സെക്രട്ടറിയറ്റിലെ ഉദ്യോഗസ്ഥരുടെ നിസ്സഹകരണത്തിനു പുറമേ സാങ്കേതികപ്പിഴവും; ഫയലുകള് കെട്ടികിടക്കുന്നു
ഉദ്യോഗസ്ഥരുടെ നിസ്സഹകരണത്തിനു പുറമേ സാങ്കേതികപ്പിഴവും സെക്രട്ടേറിയറ്റിന്റെ പ്രവര്ത്തനം സ്തംഭിപ്പിച്ചു. രണ്ടാഴ്ചയായി ഉച്ചകഴിഞ്ഞാല് സെക്രട്ടേറിയറ്റില് ഒരുകാര്യവും നടക്കില്ല. മൂന്നുമുതലാണു പൊതുജനങ്ങള്ക്കു വിവിധ ആവശ്യങ്ങള്ക്കായി സെക്രട്ടേറിയറ്റിലെത്താവുന്നത്.
എന്നാല് രണ്ടാഴ്ചയിലേറെയായി സെക്രട്ടേറിയറ്റിലെ ഒരു കമ്പ്യൂട്ടറും ഉച്ചകഴിഞ്ഞ് പ്രവര്ത്തിക്കുന്നില്ല. രണ്ടരകഴിഞ്ഞാല് ഇവയെ സര്വറുമായി ബന്ധപ്പെടുത്താന് കഴിയാത്ത അവസ്ഥയാണ്.
എം.എല്.എമാര്ക്കുപോലും സെക്രട്ടേറിയറ്റില്നിന്ന് ഒരു വിശദാംശവും ലഭിക്കുന്നില്ലെന്ന പരാതി ശക്തം. ഇഗവേണന്സ് നടപ്പാക്കിയവര്ക്കുപോലും സെര്വര് തകരാറിനെപ്പറ്റി അറിയില്ല. സെക്രട്ടേറിയറ്റിലെ ഐ.ടി. സെല്ലില് വിളിച്ചുചോദിച്ചാല് അവര്ക്കും ഉത്തരമില്ല. നാഷണല് ഇന്ഫൊര്മാറ്റിക്സ് സെന്ററാണ് (എന്.ഐ.സി) സെക്രട്ടേറിയറ്റിലെ ഇഗവേണന്സ് സംവിധാനം ഏര്പ്പെടുത്തിയത്. ഒരാഴ്ചയിലേറെയായി എന്.ഐ.സിയുടെ ഫയല് ഫ്ളോയിങ് സോഫ്റ്റ്വേര് പ്രവര്ത്തിക്കാത്തതിനാല് ഫയലുകള് കെട്ടിക്കിടക്കുകയാണ്.
സെക്രട്ടേറിയറ്റിലെ ഇഗവേണന്സ് സംവിധാനത്തെക്കുറിച്ചു മുമ്പേ വ്യാപകപരാതിയുണ്ട്. ദിവസം 50 ഫയലുകള് സ്കാന് ചെയ്ത് സൂക്ഷിക്കാനുള്ള ശേഷി മാത്രമാണു സെര്വറുകള്ക്കുള്ളത്. ഇവയുടെ ശേഷി ഉയര്ത്താതെ കമ്പ്യൂട്ടറുകളുടെ എണ്ണം വര്ധിപ്പിച്ചതും ഭരണസ്തംഭനത്തിനു കാരണമായി. 500 കമ്പ്യൂട്ടറുകള് പ്രവര്ത്തിച്ചിരുന്നപ്പോഴുള്ള അതേ ശേഷിയാണ് ഇപ്പോള് 5000 കമ്പ്യൂട്ടറുകള് സ്ഥാപിച്ചപ്പോഴുമുള്ളത്. സെക്രട്ടേറിയറ്റിലെ ഇഗവേണന്സ് പദ്ധതിയിലേക്കു സോഫ്റ്റ്വേറുകള് വാങ്ങുന്നതു യാതൊരു മാനദണ്ഡവുമില്ലാതെയാണെന്നു പരാതിയുണ്ട്.
https://www.facebook.com/Malayalivartha