നിയമസഭാ സമ്മേളനത്തിന്റെ അഞ്ചാം ദിനവും എം എ ബേബി എത്തിയില്ല
നിയമസഭാ സമ്മേളനം തുടങ്ങി അഞ്ചാം ദിവസവും സി പി എം പോളിറ്റ് ബ്യൂറോ അംഗം കൂടിയായ കുണ്ടറ എംഎല്എ എം എ ബേബി നിയമസഭാ നടപടികളില് പങ്കെടുത്തില്ല. സമ്മേളനത്തില് പങ്കെടുക്കാത്തത് സംബന്ധിച്ച് മാധ്യമങ്ങളുടെ ചോദ്യങ്ങള്ക്ക് മുമ്പും വിട്ടു നിന്നിട്ടുണ്ടന്നായിരുന്നു അദ്ദേഹത്തിന്റെ മറുപടി. എംഎല്എ സ്ഥാനം രാജിവെക്കുന്ന കാര്യത്തില് തീരുമാനമായതിനു ശേഷം മാത്രമേ ബേബി ഇനി നിയമസഭാ സമ്മേളനത്തില് പങ്കെടുക്കുകയുള്ളുവെന്നാണ് സൂചന. വിഷയത്തില് പാര്ട്ടിക്ക് ഇനിയും നിലപാട് സ്വീകരിക്കാനായിട്ടില്ല. തിങ്കളാഴ്ച ആരംഭിച്ച നിയമസഭാ സമ്മേളനം അഞ്ച് ദിവസം പിന്നിട്ടിട്ടും ഇതുവരെയും എം എ ബേബി സമ്മേളനത്തില് പങ്കെടുത്തിട്ടില്ല.
ലോക്സഭ തെരഞ്ഞെടുപ്പില് കൊല്ലം മണ്ഡലത്തില് നിന്നും മത്സരിച്ച എം എ ബേബിക്ക് കനത്ത തോല്വിയാണ് നേരിടേണ്ടി വന്നത്. ബേബി പ്രതീനിധീകരിക്കുന്ന കുണ്ടറ നിയമസഭാ മണ്ഡലത്തില് വോട്ട് കുത്തനെ കുറഞ്ഞതിന്റെ ധാര്മ്മിക ഉത്തരവാദിത്വം ഏറ്റെടുത്ത് ബേബി എംഎല്എ സ്ഥാനം രാജിവെയ്ക്കാന് ഒരുങ്ങുകയാണെന്ന് വാര്ത്തകള് ഉണ്ടായിരുന്നു. കഴിഞ്ഞ ആഴ്ച ചേര്ന്ന കേന്ദ്രകമ്മിറ്റിയില് ബേബി ഇക്കാര്യം വ്യക്തമാക്കിയതായി പാര്ട്ടി ജനറല് സെക്രട്ടറി പ്രകാശ് കാരാട്ട് സ്ഥിരീകരിച്ചിരുന്നു.
എന്നാല് എംഎല്എ സ്ഥാനം രാജിവെക്കുന്ന കാര്യം സംസ്ഥാന തലത്തില് ആലോചിച്ച് തീരുമാനമെടുക്കാനാണ് കേന്ദ്രം നിര്ദ്ദേശിച്ചത്. ഈ മാസം 21ന് ആരംഭിക്കുന്ന സംസ്ഥാന നേതൃയോഗത്തില് ആയിരിക്കും ഇക്കാര്യത്തില് അന്തിമ തീരുമാനം കൈക്കൊള്ളുക. അതേസമയം നിയമസഭാ സമ്മേളനത്തില് മുമ്പും പങ്കെടുക്കാതിരുന്നിട്ടുണ്ടെന്ന് എം എ ബേബി വിശദീകരിച്ചു. തിങ്കളാഴ്ച പങ്കെടുക്കുന്നത് മറ്റ് പരിപാടികള് നോക്കിയിട്ട് പറയാമെന്നും ബേബി പറഞ്ഞു. സഭയില് എത്താത്തത് പ്രതിഷേധമാണോ എന്ന ചോദ്യത്തില് നിന്നും എം എ ബേബി ഒഴിഞ്ഞുമാറി.
https://www.facebook.com/Malayalivartha