കടകംപള്ളി കേസ്‌ പുരോഗമിക്കുമ്പോള്‍ പ്രതി ദുരൂഹ സാഹചര്യത്തില്‍ മരിച്ചു; അതും ടവല്‍ബാറില്‍ തൂങ്ങി !
മുഖ്യമന്ത്രിയുടെ മുന്‍ ഗണ്‍മാന്‍ സലിംരാജ്‌ ഉള്‍പ്പെട്ട കടകംപളളി ഭൂമി ഇടപാട്‌ കേസില്‍ ഉള്‍പ്പെട്ടെന്ന്‌ സംശയിക്കുന്ന ഡപ്യൂട്ടി കളക്‌ടര്‍ പ്രസന്നകുമാറിന്റെ മരണത്തില്‍ ദുരൂഹത. കഴിഞ്ഞ ദിവസം നൂറനാട്ടെ ലഹരി വിമുക്ത കേന്ദ്രത്തിലാണ്‌ തൂങ്ങി മരിച്ചനിലയിലാണ്‌ അദ്ദേഹത്തെ കാണപ്പെട്ടത്‌. പ്രമാദമായ ഒരു കേസില്‍ ഉള്‍പ്പെട്ട ഒരാള്‍ ലഹരിവിമുക്ത കേന്ദ്രത്തില്‍ തൂങ്ങി മരിച്ചിട്ടും ആ ദിശയ്‌ക്ക്‌ അന്വേഷണം നടത്താന്‍ പോലീസ്‌ തയ്യാറായിട്ടില്ല.
കുളിമുറിയിലെ ടവല്‍ബാറില്‍ ഉടുമുണ്ട്‌ കീറി പ്രസന്നകുമാര്‍ ആത്മഹത്യ ചെയ്‌തതെന്നാണ്‌ പോലീസ്‌ വിശദീകരണം ആരോഗ്യവാനായ പ്രസന്നകുമാര്‍ ടവല്‍ബാറില്‍ തൂങ്ങി എങ്ങനെയാണ്‌ മരിക്കുന്നതെന്നാണ്‌ സംശയമുള്ളവര്‍ ചോദിക്കുന്നത്‌. പോലീസിന്റെ വിശദീകരണം തൃപ്‌തികരമല്ല. പ്രസന്നകുമാറിനെ മദ്യ വിമുക്ത ചികിത്സയ്‌ക്ക്‌ വേണ്ടിയാണ്‌ നൂറനാട്ടെ ആശുപത്രിയില്‍ പ്രവേശിപ്പിച്ചത്‌. ഇതിലും ദുരൂഹതയുണ്ട്‌. പ്രസന്നകുമാര്‍ കടുത്ത മദ്യപാനിയായിരുന്നില്ലെന്നാണ്‌ അടുപ്പക്കാര്‍ പറയുന്നത്‌.
കടകംപള്ളി ഭൂമി തട്ടിപ്പുകേസില്‍ സലിംരാജിനെ വഴിവിട്ട്‌ സഹായിച്ചവരില്‍ പ്രമുഖനാണ്‌ പ്രസന്നകുമാര്‍ എന്നറിയുന്നു. വിജിലന്‍സ്‌ പ്രസന്നകുമാറിനെ മൂന്നുവട്ടം ചോദ്യം ചെയ്‌തിരുന്നു. ഭൂമി തട്ടിപ്പുമായി ബന്ധപ്പെട്ട കേസിലുള്ള പ്രധാന രേഖകള്‍ ഒപ്പിട്ടത്‌ പ്രസന്നകുമാറാണെന്നാണ്‌ പോലീസിന്റെ കണ്ടെത്തല്‍.ഇതെല്ലാം സലിംരാജിന്‌ വേണ്ടിയായിരുന്നത്രേ. പ്രസന്നകുമാറിനെ സിബിഐയും ചോദ്യം ചെയ്‌തിരുന്നു.
പ്രസന്നകുമാര്‍ ഉള്‍പ്പെടെയുള്ളവരെ പ്രതികളാക്കി സിബിഐ അന്വേഷണം തുടരുമ്പോഴാണ്‌ ദുരൂഹമരണം . ഇതിനിടെ സിബിഐയോട്‌ സര്‍ക്കാര്‍ സഹകരിക്കില്ലെന്ന ആക്ഷേപവുമായി സിബിഐ രംഗത്തെത്തി. കേസ്‌ അന്വേഷിക്കുന്നതിനുള്ള ഭൗതിക സാഹചര്യങ്ങള്‍ പോലും സിബിഐക്ക്‌ സര്‍ക്കാര്‍ നല്‍കുന്നില്ലെന്നാണ്‌ ആരോപണം. സിബിഐ ഡയറക്‌ടറാണ്‌ സര്‍ക്കാരിന്റെ നിസഹകരണത്തിന്റെ കഥ ഹൈക്കോടതിയെ അറിയിച്ചത്‌. സിബിഐ അന്വേഷണത്തിന്‌ ഉത്തരവിട്ടത്‌ ഹൈക്കോടതിയിലാണ്‌. കോടതിയുടെ പ്രതികൂല പരാമര്‍ശം വിളിച്ചു വരുത്തുന്നതാണ്‌ സര്‍ക്കാരിന്റെ നീക്കങ്ങള്‍.
തിരുവനന്തപുരം ആര്‍.സി.ഒ യും ലാന്റ്‌ റവന്യൂ കമ്മീഷണറേറ്റില്‍ അസിസ്റ്റന്റ്‌ സെക്രട്ടറിയുമായിരുന്നു പ്രസന്നകുമാര്‍. കടകംപള്ളി ഭൂമി തട്ടിപ്പു കേസിലെ പ്രതികളാകട്ടെ ആളും അര്‍ത്ഥവും കൊണ്ട് സമ്പന്നരും. അന്വേഷണത്തിനിടയില്‍ ഒരു പ്രധാനപ്രതി ദുരൂഹ സാഹചര്യത്തില്‍ മരിച്ചാല്‍ അത് അന്വേഷിക്കേണ്ടതാണ്‌. എന്നാല്‍ ഉമ്മന്‍ചാണ്ടിയുടെ മുന്‍ ഗണ്‍മാന്‍ ഇടപെട്ട കേസായതിനാല്‍ സര്‍ക്കാര്‍ തൂങ്ങി മരണം അന്വേഷിക്കുമോ എന്ന്‌ കണ്ടറിയണം. ലഹരി വിമുക്ത ചികിത്സയ്‌ക്കായി പ്രസന്ന കുമാര്‍ എങ്ങനെയാണ്‌ നൂറനാട്‌ എത്തിയതെന്നും അന്വേഷിക്കേണ്ടതുണ്ട്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
