മകന്റെ വിവാഹച്ചടങ്ങില് പങ്കെടുക്കാന് അബ്ദുല് നാസര് മഅ്ദനി ഇന്നു തലശ്ശേരിയില്; കനത്ത സുരക്ഷയൊരുക്കി പൊലീസ്
പിഡിപി ചെയര്മാന് അബ്ദുല് നാസര് മഅ്ദനി ഇന്ന് തലശ്ശേരിയില്. മകന്റെ വിവാഹച്ചടങ്ങില് സംബന്ധിക്കുന്നതിനായി എത്തുന്ന മഅദനിക്ക് കനത്ത സുരക്ഷാ സന്നാഹമാണ് തലശ്ശേരിയില് പൊലീസ് ഒരുക്കിയിരിക്കുന്നത്. വിവാഹ വേദിയായ ടൗണ്ഹാളിലും മദനി വിശ്രമിക്കുന്ന ലോഗന്സ് റോഡിലെ ലോഡ്ജിലും പൊലീസ് നിരീക്ഷണം ഏര്പ്പെടുത്തിയിട്ടുണ്ട്. നഗരത്തിന്റെ വിവിധ ഭാഗങ്ങളില് ഇന്നലെ മുതല് മഫ്തിയില് പൊലീസുകാര് നിരീക്ഷണം നടത്തുന്നുണ്ട്.
രാവിലെ ഏഴോടെ തിരുവനന്തപുരം - മംഗളൂരു എക്സ്പ്രസ് ട്രെയിനിലാണ് മഅ്ദനി തലശ്ശേരിയില് എത്തുന്നത്. ഇന്നലെ രാത്രി തലശ്ശേരി റെയില്വേ സ്റ്റേഷനില് ബോംബ് സ്ക്വാഡും ഡോഗ് സ്ക്വാഡും പരിശോധന നടത്തി. രാവിലെ തലശ്ശേരി റെയില്വേ സ്റ്റേഷനില് ട്രെയിന് ഇറങ്ങുന്ന മഅദനി നേരെ ലോഡ്ജില് എത്തും.
11 മണിയോടെ നിക്കാഹിനായി ടൗണ്ഹാളിലേക്കു പുറപ്പെടും. വിവാഹത്തിനു ശേഷം ലോഡ്ജില് എത്തി വിശ്രമിച്ച് വൈകിട്ട് നാലോടെ വധുവിന്റെ അഴിയൂരിലെ വീട്ടില് സല്ക്കാരത്തിനായി പുറപ്പെടും. അവിടെ നിന്നു റോഡ് മാര്ഗം കോഴിക്കോട്ടേക്കു പോകും.
മഅ്ദനിക്കൊപ്പം ഒരു സംഘം കര്ണാടക പൊലീസും തലശ്ശേരിയില് എത്തുന്നുണ്ട്. സംസ്ഥാനത്തിന്റെ വിവിധ ഭാഗങ്ങളില് നിന്നുള്ളവര് വിവാഹത്തിനായി എത്തും. 2500 പേര്ക്കുള്ള ഭക്ഷണമാണ് ഒരുക്കുന്നത്. നഗരത്തില് ഗതാഗത കുരുക്കിനുള്ള സാധ്യതയും പൊലീസ് മുന്നില് കാണുന്നുണ്ട്. ഡിവൈഎസ്പി പ്രിന്സ് ഏബ്രഹാമിന്റെ നേതൃത്വത്തിലാണ് സുരക്ഷാ സന്നാഹങ്ങള്.
https://www.facebook.com/Malayalivartha
