നാളെ മുതല്‍ സംസ്ഥാനത്ത് ഇറച്ചിക്കോഴി കിലോയ്ക്ക് 87 രൂപ നിരക്കിലേ വില്‍ക്കാന്‍ പാടുള്ളൂ. ഇതു ലംഘിച്ചാല്‍ കേസെടുക്കുമെന്നും വ്യാപാരികള്‍ക്കു മന്ത്രി തോമസ് ഐസക്കിന്റെ താക്കീത്. ഇറച്ചിക്കോഴിക്കു സര്‍ക്കാര്‍ വില പ്രഖ്യാപിക്കുന്ന അപൂര്‍വ നടപടിക്കു പിന്നാലെ ഹോട്ടല്‍ഭക്ഷണത്തിനും വില കുറപ്പിക്കുകയാണു ലക്ഷ്യം.
കോഴിയിറച്ചിക്കു വില കുറച്ചാല്‍ ഭക്ഷണത്തിനു വില താഴ്ത്താമെന്ന ഹോട്ടല്‍ വ്യാപാരികളുടെ വാഗ്ദാനം കണക്കിലെടുത്താണു സര്‍ക്കാര്‍ ആദ്യം കോഴിയെ പിടിച്ചത്. ജിഎസ്ടിയുടെ മറവില്‍ നിത്യോപയോഗ സാധനങ്ങള്‍ക്കു വിലകൂട്ടുന്നതു തടയാന്‍ സപ്ലൈകോ വഴി വിതരണം ചെയ്യുന്ന 60 ഇനങ്ങള്‍ക്കു വിലക്കുറവും മന്ത്രി പ്രഖ്യാപിച്ചു. കോഴിക്കച്ചവടവും വിലനിര്‍ണയവും കേരളത്തിലെയും തമിഴ്‌നാട്ടിലെയും ഒരു ചെറിയ സംഘത്തിന്റെ പിടിയിലാണെന്നും ഇതു സര്‍ക്കാര്‍ തകര്‍ക്കുമെന്നും 87 രൂപയ്ക്കു പറ്റുമെങ്കില്‍ നാളെ മുതല്‍ വിറ്റാല്‍ മതിയെന്നും തോമസ് ഐസക് പറഞ്ഞു.

ജിഎസ്ടി വന്നെങ്കിലും വാറ്റ് നിയമം പോയിട്ടില്ലെന്ന് ഓര്‍ത്താല്‍ നന്ന്. കൂടുതലൊന്നും പറയുന്നില്ലെന്നും രോഷത്തോടെ ഐസക് മുന്നറിയിപ്പു നല്‍കി. തോന്നുന്ന വിലയ്ക്കു വില്‍ക്കുന്ന ഏര്‍പ്പാട് അവസാനിപ്പിക്കാന്‍ ജനങ്ങളും രംഗത്തിറങ്ങണം.

കോഴിയിറച്ചിക്കു ചുമത്തിയിരുന്ന 14.5% വാറ്റ് നികുതി ഇല്ലാതായതോടെ 103 രൂപയില്‍നിന്നു വില 87 രൂപയിലേക്കു താഴേണ്ടതാണ്. കോഴിയിറച്ചി മാഫിയയെ നേരിടാന്‍ കെപ്‌കോ പ്രവര്‍ത്തനം വിപുലമാക്കും. എല്ലാ പഞ്ചായത്തിലും കുടുംബശ്രീകള്‍ക്കു കോഴിവളര്‍ത്തലിനു സഹായം നല്‍കി സ്വയംപര്യാപ്തത കൊണ്ടുവരാനും പദ്ധതി തയാറാക്കും.

നോണ്‍ എസി റസ്റ്റോറന്റുകള്‍ 5% വില കുറച്ച ശേഷമേ 12% ജിഎസ്ടി ഈടാക്കൂ. എസി റസ്റ്ററന്റുകള്‍ 8% വില കുറച്ചാവും ജിഎസ്ടി ചുമത്തുകയെന്നും അറിയിച്ചിട്ടുണ്ട്. ജിഎസ്ടി വന്നതോടെ വില കുറഞ്ഞ ഉല്‍പന്നങ്ങള്‍ എംആര്‍പി നോക്കാതെ കുറഞ്ഞ വിലയ്ക്കുതന്നെ വില്‍ക്കാന്‍ വ്യാപാരികള്‍ തയാറാകണം. ആറുമാസത്തെ സ്‌റ്റോക്കിനുള്ള നഷ്ടപരിഹാരം സര്‍ക്കാര്‍ നല്‍കും. രണ്ടോ മൂന്നോ ആഴ്ചകൊണ്ട് ഉല്‍പാദനം കൂടുകയും കോഴിയിറച്ചി വില കുറയുകയും ചെയ്യുമെന്നു പൗള്‍ട്രി ഫാര്‍മേഴ്‌സ് ആന്‍ഡ് ട്രേഡേഴ്‌സ് അസോസിയേഷന്‍ പറഞ്ഞു.