സംസ്ഥാനത്ത് കഴിഞ്ഞ 24 മണിക്കൂറില്‍ ഏറ്റവും ഉയര്‍ന്ന യുവി ഇന്‍ഡെക്‌സ് രേഖപ്പെടുത്തിയ 14 ജില്ലകളിലെ സ്റ്റേഷനുകളുടെ പട്ടിക പുറത്തു വിട്ട് കേന്ദ്രകാലാവസ്ഥാ വകുപ്പ്.

ഓറഞ്ച് അലര്‍ട്ട് രേഖപ്പെടുത്തിയത് 10 ഇടങ്ങളിലാണ്. കൊട്ടാരക്കര, കോന്നി, ചങ്ങനാശ്ശേരി, ചെങ്ങന്നൂര്‍, മൂന്നാര്‍, കളമശ്ശേരി, ഒല്ലൂര്‍, തൃത്താല പൊന്നാനി, മാനന്തവാടി എന്നിവിടങ്ങളില്‍ ഓറഞ്ച് അലര്‍ട്ടാണ് രേഖപ്പെടുത്തിയത്. വിളപ്പില്‍ശാല, ബേപ്പൂര്‍, ധര്‍മടം തുടങ്ങിയ ഇടങ്ങളില്‍ യെല്ലോ അലര്‍ട്ട് രേഖപ്പെടുത്തി. കാസര്‍ഗോഡ് മാത്രമാണ് പട്ടികക്ക് പുറത്തുള്ളത്.

കൊല്ലം, പത്തനംതിട്ട,മലപ്പുറം, ഇടുക്കി ജില്ലകളിലാണ് ഇന്നലെ കേരളത്തിലെ ഏറ്റവും ഉയര്‍ന്ന യുവി രേഖപ്പെടുത്തിയത്. 6മുതല്‍-7 വരെ യുവി ഇന്‍ഡക്‌സ് സൂചിക യെല്ലോ അലര്‍ട്ട് ആയും 8 മുതല്‍ 10 വരെ ഓറഞ്ച് അലര്‍ട്ട് ആയും 11 ന് മുകളില്‍ അതീവ ജാഗ്രത വേണ്ട റെഡ് അലര്‍ട്ട് ആയുമാണ് കണക്കാക്കുന്നത്.


അതേസമയം നേരിട്ട് സൂര്യപ്രകാശം ഏല്‍ക്കുന്നത് പരമാവധി ഒഴിവാക്കുക. പുറം ജോലികളില്‍ ഏര്‍പ്പെടുന്നവര്‍, കടലിലും ഉള്‍നാടന്‍ മല്‍സ്യബന്ധനത്തിലും ഏര്‍പ്പെടുന്ന മത്സ്യത്തൊഴിലാളികള്‍, ജലഗതാഗതത്തിലേര്‍പ്പെടുന്നവര്‍, ബൈക്ക് യാത്രക്കാര്‍, വിനോദസഞ്ചാരികള്‍, ചര്‍മരോഗങ്ങളുള്ളവര്‍, നേത്രരോഗങ്ങളുള്ളവര്‍, ക്യാന്‍സര്‍ രോഗികള്‍, മറ്റ് രോഗപ്രതിരോധശേഷി കുറഞ്ഞ വിഭാഗങ്ങള്‍ തുടങ്ങിയവര്‍ പ്രത്യേകം ജാഗ്രത പാലിക്കേണ്ടതാണ്.

പകല്‍ സമയത്ത് പുറത്തേക്ക് ഇറങ്ങുമ്പോള്‍ തൊപ്പി, കുട, സണ്‍ഗ്ലാസ് എന്നിവ ഉപയോഗിക്കാന്‍ ശ്രമിക്കുക. ശരീരം മുഴുവന്‍ മറയുന്ന കോട്ടണ്‍ വസ്ത്രങ്ങള്‍ ഉപയോഗിക്കുന്നതായിരിക്കും ഉചിതം. യാത്രകളിലും മറ്റും ഇടവേളകളില്‍ തണലില്‍ വിശ്രമിക്കാന്‍ ശ്രമിക്കുക.