അന്ന്‌ ജോസഫിനെ വീഴിച്ചത്‌ മോന്‍സ്‌ ഇന്ന് മാണിയെ വീഴിക്കാന്‍ ജോര്‍ജ്‌
എല്‍ഡിഎഫില്‍ നിന്നും പി.ജെ. ജോസഫിനെ യു.ഡി എഫിലെത്തിച്ചത്‌ മോന്‍സ്‌ ജോസഫ്. ഇപ്പോള്‍ കെ.എം.മാണിയെ എല്‍ഡി എഫിലെത്തിക്കാന്‍ ശ്രമിക്കുന്നത്‌ പി.സി ജോര്‍ജ്‌. മണ്‌ഡല പുനര്‍നിര്‍ണയത്തിലൂടെ യു.ഡി.എഫ്‌ മണ്‌ഡലമായി മാറിയ കടുത്തുരുത്തിയില്‍ ജയിക്കണമെങ്കില്‍ കെ.എം.മാണിയുടെ ആവശ്യം മോന്‍സിനുണ്ടായിരുന്നു. അതുവരെ യുഡിഎഫുകാരനായിരുന്ന സ്റ്റീഫന്‍ ജോര്‍ജിനെ വെട്ടി നിരത്തി കടുത്തുരുത്തി പിടിച്ചെടുക്കാന്‍ മോന്‍സ്‌ നടത്തിയ തന്ത്രങ്ങളെ തുടര്‍ന്നാണ്‌ പി.ജെ.ജോസഫ് അന്ന്‌ യുഡിഎഫിലെത്തിയത്‌. ഇതില്‍ പി.ജെ ജോസഫിന്‌ പ്രത്യേക താല്‍പര്യമൊന്നുമുണ്ടായിരുന്നില്ല. ജോസഫ് എല്‍ഡിഎഫില്‍ സുരക്ഷിതനുമായിരുന്നു. മെത്രാന്‍മാര്‍ വഴി മോന്‍സ്‌ ശ്രമം തുടര്‍ന്നപ്പോള്‍ ജോസഫും മാണിയും ഒന്നായി.
യുഡിഎഫ്‌ അധികാരത്തിലെത്തിയപ്പോള്‍ പിസി ജോര്‍ജ്‌ ഉമ്മന്‍ചാണ്ടിയുടെയും ഇതര കോണ്‍ഗ്രസുകാരുടെയും ഉറ്റതോഴനായിരുന്നു. ആര്‍ ശെല്‍വരാജിനെ ഇടതുപാളയത്തില്‍ നിന്നും അടര്‍ത്തിയെടുക്കാനും ചരടു വലിച്ചു. കോണ്‍ഗ്രസ്‌ അദ്ദേഹത്തിന്‌ ചീഫ്‌ വിപ്പ്‌ പദവിയും നല്‍കി. എന്നാല്‍ അധികം വൈകാതെ ജോര്‍ജും കോണ്‍ഗ്രസും തമ്മില്‍ തെറ്റി. വഴക്ക്‌ ഉഗ്രമായി. അടിയുടെ വക്കുവരെയെത്തി. പത്തനംതിട്ടയില്‍ ആന്റോആന്റണിയും പി.സി ജോര്‍ജ്ജും തമ്മില്‍ കണ്ടാല്‍ തല്ലും. ചുരുക്കത്തില്‍ പൂഞ്ഞാറില്‍ നിന്നും യുഡിഎഫിലൂടെ ഇനിയും പിസി ജോര്‍ജിന്‌ നിയമസഭയിലെത്തിക്കാന്‍ പ്രയാസമാണ്‌. അപ്പോള്‍ എല്‍ഡിഎഫിലാണ്‌ അദ്ദേഹത്തിന്‌ സോഫ്‌സോണ്‍. തനിയെ പോകാന്‍ പലവട്ടം തീരുമാനിച്ചു. അപ്പോഴാണ്‌ കെ.എംമാണിയെ മുഖ്യമന്ത്രിയാക്കിയാലോ എന്ന ചിന്ത ജോര്‍ജില്‍ അങ്കുരിച്ചത്‌. ഏതായാലും ജോര്‍ജ്‌ വിരിച്ച വലയില്‍ കേരള കോണ്‍ഗ്രസ്‌ വീഴും. അതിനാണ്‌ സാധ്യത.
കെ.എം. മാണി മുഖ്യമന്ത്രിയാവാന്‍ തികച്ചും അനുയോജ്യനാണ്‌. ഉമ്മന്‍ചാണ്ടിയും ആന്റണിയും സ്‌കൂളില്‍ പഠിക്കുമ്പോള്‍ അദ്ദേഹം കെ.പി.സിസി ജനറല്‍ സെക്രട്ടറിയായിരുന്നു. മുന്നണി സംവിധാനത്തില്‍ അകപ്പെട്ടതുകൊണ്ട്‌ മാത്രമാണ്‌ അദ്ദേഹം മുഖ്യമന്ത്രിയാവാതെ പോയത്‌. നിയമസഭയില്‍ അന്‍പതാം വാര്‍ഷികം ആഘോഷിക്കുമ്പോഴെങ്കിലും അദ്ദേഹത്തെ മുഖ്യമന്ത്രിയാക്കിയില്ലെങ്കില്‍ അത്‌ തെറ്റു തന്നെയാണ്‌. എന്നാല്‍ ഇടതുപക്ഷത്തിനൊപ്പം ചേര്‍ന്ന്‌ മുഖ്യമന്ത്രിയാകാനുള്ള അവസരം അദ്ദേഹം വിനിയോഗിക്കുമോ എന്ന്‌ കണ്ടറിയണം. അഥവാ ഇടതുപക്ഷം അദ്ദേഹത്തെ മുഖ്യമന്ത്രിയാക്കാന്‍ സമ്മതിച്ചാല്‍ തന്നെ അവരെ നാം ആദരിക്കണം.
കെ.എംമാണിയുടെ നേട്ടങ്ങള്‍ കേരളത്തിന്റെ ചരിത്രമാണ്‌. സംശുദ്ധമായ ഒരു രാഷ്‌ട്രീയ ചരിത്രം അദ്ദേഹത്തിനുണ്ട്‌. പി.സി.ജോര്‍ജാകട്ടെ സ്വന്തം സുരക്ഷിതത്വത്തിലാണ്‌ നോട്ടമിടുന്നത്‌. സുരക്ഷിതതാവളത്തിലെത്താനുളള ജോര്‍ജിന്റെ ശ്രമങ്ങള്‍ക്ക്‌ മാണിയുടെ പച്ചക്കൊടി കിട്ടിയാല്‍ കേരള രാഷ്‌ട്രീയത്തില്‍ വരും ദിവസങ്ങളില്‍ വന്‍ മാറ്റങ്ങള്‍ക്ക്‌ വഴി തെളിച്ചേക്കും. കാത്തിരുന്നു കാണാം !
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
