കാട്ടാന ആക്രമണത്തില്‍ പരിക്കേറ്റ് ചികിത്സയിലായിരുന്ന അട്ടപ്പാടി സ്വദേശി മരിച്ചു. അട്ടപ്പാടി പുതൂര്‍ സ്വര്‍ണ ഗദ്ധ ഊരിലെ കാളിയാണ് മരിച്ചത്. വിറക് ശേഖരിക്കുന്നതിനിടെ കാട്ടാന ആക്രമിച്ച കാളിയെ വിദഗ്ധ ചികിത്സയ്ക്കായി ആശുപത്രിയില്‍ പ്രവേശിപ്പിച്ചിരുന്നു. ഇന്ന് ഉച്ചയോടെയായിരുന്നു സംഭവം നടന്നത്.

ഇരുകാലുകള്‍ക്കും പരിക്കേറ്റ കാളിയെ വനംവകുപ്പ് ഉദ്യോഗസ്ഥരെത്തി കോട്ടത്തറ ആശുപത്രിയില്‍ പ്രവേശിപ്പിച്ചു. തുടര്‍ന്ന് വിദഗ്ധ ചികിത്സയ്ക്കായി മറ്റൊരു ആശുപത്രിയിലേക്ക് മാറ്റിയെങ്കിലും ജീവന്‍ രക്ഷിക്കാന്‍ കഴിഞ്ഞില്ല. നെഞ്ചില്‍ ആനയുടെ ചവിട്ടേറ്റിരുന്നു. ആന തുമ്പിക്കൈകൊണ്ട് തട്ടി മാറ്റിയപ്പോഴാണ് ഇരുകാലിനും പരിക്കേറ്റത്.