സിങ്കം ആദ്യമായി തോറ്റു ജനങ്ങള്‍ ആദ്യമായി കൈയ്യടിച്ചു
ഋഷിരാജ്‌ സിംഗെന്ന സാക്ഷാല്‍ സിങ്കത്തിന്റെ ഓരോ പരിഷ്‌കാരങ്ങളും ജനങ്ങള്‍ കൈയ്യടിയോടെയാണ്‌ വരവേറ്റത്‌. സിങ്കത്തിന്റെ ധീരതയും അത്മാര്‍ത്ഥതയും ജന നന്മയ്‌ക്ക്‌ വേണ്ടിയുള്ള പ്രവര്‍ത്തനങ്ങളും എല്ലാം പൊതുവേ അംഗീകരിച്ചതാണ്‌. അത്‌കൊണ്ടാണ്‌ സിങ്കം നടപ്പിലാക്കുന്ന ഓരോ പരിഷ്‌കാരങ്ങള്‍ക്കും വമ്പിച്ച ജനപിന്തുണ ലഭിച്ചതും.
കേരളം ഭരിച്ച കൊടിവച്ച കൊമ്പന്‍മാര്‍ വിചാരിച്ചിട്ടും നടക്കാത്തതായിരുന്നു ഹെല്‍മറ്റ്‌. എന്നാല്‍ ഋഷിരാജ്‌സിംഗ്‌ ട്രാന്‍സ്‌പോര്‍ട്ട്‌ കമ്മീഷററായി അധികാരമേറ്റിട്ട്‌ ചുരുങ്ങിയ നാളുകള്‍ക്കകം തന്നെ കേരളത്തില്‍ എല്ലാവരേയും ഹെല്‍മറ്റ്‌ ധരിപ്പിക്കാന്‍ ഋഷിരാജ്‌സിംഗിനായി. ഋഷിരാജ്‌ സിംഗ്‌ നടപ്പിലാക്കിയ പരിഷ്‌കാരങ്ങളില്‍ ഏറ്റവും പ്രധാനപ്പെട്ടതായിരുന്നു മദ്യപിച്ച്‌ വണ്ടിയോടിച്ചാല്‍ ലൈസന്‍സ്‌ റദ്ദാക്കുമെന്ന മുന്നറിയിപ്പ്‌. ഇവ ജനങ്ങള്‍ സ്വയം ഏറ്റെടുത്ത്‌ വിജയിപ്പിക്കുകയായിരുന്നു. ബലപ്രയോഗം ഇല്ലാതെ തന്നെ എല്ലാവരും അനുസരിച്ചു. കാരണം പറയുന്നത് മറ്റാരുമല്ല സാക്ഷാല്‍ ഋഷിരാജ്‌ സിംഗാണ്‌. അങ്ങനെ ഋഷിരാജ്‌ സിംഗിന്റെ പ്രവര്‍ത്തനങ്ങള്‍മൂലം മദ്യപാനശീലം കുറയുകയും ഭൂരിപക്ഷവും ഹെല്‍മറ്റ്‌ വയ്‌ക്കുകയും ചെയ്‌തു. അതോടെ റോഡപകടങ്ങള്‍ കുറയുകയും ചെയ്‌തു.
ഋഷിരാജ്‌ സിംഗിന്‌ ഫാന്‍ അസോസിയേഷന്‍ പോലുമുണ്ട്‌. ഇതിനിടയ്‌ക്ക്‌ കുറേനാള്‍ ഋഷിരാജ്‌സിംഗിനെ പറ്റി ഒരറിവും ഇല്ലായിരുന്നു. അതു കഴിഞ്ഞാണ്‌ കൈയ്യടിച്ച ജനങ്ങളെ ഒന്നായി വെറുപ്പിക്കുന്ന പുതിയ പരിഷ്‌കാരവുമായി സിംഗ്‌ വീണ്ടും പ്രത്യക്ഷപ്പെട്ടത്‌. കാറുകളില്‍ സഞ്ചരിക്കുന്നവരില്‍ പിന്‍സീറ്റില്‍ ഇരിക്കുന്നവരും സീറ്റ്‌ ബല്‍റ്റ്‌ ധരിക്കണം. ധരിക്കാത്തവരെ കര്‍ശനമായി നേരിടാനും സിംഗ്‌ ഓര്‍ഡര്‍ നല്‍കി. പറയുന്നത് ആരാണെന്ന്‌ ജനങ്ങള്‍ക്ക്‌ നന്നായറിയാം. അത്‌ നടപ്പാക്കുകയും ചെയ്യും.
ഇന്നത്തെ കാലത്ത്‌ കാറില്‍ സഞ്ചരിക്കുന്നത്‌ ഒരു പുതുമയേ അല്ല. നമ്മുടെ കാറിന്റെ സ്വഭാവമനുസരിച്ച്‌ ഭൂരിപക്ഷം കാറുകളിലും പുറകില്‍ രണ്ട് പേര്‍ക്കുള്ള ബെല്‍റ്റാണ്‌ ഒരുക്കിയിരിക്കുന്നത്‌. കുടുംബ സമേതം യാത്ര ചെയ്യുമ്പോള്‍ നാലില്‍ കൂടുതല്‍ അംഗങ്ങളുള്ളവര്‍ പുലിവാലുപിടിച്ചു. സാധാരണ പുറകില്‍ മൂന്ന്‌ പേരെങ്കിലും കയറും. ചിലപ്പോള്‍ അത്യാവശ്യ ഘട്ടങ്ങളില്‍ അത്‌ നാലോ അഞ്ചോ അയെന്നും വരാം. പുറകില്‍ രണ്ട് ബല്‍റ്റ്‌ മാത്രമുള്ളപ്പോള്‍ മൂന്ന്‌ പേര്‍ക്കെങ്ങനെ ബെല്‍റ്റിടാമെന്നറിയാതെ മലയാളി കുഴങ്ങി. മാത്രമല്ല കുടുംബത്തോടെ യാത്ര ചെയ്യുമ്പോള്‍ ഈ പോലീസുകാരുടെ തടഞ്ഞു നിര്‍ത്തല്‍ ഒരു അരോചകവുമായി. ഇന്ത്യയിലോ മറ്റു സംസ്ഥാനങ്ങളിലോ പുറകിലുള്ളവര്‍ക്ക്‌ സീറ്റ്‌ ബെല്‍റ്റ്‌ നിര്‍ബന്ധമല്ലെന്നിരിക്കെയാണ്‌ മലയാളികള്‍ മാത്രം ഇതിന്റെ പേരില്‍ ബലിയാടാകുന്നത്‌. അങ്ങനെ ജനങ്ങള്‍ ആദ്യമായി സിങ്കത്തിനെതിരെ പിറുപിറുത്തു.
ജനങ്ങളുടെ ശബ്‌ദം നിയമസഭയിലുമെത്തി. അങ്ങനെ ഗതാഗത വകുപ്പ്‌ മന്ത്രി തന്നെ ഇടപെട്ടു. സിങ്കം നടപ്പിലാക്കിയ പുറകിലും സീറ്റ്‌ ബെല്‍റ്റ്‌ വേണമെന്ന നിയമം തിരുവഞ്ചൂര്‍ എടുത്തു കളഞ്ഞു. സിങ്കം നടപ്പിലാക്കിയ പദ്ധതി ആദ്യമായി തുഗ്ലക്കിന്റെ പരിഷ്‌കാരമായി മാറി. ജനം സിങ്കത്തിനെതിരെ ആദ്യമായി കൈയ്യടിച്ചു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
