മംഗലാപുരത്തെ യുവാക്കളുടെ കൊലപാതകം; മൃതദേഹങ്ങള് കണ്ടെടുത്തു
സ്വര്ണക്കള്ളക്കടത്ത് സംഘത്തില്പെട്ട രണ്ടു മലയാളി യുവാക്കളെ മംഗലാപുരത്തു കൊലപ്പെടുത്തിയശേഷം കേരള അതിര്ത്തിയില് കുഴിച്ചിട്ട സംഭവത്തില് മൃതദേഹങ്ങള് കണ്ടെത്തി. കാസര്ഗോഡ് കുണ്ടംകുഴിയില് നിന്നാണ് മൃതദേഹങ്ങള് കണ്ടെടുത്തത്.സ്ഥലത്ത് കര്ണാടക പോലീസ് തെളിവെടുപ്പ് നടത്തി.
തലശേരി സെയ്ദാര്പള്ളി സ്വദേശി ആമീസില് നഫീര് അഹമ്മദ്ജാന് (25), കോഴിക്കോട് കുറ്റിച്ചിറയിലെ ഫഹീം (26) എന്നിവരാണ് കൊല്ലപ്പെട്ടത്. സംഭവത്തില് കാസര്ഗോഡ് ചെര്ക്കളയിലെ മുനാഫത്ത് മുനാഫിര്സനാഫ് (25), കാസര്ഗോഡ് അണങ്കൂര് സ്വദേശികളായ മുഹമ്മദ് ഇര്ഷാദ് (23), മുഹമ്മദ് സഫ്വാന് (24) എന്നിവരെ പോലീസ് അറസ്റ്റ് ചെയ്തിരുന്നു.
മംഗലാപുരത്തു നിന്നുള്ള പോലീസ് സംഘത്തിന്റെയും കൊല്ലപ്പെട്ടവരുടെ ബന്ധുക്കളുടെയും സാന്നിധ്യത്തിലാണ് മൃതദേഹങ്ങള് പുറത്തെടുത്തത്. തലശേരിയില്നിന്നു നഗരസഭാ കൗണ്സിലര് ടി.സി. ഖിലാബ്, എരഞ്ഞോളി ഗ്രാമപഞ്ചായത്ത് അംഗം മൊയ്തു എന്നിവരുടെ നേതൃത്വത്തില് നഫീറിന്റെ ബന്ധുക്കളും കുറ്റിച്ചിറയില് നിന്ന് ഫഹീമിന്റെ ബന്ധുക്കളും കുണ്ടംകുഴിയില് എത്തിയിരുന്നു. മജിസ്ട്രേറ്റിന്റെ സാന്നിധ്യത്തില് പുറത്തെടുത്ത മൃതദേഹം അവിടെവച്ചു തന്നെ പോസ്റ്റ്മോര്ട്ടം നടത്താനാണ് പോലീസ് ശ്രമം നടത്തുന്നത്.
സ്വര്ണക്കടത്തുമായി ബന്ധപ്പെട്ട് ആറു മാസം മുമ്പ് കാണാതായ നഫീറും ഫഹീമും പാണ്ടേശ്വരം പോലീസ് സ്റ്റേഷന് പരിധിയിലെ അപ്പാവറില് വീട് വാടകയ്ക്ക് എടുത്ത് ഒളിവില് കഴിഞ്ഞു വരികയായിരുന്നു. ഈ വീട്ടില് വച്ചു തന്നെയാണ് ഇരുവരെയും പ്രതികള് കൊലപ്പെടുത്തിയത്. തുടര്ന്ന് മൃതദേഹം കാസര്ഗോഡ് കുണ്ടംകുഴിയില് കുഴിച്ചിട്ടതായിട്ടാണ് തെളിഞ്ഞിട്ടുള്ളത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha