പോക്‌സോ കേസിൽ വേങ്ങര ചേറൂർ സ്വദേശി അറസ്റ്റിൽ. ഭക്ഷണത്തിൽ രാസലഹരി കലർത്തി ലഹരിക്കടിമയാക്കി പ്രായപൂർത്തിയാകാത്ത പെൺകുട്ടിയെ വർഷങ്ങളോളം പീഡിപ്പിച്ചതായി ആണ് പരാതി ഉയർന്നത്. മലപ്പുറം കോട്ടക്കലിലാണ് സംഭവം. അലുങ്ങൽ അബ്‌ദുൾ ഗഫൂർ (23) ആണ് പോക്‌സോ കേസിൽ അറസ്റ്റിലായത്.

2020ൽ പ്ലസ് വൺ വിദ്യാർത്ഥിയായിരിക്കെ തുടങ്ങിയ പീഡനം 2025 മാർച്ച് വരെ തുടർന്നെന്നാണ് പെൺകുട്ടി നൽകിയ പരാതിയിൽ പറയുന്നത്. ഇൻസ്റ്റഗ്രാമിലൂടെ പരിചയപ്പെട്ട പെൺകുട്ടിയെ പ്രണയം നടിച്ചാണ് പ്രതി വശീകരിച്ചത്.

പെൺകുട്ടിയുടെ നഗ്ന ദൃശ്യങ്ങൾ പകർത്തിയ പ്രതി സ്വർണാഭരണവും തട്ടിയെടുത്തു. ചികിത്സയ്‌ക്ക് പിന്നാലെ ലഹരിയിൽ നിന്ന് മോചിതയായ ശേഷമാണ് പെൺകുട്ടി പൊലീസിൽ പരാതി നൽകിയത്. പ്രതിയെ കോട്ടക്കൽ പൊലീസ് ആണ് അറസ്റ്റ് ചെയ്‌തത്. പ്രതിയുടെ ഫോണും പൊലീസ് പിടിച്ചെടുത്തു.