യുവമോര്‍ച്ച നേതാവിനെ വെട്ടികൊലപ്പെടുത്താന്‍ ശ്രമം. യുവമോര്‍ച്ച തൃശൂര്‍ ജില്ലാ കമ്മിറ്റിയംഗം അനീഷ് പോണത്തിനെയാണ് വെട്ടികൊലപ്പെടുത്താന്‍ ശ്രമിച്ചത്. കൊടുങ്ങല്ലൂര്‍ ശ്രൂകുരുംബ ക്ഷേത്രത്തിന് സമീപത്തുവച്ചാണ് അനീഷിന് നേരെ ആക്രമണമുണ്ടായത്. ബിജെപിക്കെതിരെ ഉയര്‍ന്ന അഴിമതി ആരോപണത്തില്‍ സംസ്ഥാന അധ്യക്ഷന്‍ കുമ്മനം രാജശേഖരനെതിരെ അനീഷ് ഫെയ്‌സ്ബുക്ക് പോസ്റ്റിട്ടിരുന്നു. കുമ്മനത്തിനെതിരെ ഫെയ്‌സ്ബുക്ക് പോസ്റ്റിട്ടതിനാലാണ് തന്നെ ആര്‍എസ്എസ് പ്രവര്‍ത്തകര്‍ വെട്ടികൊലപ്പെടുത്താന്‍ ശ്രമിച്ചതെന്ന് അനീഷ് ആരോപിച്ചു.സംഭവവുമായി ബന്ധപ്പെട്ട് ആര്‍എസ്എസ് താലൂക്ക് കാര്യവാഹക് ജെമി, അഖില്‍, രാജേഷ്, അനീഷ് എന്നിവര്‍ക്കെതിരെ പോലീസ് കേസെടുത്തു. അഴിമതിയില്‍ മുങ്ങിക്കുളിച്ചു നില്‍ക്കുന്ന ബി.ജെ.പി നേതൃത്വത്തെ പരിഹസിച്ച് സമൂഹ മാധ്യമങ്ങളില്‍ പ്രതികരണം നടത്തിയതിനെ തുടര്‍ന്നാണ് ആര്‍.എസ്.എസ് പ്രവര്‍ത്തകര്‍ യുവമോര്‍ച്ച ജില്ലാ കമ്മറ്റി അംഗമായ അനീഷ് പോണത്തിനെ അക്രമിച്ചത്. സംസ്ഥാന നേതൃത്വത്തെ വെട്ടിലാക്കിയ മെഡിക്കല്‍ കോഴ അഴിമതിയില്‍ ആരോപണ വിധേയരായവര്‍ക്കെതിരെ നടപടി സ്വീകരിക്കാതെ റിപ്പോര്‍ട്ട് ചോര്‍ത്തിയെന്ന പേരില്‍ വി.വി രാജേഷിനെതിരെ നടപടിയെടുത്തതില്‍ അനീഷ് ഫേസ്ബുക്കില്‍ പ്രതികരിച്ചിരുന്നു. തെറ്റ് ചെയ്യുന്നതല്ല ചെയ്ത തെറ്റ് പുറത്തു പറയുന്നതാണ് കുറ്റമെന്ന് അനീഷ് പോസ്റ്റ് ചെയ്തിരുന്നു. രാജേഷിനെതിരെ മാത്രം നടപടി സ്വീകരിച്ചതിനെ വിമര്‍ശിച്ചുവന്ന പോസ്റ്റുകളും അനീഷ് ഷെയര്‍ ചെയ്തിരുന്നു. ഇതാണ് ആര്‍.എസ്.എസുകാരെ ചൊടിപ്പിച്ചത്. ക്ഷേത്രപരിസരത്ത് വച്ച് ഇന്നലെ രാത്രിയാണ് ആക്രമണം ഉണ്ടായത്.