മുഖ്യമന്ത്രി ഉമ്മന്‍ ചാണ്ടി ആഗോള ശ്രദ്ധ നേടുകയാണ്‌. ലോകത്തെമ്പാടും ആരാധകരുള്ള ബ്രസീല്‍ താരം നെയ്‌മറെ ചികിത്സിക്കാനുള്ള ദൗത്യം ഏറ്റെടുക്കുമെന്നുള്ള മുഖ്യമന്ത്രിയുടെ ഓഫീസില്‍ നിന്നുള്ള അറിയിപ്പാണ്‌ കാട്ടു തീ പോലെ പടര്‍ന്നത്‌.
നെയ്‌മര്‍ക്കായി ബ്രസീല്‍ ഫുട്‌ബാള്‍ ഫെഡറേഷന്‍ കേരളത്തിലെ ആയൂര്‍വേദ ചികിത്സയുടെ സാധ്യതകള്‍ തേടിയെന്നായിരുന്നു വാര്‍ത്ത. മുഖ്യമന്ത്രിയുടെ ഓഫീസ്‌ വഴിയാണ്‌ ചികിത്സാ സാധ്യത തേടിയതെന്നും പ്രചരിച്ചു. തുടര്‍ന്ന്‌ മുഖ്യമന്ത്രി ആരോഗ്യമന്ത്രി, ആരോഗ്യവകുപ്പ്‌ ഡയറക്‌ടര്‍, ആയുര്‍വേദ കോളേജ്‌ പ്രിന്‍സിപ്പല്‍ എന്നിവരുമായി ചര്‍ച്ച നടത്തിയെന്നും വാര്‍ത്ത വന്നു.
മുഖ്യമന്ത്രിയുടെ നിര്‍ദ്ദേശപ്രകാരം തിരുവനന്തപുരം ആയുര്‍വേദ കോളേജ്‌ പ്രിന്‍സിപ്പല്‍ ഡോ. പി അശോക്‌ പരിക്ക്‌ ഭേദമാകാനുള്ള സാധ്യതയെ കുറിച്ചുള്ള റിപ്പോര്‍ട്ട്‌ മുഖ്യമന്ത്രിക്ക്‌ സമര്‍പ്പിച്ചു.  

നെയ്‌മറിന് ചികില്‍സ നല്‍കാമെന്ന്‌ തിരുവനന്തപുരം ആയുര്‍വേദ കോളജ്‌ അധികൃതര്‍. മൂന്നാഴ്‌ച ബ്രസീലിലും 30 ദിവസം കേരളത്തിലും ചികില്‍സ വേണ്ടിവരും എന്നാണ്‌ പറയുന്നത്‌. അടുത്ത മന്ത്രിസഭായോഗം ഇക്കാര്യം ചര്‍ച്ച ചെയ്യും.

ഈ റിപ്പോര്‍ട്ട്‌ വിലയിരുത്തിയ ശേഷമായിരിക്കും ബ്രസീല്‍ നെയ്‌മറെ കേരളത്തിലേക്ക്‌ അയയ്‌ക്കണമോ എന്ന കാര്യത്തില്‍ തീരുമാനമെടുക്കുകയുള്ളൂ എന്നും പറയുന്നുണ്ട്‌. നെയ്‌മറെ എത്തിച്ചാല്‍ മൂന്നാഴ്‌ച്ച കൊണ്ട്‌ കുട്ടപ്പനാക്കി വിടാമെന്നാണ്‌ പറയുന്നത്‌. നെയ്‌മറിന്‌ ആയുര്‍വേദ ചികിത്സ നല്‍കാന്‍ തീരുമാനിച്ചാല്‍ നെയ്‌മറെ കേരളത്തിലെത്തിക്കുമെന്ന്‌ കരുതുന്നു.
എന്തായാലും ഈ വാര്‍ത്ത ആരാധകര്‍ ആവേശത്തോടെയാണ്‌ കാണുന്നത്‌. സോഷ്യല്‍ മീഡിയകളില്‍ ഇത്‌ വന്‍ ചര്‍ച്ചയാകുകയും ചെയ്‌തു. ഇതിനിടെ ഇത്‌ ഉമ്മന്‍ചാണ്ടിയുടെ മറ്റൊരു പബ്ലിസിറ്റി സ്റ്റണ്ടാണെന്നും വിമര്‍ശിക്കുന്നുണ്ട്‌. ബ്രസീലില്‍ നിന്നല്ല സംസ്ഥാന ഫുട്‌ബോള്‍ അസോസിയേഷനില്‍ നിന്നാരോ മുന്നോട്ടു വച്ച ഒരു നിര്‍ദ്ദേശമാണിതെന്നും പറയപ്പെടുന്നു.
എന്തായാലും കാത്തിരുന്ന്‌ കാണാം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha