അപ്രതീക്ഷിതമായിട്ടായിരുന്നു കഴിഞ്ഞ മാസം പത്തിന് രാത്രി ദിലീപ് അറസ്റ്റിലായത്. കൊച്ചിയില്‍ നടി ആക്രമിക്കപ്പെട്ടതിനു പിന്നിലെ ഗൂഡാലോചനയുടെ സൂത്രധാരന്‍ ദിലീപാണെന്ന കണ്ടെത്തല്‍ സിനിമാ മേഖലയെയും ആരാധകരെയും ഞെട്ടിച്ചു. അറസ്റ്റു വാര്‍ത്ത പുറത്തുവന്നതോടെ ജനപ്രിയനായകനെ ജനം തളളിപ്പറയുന്നതും കേരളം കണ്ടു.
ആരാധകര്‍ മാത്രമല്ല സിനിമാലോകമൊന്നാകെയും ദിലീപിനെ തളളിപ്പറഞ്ഞു. താരസംഘടനയായ അമ്മയടക്കം സിനിമാ സംഘടനകളില്‍ നിന്നെല്ലാം ദിലീപ് പുറത്താക്കപ്പെട്ടു. സ്വന്തം നാടായ ആലുവയിലെ സബ്ജയിലില്‍നിന്നു പുറത്തെത്താന്‍ ജാമ്യാപേക്ഷയുമായി ഹൈക്കോടതിയെയടക്കം സമീപിച്ചെങ്കിലും ഫലമുണ്ടായില്ല. ഭൂമി ഇടപാടുകളും, സ്വന്തം സ്ഥാപനങ്ങള്‍ക്കായി സ്ഥലം കയ്യേറിയെന്ന പരാതികളുമെല്ലാം കൂടുതല്‍ തിരിച്ചടിയായി ദിലീപിനുമേല്‍ വന്നു പതിച്ചു. ഭാര്യ കാവ്യാ മാധവനടക്കം അടുത്ത കുടുംബാംഗങ്ങള്‍ പോലും പൊലീസിന്റെ ചോദ്യം ചെയ്യലിനു വിധേയരാകേണ്ട അവസ്ഥയും വന്നു.
ഇതിനിടെ, ജയിലില്‍ ദിലീപിന്റെ ആരോഗ്യസ്ഥിതി മോശമാണെന്ന സൂചനകളുമെത്തി. തന്റെ മേല്‍ ആരോപിക്കപ്പെടുന്ന കുറ്റങ്ങളെല്ലാം എപ്പോഴും ദിലീപ് നിഷേധിക്കുകയാണ്. അറസ്റ്റിലായി ഒരു മാസം കഴിയുമ്പോഴും എന്നു പുറത്തിറങ്ങാനാകുമെന്നറിയാതെ ആശങ്കയിലാണ് ദിലീപ്. മറുവശത്ത് അന്വേഷണ സംഘമാകട്ടെ കോടതിയില്‍ കേസിന്റെ വിചാരണ പൂര്‍ത്തിയാകും വരെ ദിലീപിനെ ജയിലില്‍നിന്ന് പുറത്തിറക്കാതിരിക്കാനുളള തീവ്രശ്രമത്തിലും. കേസില്‍ വലിയ മുന്നേറ്റങ്ങള്‍ ഉണ്ടാക്കാനാകാത്തത് പോലീസിന് തിരിച്ചടി തന്നെയാണ്.