ഒറ്റയ്‌ക്ക്‌ നിന്നാല്‍ ഇനി രക്ഷയില്ലെന്ന തിരിച്ചറിവിനെ തുടര്‍ന്ന് കെആര്‍ ഗൗരിയമ്മയുടെ നേതൃത്വത്തിലുളള ജെഎസ്‌എസും സിഎംപിയിലെ അരവിന്ദാക്ഷന്‍ വിഭാഗവും തമ്മില്‍ ലയിക്കാന്‍ ധാരണ. ഈ വര്‍ഷം അവസാനം ലയനം പൂര്‍ത്തിയാകുന്നതോടെ പുതിയ പാര്‍ട്ടിയെ ഇടതുമുന്നണിയില്‍ ഉള്‍പ്പെടുത്താമെന്ന ഉറപ്പും സിപിഎം നേതൃത്വത്തില്‍ നിന്ന്‌ ഇരുകൂട്ടര്‍ക്കും ലഭിച്ചു. ലയനത്തിനു മുന്നോടിയായി അടുത്തമാസം മുതല്‍ ഇരുപാര്‍ട്ടികളും ഒന്നിച്ച്‌ സര്‍ക്കാര്‍ വിരുദ്ധ പ്രക്ഷോഭങ്ങള്‍ സംഘടിപ്പിക്കാനും തീരുമാനിച്ചു. 
ഗൗരിയമ്മ തന്നെയാകും പുതിയ പാര്‍ട്ടിയുടെയും ജനറല്‍ സെക്രട്ടറി. ഗൗരിയമ്മയുടെ നേതൃത്വം അംഗീകരിച്ച്‌ ജെഎസ്‌എസിലേക്കെത്താമെന്ന്‌ അരവിന്ദാക്ഷനും കൂട്ടരും സമ്മതിച്ചതോടെയാണ്‌ ലയന ചര്‍ച്ചകള്‍ യാഥാര്‍ഥ്യത്തിലേക്കടുത്തത്‌. ഇരുപാര്‍ട്ടികളും ഒന്നിച്ചാല്‍ മാത്രം ഇടതുമുന്നണിയില്‍ അംഗത്വമെന്ന സിപിഎം നിലപാടും ലയനതീരുമാനത്തിന്‌ കാരണമായി. 
ആഗസ്‌റ്റില്‍ ആലപ്പുഴയില്‍ നടക്കുന്ന കേരകര്‍ഷക കണ്‍വെന്‍ഷനാകും ഇരുപാര്‍ട്ടികളും തമ്മിലൊന്നിക്കുന്ന ആദ്യ പൊതുവേദി. തുടര്‍ന്ന്‌ ഘട്ടം ഘട്ടമായി ഈ വര്‍ഷം ഡിസംബറോടെ ലയനം പൂര്‍ത്തിയാക്കാനാണ്‌ നിലവിലെ നീക്കം. ലയനം പൂര്‍ത്തിയാക്കിയാല്‍ അടുത്ത വര്‍ഷം നടക്കുന്ന പഞ്ചായത്ത്‌ തെരഞ്ഞെടുപ്പിനു മുമ്പ്‌ പുതിയ പാര്‍ട്ടിക്ക്‌ ഇടതുമുന്നണി അംഗത്വം നല്‍കാമെന്ന ഉറപ്പും സിപിഎം നേതൃത്വം നല്‍കിയതായാണ്‌ സൂചന.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha