പാലക്കാട് ദേശീയപാത മരുതറോഡ് ജംക്ഷനില്‍ യുവതിയുടെ മരണത്തിനിടയാക്കിയ അപകടത്തിനു കാരണം റോഡിലെ വെളിച്ചക്കുറവും കാറിന്റെ അമിതവേഗവുമാണെന്നു പൊലീസ്. അമിതവേഗത്തില്‍ പാഞ്ഞെത്തിയ കാര്‍ ആദ്യം യുവതി സഞ്ചരിച്ച ബൈക്കിനെ ഇടിച്ചു തെറിപ്പിച്ച ശേഷം മുന്നിലുണ്ടായിരുന്ന മറ്റൊരു കാറിനെ ഇടിച്ചാണു നിന്നത്.

കോയമ്പത്തൂരില്‍ നിന്നു പാലക്കാട്ടേക്കാണ് ഈ കാര്‍ പോയിരുന്നത്. അപകടത്തിന്റെ സിസിടിവി ദൃശ്യങ്ങള്‍ പുറത്തുവന്നു. അപകടത്തിനിടയാക്കിയ കാറിന്റെ ഡ്രൈവര്‍ തേങ്കുറുശ്ശി സ്വദേശി രമേശിനെതിരെ (35) പൊലീസ് കേസെടുത്തിട്ടുണ്ട്. കോഴിക്കോട് തിക്കോടി സ്വദേശിയും പുതുശ്ശേരി കുരുടിക്കാട് കാളാണ്ടിത്തറയില്‍ താമസക്കാരിയുമായ അരുണ്‍കുമാറിന്റെ ഭാര്യ അമൃത (36) മരിച്ച കേസിലാണു നടപടി.

ഞായറാഴ്ച രാത്രി എട്ടരയോടെ മരുതറോഡ് ജംക്ഷനിലെ ഹോട്ടലിനു മുന്നിലായിരുന്നു അപകടം. അപകടത്തില്‍ ബൈക്ക് ഓടിച്ച അമൃതയുടെ പിതൃസഹോദരന്‍ പി.മഹിപാല്‍ (59), അമ്യതയുടെ മകള്‍ ആദ്വിക (രണ്ടര) എന്നിവര്‍ക്കും പരുക്കേറ്റിരുന്നു. ഇവര്‍ പുതുശ്ശേരിയില്‍ നിന്നു മരുതറോഡിലെ സൂപ്പര്‍മാര്‍ക്കറ്റിലേക്കു പോവുകയായിരുന്നു. കാര്‍ ഇടിച്ച് റോഡിലേക്കു തെറിച്ചു വീണ മൂവരെയും ഓടിയെത്തിയ യുവാക്കള്‍ ഉടന്‍ ജില്ലാ ആശുപത്രിയിലെത്തിച്ചെങ്കിലും അമൃതയെ രക്ഷിക്കാനായില്ല. മഹിപാലിനു നടുവിനും കാലിനും പരുക്കേറ്റിട്ടുണ്ട്. കുട്ടിയുടെ കാലിനു നേരിയ പരുക്കുകളുണ്ട്. കോഴിക്കോട് തിക്കോടി സ്വദേശിയായ മോഹന്‍ദാസിന്റെയും ഷൈലജയുടെയും മകളാണ് അമൃത. മോഹന്‍ദാസും മഹിപാലും 20 വര്‍ഷം മുന്‍പാണ് കോയമ്പത്തൂരിലെ കമ്പനിയിലേക്ക് ജോലിക്കായെത്തിയത്. ഇതോടെയാണ് ഇവര്‍ പുതുശ്ശേരിയിലേക്കു താമസം മാറിയത്.

അമൃതയുടെ ഭര്‍ത്താവ് അരുണ്‍കുമാറിന് ഖത്തറിലാണ് ജോലി. മരണവിവരമറിഞ്ഞ് അരുണ്‍ ഉടന്‍ നാട്ടിലേക്ക് തിരിക്കാന്‍ ശ്രമിച്ചെങ്കിലും റമസാന്‍ തിരക്കു മൂലം വിമാന ടിക്കറ്റ് ലഭിച്ചില്ല. ഇന്നു രാത്രിയോടെ മാത്രമേ അരുണ്‍കുമാര്‍ നാട്ടിലെത്തൂ. അമൃതയുടെ മൃതദേഹം ജില്ലാ ആശുപത്രിയില്‍ പോസ്റ്റ്മോര്‍ട്ടത്തിനു ശേഷം പാലക്കാട്ട് സ്വകാര്യ ആശുപത്രിയിലേക്കു മാറ്റി. സംസ്‌കാരം ചൊവ്വാഴ്ച വൈകിട്ട് കഞ്ചിക്കോട്ട് നടക്കും.