വിഴിഞ്ഞം ചൊവ്വരയില്‍ വീട്ടില്‍ അതിക്രമിച്ച് കയറി വയോധികനേയും ചെറുമകളെയും ആക്രമിച്ച കേസിലെ പ്രതി അറസ്റ്റില്‍. പള്ളിച്ചല്‍ വെടിവച്ചാന്‍കോവില്‍ പാരൂര്‍കുഴി എസ്.എന്‍.ഡി.പി മന്ദിരത്തിന് സമീപം മണ്ണാറക്കല്‍വിള വീട്ടില്‍ സൗഗന്ദ്.എസ്. നായര്‍ (26) നെയാണ് വിഴിഞ്ഞം പൊലീസ് അറസ്റ്റ് ചെയ്തത്.

വ്യാഴാഴ്ച പുലര്‍ച്ചെ 3.30 ഓടെയാണ് ആക്രമണം നടന്നത്. വീട്ടുകാര്‍ പുലര്‍ച്ചെ മൂന്ന് മണിയോടെ ആറ്റുകാല്‍ പൊങ്കാലയിടാനായി പോയ ശേഷം 3.30 ഓടെ കതകില്‍ ശക്തമായി തട്ടുന്നത് കേട്ട് വാതില്‍ തുറന്ന വയോധികനെ പ്രതി കൈയിലുണ്ടായിരുന്ന തടിക്കഷ്ണം കൊണ്ടു മുഖത്ത് മര്‍ദ്ദിക്കുകയായിരുന്നു.

വയോധികന്റെ പല്ലിന് പൊട്ടല്‍ സംഭവിച്ചു. ബഹളം കേട്ട് മുറിക്ക് പുറത്തെത്തിയ ചെറുമകളെയും യുവാവ് ആക്രമിച്ചു. പൊലീസിന് ലഭിച്ച പരാതിയെത്തുടര്‍ന്ന് നടത്തിയ അന്വേഷണത്തില്‍ പ്രതിയെ അറസ്റ്റു ചെയ്തു.