ഹിറ്റ്‌മേക്കര്‍ ശശികുമാര്‍ അന്തരിച്ചു
മലയാള സിനിമയുടെ ഹിറ്റ്‌മേക്കറും ജെ.സി ഡാനിയേല്‍ പുരസ്‌കാര ജേതാവുമായ സംവിധായകന്‍ ശശികുമാര്‍(89) അന്തരിച്ചു. വാര്‍ദ്ധക്യസഹജമായ അസുഖത്തെ തുടര്‍ന്ന്‌ ഇന്നലെ ഉച്ചയോടെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ച അദ്ദേഹത്തിന്റെ നില വൈകുന്നേരത്തോടെ ഗുരുതരമായി. വൃക്കയിലെ അണുബാധയാണ്‌ മരണകാരണം. സംസ്‌കാരം നാളെ ആലപ്പുഴ തത്തംപ്പള്ളി പള്ളിയില്‍ നടക്കും. മൃതദേഹം ഇന്ന് എറണാകുളം ടി.ഡി.എം ഹാളില്‍ പൊതുദര്‍ശനത്തിനു വയ്‌ക്കും. ഭാര്യ ത്രേസ്യാമ്മ മക്കള്‍: ഉഷാതോമസ്‌, ജോര്‍ജ്‌ ജോണ്‍,ഷീലാ റോബിന്‍
പ്രേമനസീര്‍ നായകനായ ജീവിതയാത്ര എന്ന സിനിമയോടെ ശശികുമാര്‍ മലയാള സിനിമയുടെ അവിഭാജ്യഘടകമായി മാറി. ശശികുമാര്‍-പ്രേമനസീര്‍ ടീം മലയാള സിനിമാ വാണിജ്യ വിജ.യത്തിന്റെ ഘടകങ്ങളായി. 141 സിനിമകള്‍ സംവിധാനം ചെയ്‌ത ശശികുമാറിന്റെ 87 ചിത്രങ്ങളില്‍ പ്രേംനസീറായിരുന്നു നായകന്‍. 47 ചിത്രങ്ങളില്‍ നായിക ഷീലയും. ഡോളര്‍ ചിത്രമാണ്‌ അവസാനം സംവിധാനം ചെയ്‌തത്‌. റസ്റ്റ്‌ഹൗസ്‌, ലങ്കാദഹനം, രക്തപുഷ്‌പം, സേതുബന്ധം, പഞ്ചവടി, പത്മവ്യൂഹം, പിക്‌നിക്‌, ചട്ടമ്പി കല്യാണി, മിനിമോള്‍, ജയിക്കാനായി ജനിച്ചവന്‍, വിഷുക്കണി,യുദ്ധം, ആട്ടക്കലാശം , തീനാളങ്ങള്‍ എന്നിവയാണ്‌ പുതിയ ചിത്രങ്ങള്‍.
നെഗറ്റീവ്‌ റോളുകളില്‍ നിന്ന് മാറി മോഹന്‍ലാല്‍ നായകനാക്കി അഭിനയിച്ച ആദ്യ സിനിമയാണ്‌ ആട്ടക്കലാശം.
മലയാള സിനിമാ മേഖലയ്‌ക്ക്‌ നല്‍കിയ സമഗ്ര സംഭാവന പരിഗണിച്ച്‌ 2012 ലാണ്‌ ജെ.സി. ഡാനിയേല്‍ പുരസ്‌കാരം ലഭിച്ചത്‌.
https://www.facebook.com/Malayalivartha
