ഇനി സര്ക്കാര് ജീവനക്കാര്ക്ക് ആകാശവാണിയില് കാഷ്വല് ജോലികളില്ല
ആകാശവാണി നിലയങ്ങളില് സര്ക്കാര് ജീവനക്കാര്ക്ക് കരാര് അടിസ്ഥാനത്തില് വാര്ത്താവിനോദ പരിപാടികള് അവതരിപ്പിക്കാനുള്ള അനുവാദം പ്രസാര് ഭാരതി നിര്ത്തി. വാര്ത്താ വിഭാഗത്തിലെ കാഷ്വല് അനൗണ്സര്മാര്, ന്യൂസ് റീഡര്മാര്, എഡിറ്റര്മാര്, അവതാരകര് മുതല് വിവിധ വിഭാഗങ്ങളില് ജോലി ചെയ്യുന്ന കേന്ദ്രസംസ്ഥാന ജീവനക്കാര്ക്കാണ് പുതിയ ഉത്തരവ് തടസ്സമാകുന്നത്.
സര്വിസ് ചട്ടപ്രകാരം ഒരേസമസം രണ്ട് വേതനം പറ്റുന്ന ഉത്തരവാദിത്തം നിര്വഹിക്കാന് പാടില്ലെന്ന വ്യവസ്ഥ നടപ്പിലാക്കാനാണ് കേന്ദ്ര തീരുമാനം. പല ഘട്ടങ്ങളിലായാണ് പുതിയ തീരുമാനം പ്രസാര് ഭാരതി നടപ്പാക്കിയത്. ആകാശവാണിയില് ജോലി ചെയ്യുന്ന സര്ക്കാര് ജീവനക്കാരുടെ പട്ടികയാണ് ആദ്യം ആവശ്യപ്പെട്ടത്.
തുടര്ന്ന് ആകാശവാണിയിലെ ജോലി തുടരാന് അതാത് വകുപ്പുകളില്നിന്ന് എന്.ഒ.സി ഹാജരാക്കാന് ഉദ്യോഗസ്ഥര്ക്ക് നിര്ദേശം നല്കി. ഇതിന് പിന്നാലെയാണ് പുതിയ തീരുമാനം
പൊതുജനങ്ങളുടെ പങ്കാളിത്തം ഉറപ്പുവരുത്തുക എന്ന ലക്ഷ്യത്തിലും കലാകാരന്മാര് എന്ന പരിഗണനയിലുമാണ് ആവശ്യമായ ഘട്ടങ്ങളില് ആകാശവാണി നിലയങ്ങളില് പുറത്ത് നിന്നുള്ളവരുടെ സഹായം തേടിയിരുന്നത്. പ്രതിമാസം ആറ് ഡ്യൂട്ടികളാണ് കാഷ്വല് വിഭാഗത്തിന് നല്കുന്നത്.
പുലര്ച്ചെ അഞ്ചിന് തുടങ്ങി രാത്രി 11ന് അവസാനിക്കുന്ന പ്രവര്ത്തനസമയത്തില് വിവിധ ഷിഫ്റ്റുകളാണ് കാഷ്വല് ജീവനക്കാര്ക്ക് നല്കുന്നത്. ആവശ്യമെങ്കില് മാത്രം പരിഗണിക്കും എന്നതാണ് ഇവര്ക്കുള്ള കരാറിലെ നിബന്ധന. നടപടി കര്ശനമാക്കിയതോടെ സംസ്ഥാനത്ത് വാര്ത്തവിനോദപരിപാടികള് അവതരിപ്പിച്ചിരുന്ന 250 പേരെയാണ് ഒഴിവാക്കിയത്. വര്ഷങ്ങളായി ജോലിചെയ്തുവന്ന അനുഭവസമ്പന്നരെ ഒറ്റയടിക്ക് ഒഴിവാക്കിയത് നിലയങ്ങളുടെ പ്രവര്ത്തനത്തെ ബാധിക്കുന്നുണ്ട്. വിശേഷിച്ചും സ്വകാര്യ എഫ്.എം സ്റ്റേഷനുകള് ജനകീയപരിപാടികളുമായി സ്വാധീനമുറപ്പിക്കാന് ശ്രമിക്കുന്ന സാഹചര്യത്തില്.
സര്ക്കാര് ജീവനക്കാരെ ഒഴിവാക്കി പുതിയ കാഷ്വല് പാനല് തയാറാക്കാനാണ് അധികൃതരുടെ തീരുമാനം. എന്നാല്, ഇരട്ടവേതനം പറ്റുന്നവരെ ഒഴിവാക്കുന്നതിലൂടെ തൊഴിലില്ലാത്തവര്ക്ക് അവസരം ലഭിക്കുമെന്നതാണ് അധികൃതരുടെ വിശദീകരണം.
https://www.facebook.com/Malayalivartha