സഭാ നേതൃത്വം പൊറുക്കുക... വളര്ത്തി വലുതാക്കി ജയിപ്പിച്ച ഇടുക്കി എംപി ജോയ്സ് ജോര്ജ് വഴിപിരിയുന്നു
ഇടുക്കി സഭാ നേതൃത്വത്തിന്റെ ആശീര്വാദത്തോടെയും ഹൈറേഞ്ച് സംരക്ഷണ സമിതിയുടെ പിന്തുണയോടെയും ഇടുതുപക്ഷ സ്വതന്ത്രനായി മത്സരിച്ച് വിജയിച്ച ജോയ്സ് ജോര്ജ് എം.പി. സഭാ നേതൃത്വവുമായി വഴി പിരിയുന്നു. നേരത്തെയുണ്ടായിരുന്ന ചില അഭിപ്രായ വ്യത്യാസങ്ങള് കഴിഞ്ഞ ദിവസത്തോടെ മറ നീക്കി പുറത്താവുകയായിരുന്നു. നരേന്ദ്ര മോഡി സര്ക്കാരിന്റെ ബജറ്റിനെപ്പറ്റിയുള്ള അവലോകനത്തില് സഭാ നേതൃത്വവും ജോയ്സ് ജോര്ജും രണ്ടു തട്ടിലായി.
സഭയുടെ സ്വന്തം ആളായി നിന്നു ജയിച്ച ജോയ്സ് ജോര്ജ് സഭാ നേതൃത്വത്തിന് വിരുദ്ധമായി പൂര്ണമായും ഇടതുപക്ഷത്തിന്റെ ആളായി ബജറ്റിനെ രൂക്ഷമായി വിമര്ശിച്ചു. തീര്ത്തും നിരാശാജനകമായ ബജറ്റാണെന്നാണ് ജോയ്സിന്റെ പ്രതികരണം. കാര്ഷിക ടൂറിസം മേഖലകളെ ബജറ്റ് തീര്ത്തും അവഗണിച്ചതായി ജോയ്സ് പറഞ്ഞു.
അതേസമയം മോഡി സര്ക്കാരിന്റെ ആദ്യ ബജറ്റ് കാര്ഷിക മേഖലയ്ക്കും യുവ ജനങ്ങള്ക്കും ധാരാളം പ്രതീക്ഷകള് നല്കുന്നുവെന്ന് കെ.സി.വൈ.എം ഇടുക്കി രൂപതാ ഡയറക്ടര് ജോസഫ് പൗവ്വത്തില് പ്രതികരിച്ചു. യുവ ജനങ്ങളുടേയും കാര്ഷിക മേഖലയുടേയും പ്രശ്നങ്ങള് പരിഹരിക്കുന്നതിനും ഇന്ധന രാസവള മേഖലകളിലെ പ്രതിസന്ധി പരിഹരിക്കുന്നതിനും ധാരാളം പദ്ധതികള് ബജറ്റിലുണ്ട്. വികസന കാര്യത്തില് വളരെ താത്പര്യമുള്ള പ്രധാനമന്ത്രിയായിട്ടാണ് നരേന്ദ്രമോഡിയെ കാണുന്നത്. അതിന്റെ ഭാഗമാണ് 100 സ്മാര്ട്ട് സിറ്റികള് സ്ഥാപിക്കുമെന്ന് ബജറ്റില് പ്രഖ്യാപിച്ചിട്ടുള്ളത്. സ്ത്രീ സുരക്ഷയ്ക്ക് പ്രത്യേക പ്രാധാന്യവും നല്കുന്നുണ്ട്.
ഹൈറേഞ്ച് സംരക്ഷണ സമിതിയുടെ വേദികളില് നിറഞ്ഞു നിന്ന കെ.സി.വൈ.എം. ഡയറക്ടറുടെ മോഡിയെ അഭിനന്ദിച്ചു കൊണ്ടുള്ള ഈ അഭിപ്രായം വരും നാളുകളില് ഇടുക്കിയിലെ രാഷ്ട്രീയത്തെ കാര്യമായി സ്വാധീനിക്കും. അതേസമയം സഭാ നേതൃത്വത്തിന്റെ അഭിപ്രായം മാനിക്കാതെ തനി സിപിഎംകാരനായി മോഡിയെ കണ്ണുമടച്ച് എതിര്ത്തതില് സഭാ നേതൃത്വം ജോയ്സ് ജോര്ജിനെതിരെ തിരിഞ്ഞിരിക്കുകയാണ്. ഹൈറേഞ്ച് സംരക്ഷണ സമിതിയുടെ പ്രതിനിധിയായിട്ടാണ് ജോയ്സിനെ മത്സരിപ്പിച്ചത്. വിജയം സുനിശ്ചിതമായ ജോയ്സിനെ ഇടതുപക്ഷം പിന്തുണച്ചെന്നു മാത്രം. എന്നാല് ജയിച്ചു കഴിഞ്ഞ് ആദ്യത്തെ പാര്ലമെന്റ് സമ്മേളന കാലയളവില് തന്നെ സഭയ്ക്കും ഹൈറേഞ്ച് സംരക്ഷണ സമിതിയ്ക്കും ജോയ്സ് അനഭിമതനാകുന്നു. ഇനി കാത്തിരുന്ന് കാണാം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha