കെഎസ്‌ആര്‍ടിസിയിലെ പ്രതിസന്ധിയെച്ചൊല്ലി യു.ഡി.എഫിലെ രണ്ട്‌ മന്ത്രിമാര്‍ തമ്മില്‍ പരസ്യമായി രംഗത്ത്‌. ഒരു മന്ത്രി നിയമസഭയിലും മറ്റൊരു മന്ത്രി പൊതുപ്രസംഗത്തിലുമാണ്‌ പ്രതികരിച്ചത്‌. പ്രതിവര്‍ഷം 1098 കോടി രൂപയാണ്‌ ഡീസല്‍ വിലവര്‍ധനയിലൂടെ കെഎസ്‌ആര്‍ടിസിക്ക്‌ ഉണ്ടാവുന്നതെന്നും മാസം തോറും ഡീസല്‍ വില വര്‍ധിപ്പിക്കുന്നതിനെതിരെ ഇരുമന്ത്രിമാരും ശക്തമായി എതിര്‍പ്പ്‌ പ്രകടിപ്പിച്ചിട്ടുണ്ട്‌. മാസം തോറും ഡീസല്‍ വില വര്‍ധിപ്പിക്കുന്ന കേന്ദ്രത്തിന്റെ നടപടി അംഗീകരിക്കാനാവില്ലെന്നാണ്‌ ആര്യാടന്‍ നിയമസഭയില്‍ പറഞ്ഞത്‌. എന്നാല്‍ ഗണേഷ്‌കുമാര്‍ പറയുന്നത്‌ എണ്ണക്കമ്പനികള്‍ ഉണ്ടാക്കുന്ന, കോടികളുടെ ദുര്‍വ്യയംമൂലമുള്ള ബാധ്യത ജനം സഹിക്കണമെന്ന് പറയുന്നത് തെറ്റാണെന്നും സ്വന്തം ഉദ്യോഗസ്ഥര്‍ക്ക് പഞ്ചനക്ഷത്ര സൗകര്യങ്ങള്‍ ഒരുക്കിക്കൊടുക്കുന്ന എണ്ണക്കമ്പനികളെ നിയന്ത്രിക്കാന്‍ കേന്ദ്രം തയ്യാറാകണമെന്നുമാണ്‌. ജീവനക്കാരേയും മന്ത്രി ഗണേശ്‌കുമാര്‍ പരിഹസിക്കുന്നുണ്ട്‌. സ്വകാര്യ പമ്പില്‍നിന്ന് ഡീസല്‍ അടിക്കുന്നതിന് എതിരായി മൂന്ന് കാരണങ്ങളാണ് കെഎസ്ആര്‍ടിസി എം.ഡി.പറയുന്നത്. ജീവനക്കാര്‍ക്ക് കള്ളം കാണിക്കാന്‍ കഴിയും. യാത്രക്കാരെ ഇറക്കിവേണം ഡീസല്‍ അടിക്കാന്‍. ഡ്യൂട്ടി കഴിഞ്ഞ് എത്രയുംവേഗം സ്ഥലം കാലിയാക്കാന്‍ ശ്രമിക്കുന്ന ജീവനക്കാര്‍ക്ക് വണ്ടിയില്‍ ഡീസല്‍ അടിക്കാനുള്ള താത്പര്യമില്ലായ്മ. ഇതെല്ലാം ജീവനക്കാര്‍ മനസ്സ് വച്ചാല്‍ പരിഹരിക്കാന്‍ കഴിയുമെന്നും എല്ലാ യൂണിയനുകളും കെഎസ്ആര്‍ടിസിയുടെ നിലനില്പിനായി പരിശ്രമിക്കേണ്ട സമയമായെന്നും മന്ത്രി ഗണേഷ് പറഞ്ഞു.