വനിതാ പോലീസ് ചമഞ്ഞ് രണ്ടരലക്ഷത്തിന്റെ സ്വര്ണം കവര്ന്ന രണ്ട് സ്ത്രീകള് അറസ്റ്റില്
വനിതാ പോലീസ് ചമഞ്ഞ് ജുവലറിയില് നിന്ന് രണ്ടരലക്ഷം രൂപയുടെ സ്വര്ണ്ണാഭരണങ്ങള് തട്ടിയെടുത്ത രണ്ട് സ്ത്രീകള് പിടിയിലായി. മരട് നഗരസഭയില് മൂന്നാംവാര്ഡില് വാടകയ്ക്ക് താമസിക്കുന്ന കുമ്പളങ്ങി സ്വദേശിനി സിനി(39) അങ്കമാലി ദേവഗിരി മേനാച്ചേരി വീട്ടില് വര്ഗീസിന്റെ ഭാര്യ ഷൈല വര്ഗീസ് (44) എന്നിവരാണ് അറസ്റ്റിലായത്. തേവര ധനലക്ഷ്മി ജൂവലറിയില് നിന്നാണ് ആഭരണങ്ങള് തട്ടിയെടുത്തത്.
രണ്ടു പേരും ജൂവലറിയില് എത്തിയശേഷം തേവര സ്റ്റേഷനിലെ പോലീസുകാരാണെന്ന് പറഞ്ഞ് സ്വയം പരിചയപ്പെടുത്തുകയും പണം പിന്നെ തരാമെന്ന വ്യവസ്ഥയില് സ്വര്ണം ഇവര് ആവശ്യപ്പെട്ടു. എന്നാല് ജൂവലറി ഉടമ അതിന് തയ്യാറായില്ല. വൈകുന്നേരം എസ്.ഐയെയും കൂട്ടി വരാമെന്നായിരുന്നു ഇരുവരുടെയും മറുപടി. സാധാരണ പോലീസിനെ ആരും വെറുപ്പിക്കില്ലെന്ന് ഭീഷണി സ്വരത്തില് പറഞ്ഞിട്ട് സിനി ഫോണെടുത്ത് എസ്ഐയോടെന്ന നിലയില് സംസാരിച്ചു. അതുകേട്ട ഉടമ ഉടനെ രണ്ടുപേര്ക്കുമായി രണ്ടരലക്ഷം രൂപയുടെ സ്വര്ണം കൊടുത്തു. ദിവസങ്ങള്ക്കുശേഷം പണം കിട്ടാതെ വന്നപ്പോള് ഉടമ സിനിയെ ഫോണില് വിളിച്ചു. അപ്പോള് താന് ട്രെയിനിംഗിന് തിരുവനന്തപുരത്താണെന്നും വന്നാലുടന് തരാമെന്നും പറഞ്ഞു. ഒരുമാസം കഴിഞ്ഞ് വിളിച്ചപ്പോള് കേസുമായി ബന്ധപ്പെട്ട് മുംബൈയിലാണെന്നു പറഞ്ഞു. പിന്നീട് വിളിച്ചപ്പോള് ഫോണ് സ്വിച്ച് ഓഫ് ആയിരുന്നു. ഇതില് സംശയം തോന്നിയ ഉടമ തേവര സ്റ്റേഷനിലെത്തി സിനി എന്ന പോലീസുകാരിയെ തിരക്കിയപ്പോഴാണ് താന് കബളിപ്പിക്കപ്പെട്ടതായി അറിഞ്ഞത്.
ഉടമ നല്കിയ പരാതിയില് പോലീസ് കേസ് രജിസ്റ്റര് ചെയ്ത് ഡെപ്യൂട്ടി കമ്മീഷണര് നിശാന്തിനിയുടെ നേതൃത്വത്തില് അന്വേഷണമാരംഭിച്ചു. അപ്പോഴാണ് സിനി പല കേസുകളില് പ്രതിയാണെന്നും ഷൈല കഴിഞ്ഞ എട്ടു വര്ഷമായി സിനിയോടൊപ്പമുണ്ടെന്നും അറിഞ്ഞത്. ജുവലറി ഉടമയുടെ കൈയ്യില് നിന്ന് തട്ടിയെടുത്ത സ്വര്ണം ഷൈലയുടെ മകളുടെ കല്യാണആവശ്യത്തിനായി ഉപയോഗിച്ചെന്ന് ഇവര് പോലീസിനോട് പറഞ്ഞു. പ്രതികളെ കോടതിയില് ഹാജരാക്കി റിമാന്ഡു ചെയ്തു.
https://www.facebook.com/Malayalivartha