന്‍ കൊണ്ടുപോകാന്‍ ഇടയായതിനാണ് നടപടി. പാത്തോളബി ലാബില്‍ പരിശോധനയ്ക്കയച്ച സാമ്പിളുകള്‍ ആക്രിക്കാരനില്‍ നിന്ന് കണ്ടെടുത്തിരുന്നു. ആക്രിയാണെന്ന് കരുതി എടുത്തതാണെന്ന് വില്‍പനക്കാരന്‍ മൊഴി നല്‍കി. സംഭവത്തില്‍ വിശദമായ അന്വേഷണം നടത്തുമെന്ന് പൊലീസ് പറഞ്ഞു.
ഇന്ന് രാവിലെയാണ് പാത്തോളജി ലാബിനടുത്തുള്ള സ്‌പെസിമെന്‍ ലാബിലേക്ക് ശരീരഭാഗങ്ങള്‍ കൊണ്ടുവന്നത്. തിരികെ വന്നുനോക്കിയപ്പോള്‍ അവയവങ്ങള്‍ കണ്ടിരുന്നില്ല. ഇതോടെയാണ് ജീവനക്കാര്‍ പൊലീസിനെ വിവരമറിയിച്ചത്. തുടര്‍ന്ന് നടത്തിയ പരിശോധനയിലാണ് ലാബിന് ചുറ്റും അലഞ്ഞുതിരിഞ്ഞ് നടന്ന ആക്രിക്കാരനെ പിടികൂടിയത്, ആക്രിക്കാരനെ ചോദ്യം ചെയ്ത പൊലീസ് ഇയാളെ കസ്റ്റഡിയിലെടുത്തില്ല, മനഃപൂര്‍വം നടത്തിയ മോഷണമല്ലെന്നും പൊലീസ് പറഞ്ഞു.
അതേസമയം ശരീരഭാഗങ്ങള്‍ സുരക്ഷിതമെന്ന് പാത്തോളജി വിഭാഗം മേധാവി ഡോ. ലൈല രാജി മാദ്ധ്യമങ്ങളോട് പ്രതികരിച്ചു. ഫോര്‍മാലിനില്‍ സൂക്ഷിച്ചതിനാല്‍ ഇവയ്ക്ക് കേടുപാടില്ല. പരിശോധനയ്ക്കും തടസമില്ല. സ്‌പെസിമെന്‍ ലാബിന് സമീപത്തെ സ്റ്റെപ്പില്‍ ഇവ വച്ച് ജീവനക്കാരന് പോയപ്പോഴാണ് ആക്രിക്കാരന്‍ എടുത്തുകൊണ്ടുപോയത്. ശരീരഭാഗങ്ങള്‍ പിന്നീട് ലാബിലേക്ക് മാറ്റി.
https://www.facebook.com/Malayalivartha
