ജി. കാര്‍ത്തികേയന്‍ നിയമസഭാ സ്‌പീക്കര്‍ സ്ഥാനമൊഴിയുന്നു. സ്ഥാനമൊഴിയാന്‍ ആഗ്രഹിക്കുന്നതായി അദ്ദേഹം തിരുവനന്തപുരത്ത്‌ വാര്‍ത്താസമ്മേളനത്തില്‍ അറിയിച്ചു. സ്‌പീക്കര്‍ പദവി ഒഴിയണമെങ്കില്‍ പാര്‍ട്ടിയുടെ അനുവാദം വേണം. സ്ഥാനമൊഴിയാനുള്ള അനുവാദം നല്‌കണമെന്ന്‌ പാര്‍ട്ടി നേതാക്കളെ കണ്ട്‌ ആവശ്യപ്പെട്ടു. തന്റെ തീരുമാനം പാര്‍ട്ടി നിലപാടുകള്‍ക്കു വിധേയമായിരിക്കുമെന്നും അദ്ദേഹം അറിയിച്ചു.
മുഖ്യമന്ത്രി ഉമ്മന്‍ ചാണ്ടിയെയും കെപിസിസി പ്രസിഡന്റ്‌ വി.എം. സുധീരനെയും മുന്‍ കേന്ദ്രമന്ത്രി എ.കെ. ആന്റണിയെയും രാജിസന്നദ്ധത അറിയിച്ചിരുന്നു. സജീവരാഷ്‌ട്രീയത്തിലേക്കു വരാന്‍ താന്‍ ആഗ്രഹിക്കുന്നുവെന്നും അദ്ദേഹം പറഞ്ഞു.
തനിക്ക്‌ എല്ലാ സ്ഥാനങ്ങളും നല്‌കിയത്‌ പാര്‍ട്ടിയാണ്‌. അതിനാല്‍ പാര്‍ട്ടിയോട്‌ എല്ലാ കാര്യങ്ങളിലും കടപ്പെട്ടിരിക്കുന്നു. ഒരു പദവിക്കും വേണ്ടിയല്ല സ്ഥാനമൊഴിയല്‍. തനിക്ക്‌ അനുകൂലമായ തീരുമാനം പാര്‍ട്ടി സ്വീകരിക്കുമെന്ന്‌ പ്രതീക്ഷിക്കുന്നതായും അദ്ദേഹം അറിയിച്ചു.
നിയമസഭാസമ്മേളനം കഴിഞ്ഞാലുടന്‍ ജി. കാര്‍ത്തികേയന്‍ സ്‌പീക്കര്‍ സ്ഥാനമൊഴിയുമെന്നും രാജിസന്നദ്ധത അദ്ദേഹം മുഖ്യമന്ത്രിയെയും പാര്‍ട്ടി നേതൃത്വത്തെയും അറിയിച്ചതായും വാര്‍ത്തകള്‍ പുറത്തുവന്നിരുന്നു. വ്യാഴാഴ്‌ചയാണ്‌ നിയമസഭാ സമ്മേളനം അവസാനിച്ചത്‌. അതേസമയം, ജി. കാര്‍ത്തികേയന്‍ സ്‌പീക്കര്‍ സ്ഥാനം ഒഴിയുന്നതിനെക്കുറിച്ച്‌ അറിയില്ലെന്നും അത്തരം ചര്‍ച്ചകള്‍ പാര്‍ട്ടിയില്‍ നടന്നിട്ടില്ലെന്നുമാണ്‌ വി.എം. സുധീരന്‍ അന്നു പറഞ്ഞത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha