ചങ്ങരംകുളത്ത് നന്നംമുക്ക് പൂച്ചപ്പടിയില്‍ ടോറസ് ലോറിക്കടിയില്‍പെട്ട് വിദ്യാര്‍ഥി മരിക്കാനിടയായത് റോഡിലെ മണ്‍തിട്ടമൂലം. അപകടത്തില്‍ ടോറസ് ലോറിയുടെ പിന്‍ചക്രം തലയിലൂടെ കയറിയിറങ്ങുകയായിരുന്നു.

പാതയോരത്ത് പൈപ്പിടായി പൊളിച്ച കുഴിയിലെ മണ്ണ് വീതികുറഞ്ഞ റോഡില്‍ കൂട്ടിയിട്ടതാണ് അപകടത്തിന് വഴിവെച്ചത്. വേണ്ടത്ര വീതിയില്ലാത്ത വഴിയില്‍ കൂട്ടിയിട്ട മണ്‍കൂനയില്‍ സ്‌കൂട്ടര്‍ കയറി തെന്നി ലോറിക്കടിയിലേക്ക് വീഴുകയായിരുന്നു.

ഏറെ മാസങ്ങളായി വഴിയാത്രക്കാരും പ്രദേശവാസികളും കുഴികളും മണ്‍തിട്ടകളും നീക്കം ചെയ്യണമെന്നാവശ്യപ്പെട്ട് ആവശ്യപ്പെട്ടിട്ടും അധികൃതരുടെ അനാസ്ഥയില്‍ അപകടം തുടരുന്നു. മരിച്ച നിധിനോടൊപ്പമുണ്ടായിരുന്ന ആദിത്യന്‍ അതീവ ഗുരുതരാവസ്ഥയില്‍ തൃശൂരിലെ സ്വകാര്യ ആശുപത്രിയില്‍ വെന്റിലേറ്ററിന്റെ സഹായത്തോടെയാണ് ജീവന്‍ നിലനിര്‍ത്തുന്നത്. രോഷാകുലരായ നാട്ടുകാര്‍ അപകടസ്ഥലത്തെ മണ്‍തിട്ട നീക്കം ചെയ്യുകയായിരുന്നു.