തിരുവല്ല മുനിസിപ്പല്‍ ബസ്‌ സ്റ്റാന്‍ഡില്‍ നിന്നു കാണാതായ മൂന്ന്‌ വയസുള്ള പെണ്‍കുട്ടിയെ വീട്ടുകാര്‍ക്ക്‌ തിരിച്ചു കിട്ടി. ജനുവരി 19നാണ്‌ കുട്ടിയെ കാണാതായത്‌. കുട നന്നാക്കുന്ന ജോലി ചെയ്യുന്ന പിതാവിനും മാതാവിനും ഒപ്പം ഉറങ്ങിക്കിടക്കുകയായിരുന്നു കുട്ടി. ക്ഷീണം കൊണ്ട്‌ ഉറങ്ങിപ്പോയ അച്ഛനും അമ്മയും ഞെട്ടിയുണര്‍ന്നു നോക്കുമ്പോള്‍ അമ്മക്കു സമീപം കിടന്നുറങ്ങുകയായിരുന്ന കുട്ടിയെ കണ്ടില്ല. സമീപത്തുണ്ടായിരുന്ന സ്‌ത്രീയേയും കണാതായതോടെ അവര്‍ക്ക്‌ ആധിയായി.
തുടര്‍ന്ന്‌ ഈ സ്‌ത്രീയെക്കുറിച്ചുള്ള വിവരണങ്ങള്‍ സഹിതം തിരുവല്ല പോലീസിനു പരാതി നല്‍കി. ആറു മാസത്തോളം അന്വേഷണം നടന്നെങ്കിലും കുട്ടിയെ കിട്ടിയില്ല.
ഇതിനിടെ കഴിഞ്ഞ വ്യാഴാഴ്‌ചയാണു തിരുവനന്തപുരം റെയില്‍വേ സ്റ്റേഷനില്‍ ഭിക്ഷാടനം നടത്തുന്ന ആന്ധ്ര സ്വദേശികളായ ദമ്പതികളേയും ഒരു കുട്ടിയേയും ചൈല്‍ഡ്‌ ലൈന്‍ പ്രവര്‍ത്തകര്‍ കണ്ടത്‌. ആണ്‍കുട്ടിയുടെ വേഷം ധരിച്ചു ഭിക്ഷയെടുക്കുകയായിരുന്നു ആ കുട്ടി. സംശയം തോന്നിയ ചൈല്‍ഡ്‌ ലൈന്‍ പ്രവര്‍ത്തകര്‍ ഇവരെ ചൈല്‍ഡ്‌ ലൈനിലേക്കു കൂട്ടിക്കൊണ്ടു പോവുകയായിരുന്നു. കുട്ടി തന്റേതാണെന്നായിരുന്നു ഇവര്‍ വാദിച്ചത്‌. കുട്ടിയോടു ചോദിച്ചപ്പോഴും ആദ്യമൊക്കെ അമ്മയെന്നാണു പറഞ്ഞത്‌. എന്നാല്‍, മാറ്റിനിര്‍ത്തി ചോദിച്ചപ്പോള്‍ അമ്മയല്ലെന്നു കുട്ടി പറഞ്ഞു. തുടര്‍ന്ന്‌ കുട്ടിയുടെ ജനന സര്‍ട്ടിഫിക്കറ്റ്‌ ചോദിച്ചെങ്കിലും ഇവര്‍ ഒഴിഞ്ഞുമാറുകയും അടുത്ത ദിവസമെത്തിക്കാമെന്നു പറഞ്ഞു രക്ഷപ്പെടുകയുമായിരുന്നു.
തുടര്‍ന്ന്‌ പ്രവര്‍ത്തകര്‍ കുട്ടിയെ തൈക്കാട്‌ ശിശുക്ഷേമസമിതിയിലേക്കു മാറ്റുകയായിരുന്നു. പോലീസ്‌ നടത്തിയ അന്വേഷണത്തില്‍ ആന്ധ്ര സ്വദേശികളായ ചെട്ടിയമ്മാളും ഭര്‍ത്താവും പിടിയിലായി.
ചൈല്‍ഡ്‌ലൈന്‍ പ്രവര്‍ത്തകരുമായി ബന്ധപ്പെട്ട പോലീസ്‌ രക്ഷിതാക്കള്‍ നല്‍കിയ ഫോട്ടോയുടെ സഹായത്തോടെ കുട്ടിയെ തിരിച്ചറിഞ്ഞു. ഇന്നലെ ഉച്ചയോടെ കുട്ടിയുടെ പിതാവുമായി തലസ്ഥാനത്തെത്തിയ തിരുവല്ല പോലീസിനു കുട്ടിയെ കൈമാറി. കുട്ടിയെ ഇന്നു കോടതിയില്‍ ഹാജരാക്കിയശേഷം മാതാപിതാക്കളോടൊപ്പം വിടുമെന്നു പോലീസ്‌ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha