സന്തോഷ് കൊലപാതക കേസില്‍ മുഖ്യപ്രതിയായ ഒരാള്‍ കൂടി പിടിയിലായി. ഓച്ചിറ ചങ്ങന്‍കുളങ്ങര സ്വദേശി പങ്കജ് മേനോനാണ് പിടിയിലായത്.

ഒളിവില്‍ കഴിഞ്ഞ പ്രതിയെ കല്ലമ്പലത്ത് നിന്നാണ് പിടികൂടിയത്. ഇന്ന് പുലര്‍ച്ചെ 3.45 ഓടെയാണ് പങ്കജിനെ പിടികൂടിയത്. പങ്കജുമായുള്ള വിരോധത്തിന്മേലാണ് ജിം സന്തോഷിനെ അലുവ അതുലും സംഘവും കൊലപ്പെടുത്തിയതെന്നായിരുന്നു പൊലീസിന്റെ നിഗമനം.

തുടര്‍ന്ന് പങ്കജിനെ കണ്ടെത്താനുള്ള ശ്രമങ്ങള്‍ പൊലീസ് ആരംഭിച്ചത്. കരുനാഗപ്പള്ളി പൊലീസിന്റെ സ്പെഷ്യല്‍ ടീം കല്ലമ്പലത്ത് ഇന്നലെ മുതല്‍ ക്യാമ്പ് ചെയ്യുന്നുണ്ടായിരുന്നു. തുടര്‍ന്ന് ഇന്ന് പുലര്‍ച്ചയോടെ പ്രതിയെ പിടികൂടുകയായിരുന്നു. പ്രതിയെ കരുനാഗപ്പള്ളി പൊലീസ് സ്റ്റേഷനില്‍ എത്തിച്ചു.

ഉന്നത ഉദ്യോഗസ്ഥരുടെ സാന്നിധ്യത്തില്‍ ചോദ്യം ചെയ്യുന്നതാണ് . കൊലപാതകം ആസൂത്രണം ചെയ്യുന്നതിലുള്‍പ്പെടെ പങ്കജിന് പങ്കുണ്ടെന്നാണ് പൊലീസിന്റെ കണ്ടെത്തല്‍. സാക്ഷി മൊഴികളും പൊലീസിന് ലഭിച്ചിട്ടുണ്ട്. കേസിലെ മുഖ്യപ്രതിയായ അലുവ അതുലിനെ കണ്ടെത്താനും പങ്കജിനെ ചോദ്യം ചെയ്യുന്നതോടെ കഴിയുമെന്നാണ് പൊലീസിന്റെ പ്രതീക്ഷ.

കൊലപാതകം ആസൂത്രണം ചെയ്തതില്‍ പങ്കജ് നേരിട്ട് പങ്കെടുത്തിട്ടുണ്ട്. കൊലപാതക സമയത്ത് മാത്രമാണ് പങ്കജ് മാറി നിന്നത്. പിന്നില്‍ നിന്ന് അക്രമ സംഘത്തെ നിയന്ത്രിക്കുന്നത് പങ്കജാണ്. കേസില്‍ രണ്ട് പ്രതികള്‍ കൂടിയാണ് ഇനി പിടിയിലാകാനുള്ളത്. അന്വേഷണം ഊര്‍ജ്ജിതമാക്കി.