കുട്ടികടത്ത്; അന്വേഷണ റിപ്പോര്ട്ട് വെള്ളിയാഴ്ച്ച സമര്പ്പിക്കണമെന്ന് ഹൈക്കോടതി
ഉത്തരേന്ത്യന് കുട്ടികളെ കേരളത്തിലെ അനാഥാലയങ്ങളിലേക്ക് കൊണ്ടുവന്ന സംഭവത്തില് അന്വേഷണം നിലച്ചോയെന്ന് ഹൈക്കോടതി. ഇപ്പോള് ഇതുസംബന്ധിച്ച വാര്ത്തകള് കേള്ക്കുന്നില്ലെന്നും കോടതി പറഞ്ഞു. സംഭവത്തിലെ അന്വേഷണ റിപ്പോര്ട്ട് വെള്ളിയാഴ്ച്ച സമര്പ്പിക്കണമെന്നും കോടതി നിര്ദേശിച്ചു. വിഷയത്തില് ഓര്ഫനേജ് അസോസിയേഷന് അമിതമായ ഉത്കണ്ഠയുണ്ടെന്ന് പറഞ്ഞ ഹൈക്കോടതി ആര്ക്ക് വേണ്ടിയാണ് കുട്ടികളെ കടത്തിയതെന്നും ചോദിച്ചു.
അതേസമയം, കുട്ടികളെ കൊണ്ടുവന്ന സംഭവത്തില് സമഗ്ര അന്വേഷണം വേണമെന്ന് ഹൈക്കോടതി നിയോഗിച്ച അമിക്കസ് ക്യൂറി കോടതിയില് അറിയിച്ചു. മുക്കം, വെട്ടത്തൂര് അനാഥശാലകളില് നിന്ന് കണ്ടെത്തിയ രേഖകള് വ്യാജമാണെന്നും അമിക്കസ് ക്യൂറി സമര്പ്പിച്ച റിപ്പോര്ട്ടില് പറയുന്നു. മറ്റൊരു ഏജന്സി അന്വേഷണം നടത്തണമെന്നും അമിക്കസ് ക്യൂറി ഹൈക്കോടതിയെ അറിയിച്ചു. കുട്ടികളെ അനുഗമിച്ചവര്ക്ക് ക്രിമിനല് പശ്ചാത്തലമുണ്ടോ എന്ന് അന്വേഷിക്കണം.
അന്യ സംസ്ഥാനങ്ങളില് നിന്ന് കുട്ടികളെ അനാഥാലയങ്ങളിലേക്ക് കൊണ്ടു വരുമ്പോള് പാലിക്കേണ്ട ബാലനീതി നിയമങ്ങള് പാലിച്ചിട്ടില്ല. കുട്ടികളെ എന്തിന് കൊണ്ടു വന്നു എന്ന കാര്യം ഇപ്പോഴും ദുരൂഹമാണെന്നും അമിക്കസ് ക്യൂറി സമര്പ്പിച്ച റിപ്പോര്ട്ടില് പറയുന്നു. കഴിഞ്ഞ മെയ് 24 നാണ് പാലക്കാട് റെയില്വേ സ്റ്റേഷനില് വെച്ച് പോലീസ് 466 ഓളം കുട്ടികളെ കണ്ടെത്തിയത്. കോഴിക്കോട് ജില്ലയിലെ മുക്കം, മലപ്പുറം ജില്ലയിലെ വെട്ടത്തൂര് അനാഥാലയങ്ങളിലേക്കായിരുന്നു കുട്ടികളെ കൊണ്ടുവന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha