തായ്‌ലന്‍ഡിലും മ്യാന്‍മറിലുമുണ്ടായ ഭൂചലനം അനുഭവിച്ചറിഞ്ഞതിന്റെ ഞെട്ടല്‍ മാറാതെ നടിയും അവതാരകയുമായ പാര്‍വതി ആര്‍.കൃഷ്ണ. ബാങ്കോക്കില്‍ വച്ച് എന്റെ ജീവിതത്തില്‍ ഇതുവരെ കണ്ടിട്ടില്ലാത്ത വിധം ഏറ്റവും ഭീകരമായ ഭൂകമ്പത്തിന് ഞാന്‍ സാക്ഷിയായി. ഭൂകമ്പം നടക്കുമ്പോള്‍ താന്‍ അവിടെ ഉണ്ടായിരുന്നു. മരണത്തെ മുഖാമുഖം കണ്ട നിമിഷമായിരുന്നു അതെന്നും താന്‍ സുരക്ഷിതയാണെന്നും പാര്‍വതി പറയുന്നു. തിരുവനന്തപുരത്ത് മടങ്ങിയെത്തിയ ശേഷം സോഷ്യല്‍ മീഡിയയിലൂടെയാണ് നടി തന്റെ അനുഭവം പങ്കുവച്ചത്.

'ഇതെഴുതുമ്പോഴും ഞാന്‍ വിറയ്ക്കുകയാണ്. പക്ഷേ ഇന്നും ജീവിച്ചിരിക്കാന്‍ സാധിച്ചതില്‍ ഞാന്‍ ജീവിതത്തോട് നന്ദി പറയുന്നു. ബാങ്കോക്കില്‍ വച്ച് എന്റെ ജീവിതത്തില്‍ ഇതുവരെ കണ്ടിട്ടില്ലാത്ത വിധം ഏറ്റവും ഭീകരമായ ഭൂകമ്പത്തിന് ഞാന്‍ സാക്ഷിയായി. 7.7തീവ്രത രേഖപ്പെടുത്തിയ ഭൂകമ്പം അവിടെയുള്ള എല്ലാത്തിനെയും പിടിച്ചുലച്ചു. കെട്ടിടങ്ങള്‍ തകര്‍ന്ന് വീഴുന്നതും ആളുകള്‍ ജീവനുവേണ്ടി ഓടുന്നതും നേരില്‍ കണ്ടു. എല്ലായിടത്തും ഒരുതരം അരക്ഷിതാവസ്ഥ. ടാക്സികളില്ല,ഗതാഗതമില്ല,ഒന്നുമില്ല. എല്ലാവരും ആകെ പരിഭ്രാന്തിയിയില്‍ ആയിരുന്നു.

' ആ നിമിഷം ആദ്യം ഞാന്‍ ചിന്തിച്ചത് എന്റെ പ്രിയപ്പെട്ടവരെ കുറിച്ചായിരുന്നു. പെട്ടെന്ന് എന്റെ കുടുംബാംഗങ്ങളെ വിളിച്ച് അവരോട് സംസാരിച്ചു. അവരോട് അവസാനമായി സംസാരിക്കുന്നതുപോലെ തോന്നി. അവരോട് സംസാരിച്ച നിമിഷങ്ങള്‍ ആശ്വാസത്തിന്റെയും സന്തോഷത്തിന്റെയുമായിരുന്നു. എന്താണ് സംഭവിച്ചതെന്ന് ഞാന്‍ ഇപ്പോഴും ഓര്‍ത്തെടുക്കാന്‍ ശ്രമിക്കുകയാണ്. ഇതെന്റെ ജീവിതത്തില്‍ രണ്ടാമത് ലഭിച്ച അവസരമാണ്. ഭൂകമ്പം ബാധിച്ച എല്ലാവരെയും ഞാനിപ്പോള്‍ ഓര്‍ക്കുന്നു. പ്രതികൂല സാഹചര്യങ്ങളെ നേരിടാന്‍ നമുക്കെല്ലാവര്‍ക്കും ശക്തിയും ധൈര്യവും ഉണ്ടാകട്ടെ എന്നാഗ്രഹിക്കുന്നുവെന്നും പാര്‍വതി വീഡിയോയിലൂടെ പറഞ്ഞു.