സേവനാവകാശ നിയമം എവിടെ? സോറി; പോയിപോച്ച്‌
സംസ്ഥാനത്ത്‌ സേവനാവകാശനിയമം അട്ടിമറിക്കപ്പെട്ടു. ഉമ്മന്‍ചാണ്ടി സര്‍ക്കാര്‍ കൊട്ടിഘോഷിച്ചുകൊണ്ടിരുന്ന സേവനാവകാശ നിയമം അട്ടിമറിച്ചത്‌ സംസ്ഥാനത്തെ ഉദ്യോഗസ്ഥരാണ്‌. വിവരാവകാശനിയമം പോലെ മികച്ചതാകുമെന്ന്‌ പ്രതീക്ഷിച്ച സേവനാവകാശ നിയമത്തെക്കുറിച്ച്‌ ആരും ഒന്നും മിണ്ടുന്നില്ല. വര്‍ഷങ്ങളായി ഫയലിനുമേല്‍ അടയിരിക്കുന്ന ഉദ്യോഗസ്ഥര്‍ സേവനാവകാശത്തെ മാത്രമല്ല അതുകൊണ്ടുവന്ന ഉമ്മന്‍ചാണ്ടിയേയും വെല്ല്‌ വിളിച്ച്‌ രാജവെമ്പാലമാരായി ഫയലുകള്‍ക്കുമേല്‍ കുത്തിയിരിക്കുന്നു. മുഖ്യമന്ത്രി ഫയല്‍ വിളിച്ചാല്‍ പോലും ഉദ്യോഗസ്ഥര്‍ നല്‍കുന്നില്ല. കഴിഞ്ഞദിവസം ഉദ്ദ്യോഗസ്ഥരെക്കുറിച്ച്‌ മുന്‍മന്ത്രി തോമസ്‌ ഐസക്‌ മാതൃഭൂമി ദിനപത്രത്തില്‍ എഴുതിയ \'ചുവപ്പുനാട\' എന്ന കോളം ഉദ്ദ്യോഗസ്ഥ-ഭരണതലങ്ങളില്‍ വലിയ ചര്‍ച്ചയ്‌ക്ക്‌ വഴിവച്ചു. മന്ത്രിമാരുടെ നിര്‍ദേശങ്ങള്‍ പോലും അനുസരിക്കാത്ത ഐ.എ.എസുകാര്‍ മാത്രമല്ല ക്ലാര്‍ക്കുമാര്‍ പോലും സര്‍ക്കാര്‍ പറയുന്നത്‌ അനുസരിക്കുന്നില്ലെന്നാണ്‌ സത്യം.
ഭരണനേതൃത്വത്തിന്‌ മീതെ കളിക്കുന്ന ഉദ്ദ്യോഗസ്ഥരെ പൂട്ടാന്‍വേണ്ടികൊണ്ടുവന്ന നിയമം ഉദ്ദ്യോഗസ്ഥര്‍തന്നെ അട്ടിമറിച്ച കാര്യം മുഖ്യമന്ത്രിപോലും അറിഞ്ഞിട്ടില്ല. സര്‍ക്കാരിന്റെ പുന:സംഘടനയ്‌ക്കല്ല പാവങ്ങളുടെ അത്താഴത്തിനാണ്‌ പ്രാധാന്യം നല്‍കേണ്ടതെന്ന്‌ ടി.എന്‍.പ്രതാപന്‍ എം.എല്‍.എയുടെ പ്രസ്‌താവനയ്‌ക്ക്‌ പിന്നാലെയാണ്‌ ഐസക്കിന്റെ ലേഖനം വന്നത്‌. ആരുപറഞ്ഞാലും ഉദ്ദ്യോഗസ്ഥര്‍ കേള്‍ക്കില്ലെന്ന്‌ ഉമ്മന്‍ചാണ്ടിക്കറിയാം. ഉദ്ദ്യോഗസ്ഥരെ ഭരണനേതൃത്വം അനുസരിക്കണം എന്നാണ്‌ നിലപാട്‌. അതേസമയം സ്വന്തം കാര്യം വന്നാല്‍ ഉദ്ദ്യോഗസ്ഥര്‍ കൈയ്യും മെയ്യും മറന്ന്‌ അതിനുവേണ്ടി നിലകൊളളും.
യു.ഡി.എഫ്‌ സര്‍ക്കാരിലുളള മന്ത്രിമാരെ ഉദ്ദ്യോഗസ്ഥര്‍ ഭയക്കുന്നില്ല. ഇതുതന്നെയാണ്‌ യഥാര്‍ത്ഥപ്രശ്‌നം. അതേസമയം കഴിഞ്ഞ സര്‍ക്കാരിലുളള മന്ത്രിമാരെ ഉദ്ദ്യോഗസ്ഥര്‍ക്ക്‌ ഭയമായിരുന്നു. അതിനാല്‍ അവര്‍ മന്ത്രിമാരെ വെറുപ്പിച്ചിരുന്നില്ല. മന്ത്രമാര്‍ക്കെതിരെ തിരിയുന്ന ഉദ്ദ്യോഗസ്ഥര്‍ക്കെതിരെ കഴിഞ്ഞ സര്‍ക്കാര്‍ ശക്തമായ നടപടികളും സ്വീകരിച്ചിരുന്നു. എന്നാല്‍ ഇപ്പോള്‍ ഇതൊന്നും നടക്കുന്നില്ല.
സേവനാവകാശ നിയമം ജനിക്കും മുമ്പേമരിച്ചു. മുഖ്യമന്ത്രിയുടെ താത്‌പര്യപ്രകാരം ചില യോഗങ്ങള്‍ നടക്കുകയും സംസ്ഥാനതല ഉദ്‌ഘാടനം കെങ്കേമമായി കൊണ്ടാടുകയും ചെയ്‌തു. വില്ലേജ്‌ ഓഫീസുകളില്‍ നിന്നും സര്‍ട്ടിഫിക്കറ്റുകള്‍ നല്‍കാനുളള തീയതിയും നിജപ്പെടുത്തി. എന്നാല്‍ ഇന്നും വില്ലേജ്‌ ഓഫീസുകളില്‍ നിന്നും സര്‍ട്ടിഫിക്കറ്റുകള്‍ ലഭിക്കാന്‍ കൈക്കുലി നല്‍കണം. വണ്ടിയുടെ ആര്‍.സി.ബുക്കിനും കൈക്കുലി കൊടുക്കണം. ഉദ്ദ്യോഗസ്ഥരെ നിയന്ത്രിക്കാന്‍ ഐ.എ.എസുകാരായ മോലധികാരികള്‍ക്കുപോലും കഴിയുന്നില്ല. സേവനാവകാശം എവിടെ എന്ന ചോദ്യം എല്ലാവരും കൈമലര്‍ത്തുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
