വിവാഹ വസ്ത്രം സമയത്ത് തയിച്ചു നല്‍കാത്തതിന്റെ പേരില്‍ തയ്യല്‍ കടയില്‍ കയറി അതിക്രമം കാണിച്ച മണവാളന്റെ സഹോദരനും ബന്ധുവിന് ഇങ്ങനെ പണികിട്ടുമെന്ന് വിചാരിച്ചില്ല. ഇനി ഇതില്‍ നിന്നും തലയൂരാന്‍ കുറച്ചു പാടുപെടും. വസ്ത്രം തയിച്ചു നല്‍കാന്‍ വൈകിയതിനാല്‍ രണ്ട് ലക്ഷം രൂപ നഷ്ടപരിഹാരം ആവശ്യപ്പെട്ടാണ് കടയില്‍ കയറി അതിക്രമം നടത്തിയത്. കഴിഞ്ഞയാഴ്ചയിലാണ് പെരുമ്ബടപ്പ് സ്‌റ്റേഷന്‍ അതിര്‍ത്തിയിലെ പാറയില്‍ കേസിനാസ്പദമായ സംഭവം നടന്നത്. പീഡനക്കേസിലാണ് ഇപ്പോള്‍ മണവാളന്റെ സഹോദരനും ബന്ധുവും കുടുങ്ങിയിരിക്കുന്നത്.

തയ്യല്‍ കടയിലെ വയനാട് സ്വദേശിയായ ജീവനക്കാരിയാണ് മണവാളന്റെ ബന്ധുവിനും സഹോദരനുമെതിരെ പീഡനശ്രമത്തിന് കേസ്‌കൊടുത്തിരിക്കുന്നത്. ടൈലറിങ്ങ് ഷോപ്പില്‍ വിവാഹവസ്ത്രം തയ്ക്കാന്‍ നല്‍കിയ വടക്കേക്കാട് സ്വദേശിയായ യുവാവിനു വിവാഹ ദിവസം രാവിലെ വരെ വിവാഹ വസ്ത്രം തയ്ച്ചു നല്‍കാതിരുന്നതാണ് പ്രശ്‌നത്തിന് കാരണം. എന്നാല്‍ വേറെ വസ്ത്രങ്ങള്‍ സംഘടിപ്പിച്ച് വിവാഹ കര്‍മ്മങ്ങള്‍ പൂത്തിയാക്കിയ പുതുമണവാളനും സഹോദരനും ബന്ധുവും പെരുമ്ബടപ്പ് പാറയിലെ തയ്യല്‍ കടയിലെത്തി വാക്കേറ്റം നടത്തുകയും മറ്റൊരു വിവാഹ വസ്ത്രം എടുത്തുപോകുകയായിരുന്നു.

രണ്ട് ലക്ഷം രൂപ നഷ്ടപരിഹാരം വേണമെന്നും അല്ലെങ്കില്‍ തയ്യല്‍ കയയില്‍ നിന്നെടുത്ത വിവാഹ വസ്ത്രം തിരിച്ചു നല്‍കില്ലെന്നും പറഞ്ഞതോടെ സംഭവത്തിന് മറ്റൊരു ഭാവം രൂപപ്പെടുകയായിരുന്നു.
തങ്ങളുടെ തയ്യല്‍ കടയില്‍ കയറി വനിത ജീവനക്കാരിയെ പീഡിപ്പിക്കാന്‍ ശ്രമിച്ചതായി വയനാട് സ്വദേശിനിയായ ജീവനക്കാരി പോലീസില്‍ പരാതി നല്‍കിയതോടെ സംഭവം കൈവിട്ട് പോകുകയായിരുന്നു.
സംഭവം കൈവിട്ട്‌പോകും എന്ന് കണ്ടെതോടെ പെരുമ്പടപ്പ് എസ്‌ഐ കാര്യങ്ങള്‍ ഒത്തു തീര്‍പ്പാക്കണമെന്ന് ആവശ്യപ്പെട്ടിരുന്നു.

എന്നാല്‍ പ്രശ്‌നം ഒത്തു തീര്‍പ്പാക്കാന്‍ തയ്യല്‍ കടക്കാര്‍ രണ്ട് ലക്ഷം രൂപ ആവശ്യപ്പെട്ടതോടെ കാര്യങ്ങള്‍ പീന്നീടും കൈവിട്ട് പോകുകയായിരുന്നു. അതോടെ സംഭവത്തില്‍ വാദിയായ പുതുമണവാളന്റെ സഹോദരനും ബന്ധുവിനുമെതിരെ കേസാവുകയായിരുന്നു.
ജാമ്യം നല്‍കാന്‍ കഴിയാത്ത വകുപ്പുകള്‍ ചേര്‍ത്താണ് സഹോദരനും ബന്ധുവിനുമെതിരെ പെരുമ്ബടപ്പ് പോലീസ് കേസ് രജിസ്റ്റര്‍ ചെയ്തിരിക്കുന്നത്. രണ്ട് പേരും ഇപ്പോള്‍ ഒളിവിലാണ്.