മാസപ്പടി കേസില്‍ വീണാ വിജയനെതിരെ അന്വേഷണം നടത്താന്‍ അനുമതി നല്‍കി കമ്പനികാര്യ മന്ത്രാലയം
എക്സാലോജിക് സിഎംആര്‍എല്‍ ഇടപാടുകളില്‍ വീണാ വിജയനെ പ്രോസിക്യൂട്ട് ചെയ്യാന്‍ അനുമതി നല്‍കി കേന്ദ്ര കമ്പനികാര്യ മന്ത്രാലയം. ഇതോടെ കേസില്‍ വീണ പ്രതിയാകും. എസ്എഫ്ഐഒയുടെ പ്രാഥമിക അന്വേഷണത്തില്‍ തന്നെ സിഎംആര്‍എല്‍ - എക്സാലോജിക് ഇടപാടുകളില്‍ ക്രമക്കേട് വ്യക്തമായിരുന്നു. എന്നാല്‍ ഏത് ഏജന്‍സിയാണ് കേസ് അന്വേഷിക്കുക എന്ന കാര്യം വ്യക്തമല്ല.
ഇടപാടിനു പിന്നില്‍ അഴിമതിയുണ്ടോയെന്നും. മുഖ്യമന്ത്രി പിണറായി വിജയനെ സ്വാധീനിക്കാന്‍ വേണ്ടിയാണോ മകള്‍ വീണാ വിജയന് പണം നല്‍കിയത് എന്ന കാര്യവും കേസില്‍ അന്വേഷിക്കും. അതേസമയം സിഎംആര്‍എല്‍ പലര്‍ക്കും പണം നല്‍കിയെന്നും പണം നല്‍കിയവരുടെ പട്ടികയില്‍ പല മുഖ്യ രാഷ്ട്രീയ പാര്‍ട്ടികളും രാഷ്ട്രീയ നേതാക്കളുമുണ്ടെന്നും അന്വേഷണത്തില്‍ വ്യക്തമായിരുന്നു. കേസുമായി മുന്നോട്ട് പോകാനാണ് കേന്ദ്ര കമ്പനി കാര്യ മന്ത്രാലയത്തിന്റെ നീക്കം.
വീണ വിജയന്, സിഎംആര്‍എല്‍ എം.ഡി ശശിധരന്‍ കര്‍ത്ത, സിഎംആര്‍എല്‍ സിജിഎം ഫിനാന്‍സ് പി.സുരേഷ് കുമാര്‍ അടക്കമുള്ളവര്‍ക്കെതിരെയാണ് പ്രോസിക്യൂഷന്‍ അനുമതി. കമ്പനികാര്യ മന്ത്രാലയമാണ് എസ്എഫ്ഐഒക്ക് അനുമതി നല്‍കിയത്. സിഎംആര്‍എല്‍- എക്സാലോജിക്ക് ഇടപാടില്‍ ക്രമക്കേട് കണ്ടെത്തിയുള്ള എസ്എഫ്ഐഒയുടെ അന്വേഷണ റിപ്പോര്‍ട്ടിലാണ് പ്രോസിക്യൂഷന്‍ അനുമതി നല്‍കിയത്. എസ്എഫ്ഐഒയുടെ ചാര്‍ജ് ഷീറ്റില്‍ ഗുരുതര വകുപ്പുകളാണ് ചുമത്തിയിരിക്കുന്നത്.
2.70 കോടി രൂപ വീണ കൈപ്പറ്റിയിരിക്കുന്നത് സിഎംആര്‍എല്‍, എംപവര്‍ ഇന്ത്യ എന്നീ കമ്പനികളില്‍ നിന്നാണെന്ന് കുറ്റപത്രത്തില്‍ പറയുന്നു. സിഎംആര്‍എല്ലിന്റെ സഹോദര സ്ഥാപനമാണ് എംപവര്‍ ഇന്ത്യ. ശശിധരന്‍ കര്‍ത്തയും ഭാര്യയുമാണ് ഈ കമ്പനിയുടെ ഡയറക്ടര്‍മാര്‍. വീണയ്ക്ക് പുറമേ എക്സാലോജിക്, സിഎംആര്‍എല്‍, ശശിധരന്‍ കര്‍ത്ത എന്നിവരെയാണ് പ്രതിചേര്‍ത്തിരിക്കുന്നത്. കമ്പനികാര്യ നിയമം 447ാം വകുപ്പാണ് ചുമത്തിയിരിക്കുന്നത്. ആറ് മാസം മുതല്‍ പത്ത് വര്‍ഷം വരെയാണ് ശിക്ഷ കിട്ടാവുന്ന വകുപ്പാണിത്. കഴിഞ്ഞ വര്‍ഷം ജനുവരിയിലാണ് മാസപ്പടി കേസില്‍ അന്വേഷണം ആരംഭിച്ചത്.
https://www.facebook.com/Malayalivartha
