ഊഹാപോഹങ്ങള് അവസാനിപ്പിച്ച് എത്രയും വേഗം അന്വേഷണം പൂര്ത്തിയാക്കണമെന്ന് ശശി തരൂര്; ഡോക്ടറുടെ ആരോപണം തള്ളി എയിംസ്
തന്റെ ഭാര്യ സുനന്ദ പുഷ്കറിന്റെ മരണവുമായി ബന്ധപ്പെട്ട അന്വേഷണം എത്രയും വേഗം പൂര്ത്തിയാക്കി ഊഹാപോഹങ്ങള് അവസാനിപ്പിക്കണമെന്ന് ശശി തരൂര് പ്രസ്താവനയില് പറഞ്ഞു. സുനന്ദയുടെ കുടുംബവും താനും അന്വേഷണവുമായി സഹകരിക്കുന്നുണ്ടെന്നും ശശി തരൂര് പറഞ്ഞു.
അതേസമയം ശശി തരൂരിനെതിരായ ഡോ.സുധീര് ഗുപ്തയുടെ ആരോപണം എയിംസ് അധികൃതര് തള്ളി. പോസ്റ്റുമോര്ട്ടം റിപ്പോര്ട്ട് തിരുത്താന് ശശി തരൂര് ഇടപെട്ടിട്ടില്ല. ഇത് സംബന്ധിച്ച എല്ലാ ആരോപണങ്ങളും തെറ്റാണെന്നും എയിംസ് അധികൃതര് വ്യക്തമാക്കി. ഗുപ്തയ്ക്കെതിരെ പരാതി ലഭിച്ചാല് നടപടിയെടുക്കും. ഡോക്ടര്മാരുടെ സ്ഥാനക്കയറ്റം സംബന്ധിച്ച് ഗുപ്തയ്ക്ക് അതൃപ്തി ഉണ്ടായിരുന്നതായും എയിംസ് അധികൃതര് ആരോപിച്ചു. .സുധീര് ഗുപ്തയുടെ വെളിപ്പെടുത്തലില് കേന്ദ്ര ആരോഗ്യമന്ത്രി അന്വേഷണം പ്രഖ്യാപിച്ചതിന് പിന്നാലെയാണ് ആരോപണം നിഷേധിച്ച് എയിംസ് അധികൃതര് രംഗത്തെത്തിയത്.
സുനന്ദ പുഷ്കറിന്റെ മരണം സംബന്ധിച്ച് ഉന്നതതല അന്വേഷണം ആവശ്യപ്പെടുമെന്ന് സുബ്രഹ്മണ്യം സ്വാമി പറഞ്ഞു. ഇക്കാര്യം ഉന്നയിച്ച് പ്രധാനമന്ത്രിക്ക് കത്തെഴുതുമെന്നും അദ്ദേഹം പറഞ്ഞു.
നേരത്തെ പോസ്റ്റ്മോര്ട്ടം റിപ്പോര്ട്ടിലെ യഥാര്ത്ഥ വസ്തുതകള് പുറത്തുവരാതിരിക്കാന് കേന്ദ്രമന്ത്രിയായിരുന്ന ഗുലാംനബി ആസാദ് ഇടപെട്ടുവെന്ന് ഡോ. സുധീര് ഗുപ്ത വെളിപ്പെടുത്തിയിരുന്നു. കേന്ദ്രമന്ത്രിമാരായ ആസാദിന്റേയും തരൂരിന്റേയും ഇടപെടല്മൂലം സത്യസന്ധമായ റിപ്പോര്ട്ട് നല്കാന് തനിക്കായില്ലെന്നും ഗുപ്ത വെളിപ്പെടുത്തുന്നു. കേന്ദ്ര അഡ്മിനിസ്ട്രേറ്റീവ് ട്രിബ്യൂണലിന് നല്കിയ സത്യവാങ്മൂലത്തില് തന്റെ അഭിപ്രായങ്ങള് സീല് ചെയ്ത് സൂക്ഷിക്കാന് ഗുപ്ത അനുമതിതേടിയിരുന്നു.
പോസ്റ്റുമോര്ട്ടം റിപ്പോര്ട്ടില് സ്വാധീനമുപയോഗിച്ചു എന്നതിന് തെളിവായി എയിംസ് ഡയറക്ടര്ക്ക് തരൂര് അയച്ച ഇ-മെയില് സന്ദേശത്തിന്റെ പകര്പ്പും ഗുപ്ത കേന്ദ്ര അഡ്മിനിസ്ട്രേറ്റീവ് ട്രിബ്യൂണലിന് കൈമാറിയിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha