വയനാട്ടില്‍ കാട്ടാനയാക്രമണത്തില്‍ വീണ്ടും മരണം. കാട്ടാനയാക്രമണത്തില്‍ വയനാട് പൂളക്കൊലി സ്വദേശി അറുമുഖനാണ് കൊല്ലപ്പെട്ടത്. ജോലി കഴിഞ്ഞ് വീട്ടിലേക്ക് മടങ്ങുന്നതിനിടെ ഒന്‍പത് മണിയോടെയാണ് കാട്ടാന ആക്രമിച്ചതെന്നതാണ് കരുതുന്നത്. ശരീരമാകെ ആനയുടെ ചവിട്ടേറ്റ നിലയിലാണു മൃതദേഹം കണ്ടെത്തിയത്. മൃതദേഹം പുറത്തേക്ക് എടുക്കാനുള്ള ശ്രമത്തിലാണ് വനംവകുപ്പും നാട്ടുകാരും. കാട്ടാന ശല്യം രൂക്ഷമായ ഈ മേഖലയില്‍ ഫെന്‍സിങ് സ്ഥാപിക്കണമെന്ന ആവശ്യവുമായി കഴിഞ്ഞ ദിവസം നാട്ടുകാര്‍ പ്രതിഷേധിച്ചിരുന്നു. തേയിലത്തോട്ടത്തോട് ചേര്‍ന്ന മേഖലയാണിത്.

രണ്ടാഴ്ച മുമ്പ് അടുത്തടുത്ത ദിവസങ്ങളില്‍ കാട്ടാന ആക്രമണത്തില്‍ അതിരപ്പള്ളിയില്‍ മൂന്നു ജീവനുകള്‍ പൊലിഞ്ഞിരുന്നു. കാട്ടില്‍ വനവിഭവങ്ങള്‍ ശേഖരിക്കാന്‍ പോയവരുടെ മരണത്തിനു പിന്നാലെ പ്രതിഷേധം ശക്തമായിരുന്നു. കാട്ടാനയുടെ ആക്രമണത്തില്‍ നിന്ന് സംരക്ഷണമൊരുക്കണമെന്ന് ആവശ്യപ്പെട്ട് ജനങ്ങള്‍ വനംവകുപ്പ് ഓഫിസ് ഉപരോധിച്ചിരുന്നു. സര്‍ക്കാര്‍ നിസഹായരായി നോക്കിനിന്ന് ജനത്തെ വിധിക്കു വിട്ടുനല്‍കുകയാണെന്ന് പ്രതിപക്ഷവും ആരോപിച്ചിരുന്നു.