പിണറായി പാര്ലമെന്ററി രംഗത്തേക്ക്; സെക്രട്ടറി സ്ഥാനം ഒഴിയും
പാര്ലമെന്ററി രംഗത്ത് സജീവമാകുന്നതിന്റെ ഭാഗമായി പിണറായി വിജയന് സി.പി.എം സംസ്ഥാന സെക്രട്ടറി സ്ഥാനം ഒഴിയുന്നു. ഇരുപത്തിയൊന്നാം പാര്ട്ടി കോണ്ഗ്രസിന്റെ മുന്നോടിയായി സെപ്തംബറില് നടക്കുന്ന പാര്ട്ടി സമ്മേളനത്തിലാകും സ്ഥാനം ഒഴിയുക. പാര്ട്ടി പദവികളില് മൂന്ന് ടേമില് കൂടുതല് ഇരിക്കാന് പാടില്ലെന്ന് കേന്ദ്രകമ്മിറ്റി തീരുമാനിച്ചിരുന്നു. എന്നാല് അതില് തന്നെ ചിലര്ക്ക് എക്സെപ്ഷന് കൊടുത്തിരുന്നു. അക്കൂട്ടത്തില് പിണറായിയും കാരാട്ടുമൊക്കെ ഉണ്ടായിരുന്നു. പിണറായി നാലാം തവണയാണ് സംസ്ഥാന സെക്രട്ടറി പദത്തില് തുടരുന്നത്.
ലാവ്ലിന് കേസില് നിന്ന് കുറ്റവിമുക്തനായതോടെയാണ് പാര്ലമെന്ററി രംഗത്ത് സജീവമാകാന് പിണറായി തീരുമാനിച്ചത്. അടുത്ത നിയമസഭാ തെരഞ്ഞെടുപ്പില് അദ്ദേഹം മല്സരിക്കും. സി.പി.എമ്മിന്റെ മുഖ്യമന്ത്രി സ്ഥാനാര്ത്ഥിയായിരിക്കുമെന്നാണ് അറിയുന്നത്. പൊളിറ്റ് ബ്യൂറോ അംഗങ്ങളായ എം.എ ബേബിയെയോ, കോടിയേരി ബാലകൃഷ്ണനെയോ സംസ്ഥാന സെക്രട്ടറിയാക്കിയേക്കും. 1998ല് വൈദ്യുതി മന്ത്രിയായിരുന്ന പിണറായി അന്നത്തെ സംസ്ഥാന സെക്രട്ടറി ചടയന് ഗോവിന്ദന് അന്തരിച്ചതിനെ തുടര്ന്നാണ് സെക്രട്ടറി പദം ഏറ്റെടുത്തത്.
അതേസമയം പിണറായി ഒഴിയുന്നതോടെ പാര്ട്ടിയില് വിഭാഗീയത രൂക്ഷമാകുമെന്ന കാര്യം ഉറപ്പാണെന്ന് രാഷ്ട്രീയ നിരീക്ഷകര് വിലയിരുത്തുന്നു. എം.എ.ബേബിയുടെ രാജി പ്രശ്നവും തോമസ് ഐസക്കിന്റെ ഒളിയമ്പുകളും സമ്മേളനങ്ങള് മുന്നില്കണ്ടുകൊണ്ടുളള നീക്കമാണ്. പിണറായി പക്ഷത്തുളള ചിലര് പരോക്ഷമായി എതിര്പ്പുകള് പ്രകടിപ്പിച്ചു തുടങ്ങിയിട്ടുണ്ട്. ലോക്സഭ തെരഞ്ഞെടുപ്പിലേറ്റ പരാജയം ഏറ്റെടുത്ത് ആരും രാജിവയ്ക്കില്ലെന്നും ആ പതിവ് സിപിഎമ്മിനില്ലെന്നും എന്നാല് പാര്ട്ടി കോണ്ഗ്രസിന് മുന്നോടിയായി മാറ്റം ഉണ്ടാവുമെന്നുമാണ് പാര്ട്ടി നേതൃത്വം അറിയിച്ചിരുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha