ചെറിയൊരു വഴക്ക് ആ അമ്മയേയും പ്രായപൂര്‍ത്തിയായ മകളേയും അകത്താക്കി. കോട്ടയം കൊല്ലാട്ടാണ് സംഭവം. വാക്കുതര്‍ക്കത്തെ തുടര്‍ന്ന് അമ്മയും മകളും അയല്‍വാസിയെ കത്രികയ്ക്ക് കുത്തിയത്. കൊല്ലാട് മരുതൂര്‍ തങ്കച്ചനെ(59) കുത്തിയ കേസില്‍ അറസ്റ്റിലായ അയല്‍വാസികളും വാടകയ്ക്കു താമസിക്കുന്നവരുമായ രാജി(45), മകള്‍ അജ്ഞലി(20) എന്നിവരെ ഇന്നു കോടതിയില്‍ ഹാജരാക്കും.

ഗുരുതരമായി പരിക്കേറ്റ തങ്കച്ചന്‍ കോട്ടയം മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലാണ്. 

കൊല്ലാട് ഭാഗത്ത് മൂന്നു വര്‍ഷമായി വാടകയ്ക്ക് താമസിക്കുന്ന പ്രതികളും അയല്‍വാസിയായ തങ്കച്ചനുമായി വാക്കുതര്‍ക്കമുണ്ടായിരുന്നു. ഇതിനെതുടര്‍ന്നു പ്രതികള്‍ക്കെതിരെ തങ്കച്ചന്‍ പോലീസില്‍ പരാതി കൊടുത്തിരുന്നു. ഇതിനെ ചൊല്ലി തിങ്കളാഴ്ച രാത്രി 7.30ന് പ്രതികള്‍ തങ്കച്ചനുമായി വീടിന് സമീപത്തു വച്ചു വാക്കു തര്‍ക്കത്തിലേര്‍പ്പെടുകയും തങ്കച്ചന്റെ തലയില്‍ വെട്ടുകയും വയര്‍ ഭാഗത്തു കുത്തുകയുമായിരുന്നു. 

ഗുരുതരമായി കുത്തേറ്റ തങ്കച്ചനെ സമീപവാസികളാണ് ആശുപത്രിയിലെത്തിച്ചത്. സംഭവത്തെ തുടര്‍ന്ന് ഈസ്റ്റ് പോലീസ് സ്ഥലത്തെത്തി അന്വേഷണം നടത്തുകയും ഇന്നലെ ഇരുവരേയും അറസ്റ്റു ചെയ്യുകയുമായിരുന്നു. എന്നാല്‍ വാക്കു തര്‍ക്കം എന്തിന്റെ പേരിലാണെന്ന് പോലീസ് വെളിപ്പെടുത്തിയില്ല. അയല്‍വാസികള്‍ക്കും ഇതേക്കുറിച്ച് ഒന്നുമറിയില്ല.