പുലിമടയില്‍ മാന്‍പേടയെത്തി , ഇനി സുധീരനും ചാണ്ടിയും തോളോടുതോള്‍...
സര്‍ക്കാരുമായി യോജിച്ച്‌ പ്രവര്‍ത്തിക്കണമെന്ന്‌ കെ.പി.സി.സി അധ്യക്ഷന്‍ വി.എം. സുധീരന് സോണിയാഗാന്ധിയുടെ കര്‍ശന നിര്‍ദ്ദേശം. അതേസമയം പാര്‍ട്ടിയുമായി ഒത്തു പോകണമെന്ന്‌ മുഖ്യമന്ത്രി ഉമ്മന്‍ചാണ്ടിക്കും സോണിയാഗാന്ധി നിര്‍ദ്ദേശം നല്‍കി. ഇരുവരെയും മാത്രം അടുത്തു വിളിച്ച്‌ കേരളത്തിലെങ്കിലും കോണ്‍ഗ്രസിനെ തറപറ്റിക്കരുതെന്ന്‌ സോണിയ അഭ്യര്‍ത്ഥിച്ചു. അതുകൊണ്ടു തന്നെ സര്‍ക്കാരിനെതിരെ സുധീരന് സ്വീകരിച്ചിരിക്കുന്ന കര്‍ശന നിലപാടുകള്‍ക്ക്‌ അയവു വരും. ബാര്‍ വിഷയത്തില്‍ ഉള്‍പ്പെടെ സര്‍ക്കാരിനെതിരെ സുധീരന് നില്‍ക്കാന്‍ സാധ്യതയില്ലെന്ന്‌ കെ.പി.സിസിയുമായി അടുത്ത വൃത്തങ്ങള്‍ സൂചിപ്പിക്കുന്നു.
സോണിയാഗാന്ധിയെ സംബന്ധിച്ചടത്തോളം കേരളത്തില്‍ കോണ്‍ഗ്രസിനുണ്ടായ അഭൂതപൂര്‍വ്വമായ വിജയത്തിന്‌ പിന്നില്‍ പ്രവര്‍ത്തിച്ചത്‌ ഉമ്മന്‍ചാണ്ടിയാണ്‌. വി.എം സുധീരന് ഇലക്ഷന്‌ തൊട്ടു മുമ്പാണ്‌ കെ.പി.സി.സി അധ്യക്ഷ പദം ഏറ്റെടുത്തത്‌. അതുവരെ രമേശ്‌ചെന്നിത്തലയായിരുന്നു പാര്‍ട്ടിയെ നയിച്ചിരുന്നത്‌. അന്നൊന്നും പാര്‍ട്ടിയും സര്‍ക്കാരും തമ്മില്‍ അഭിപ്രായഭിന്നതയുണ്ടായിരുന്നില്ല.
സുധീരന്റെ പിടിവാശിയെ കുറിച്ച്‌ ഉമ്മന്‍ചാണ്ടി സോണിയയോട്‌ സംസാരിച്ചുവെന്നാണ്‌ സൂചന. സുധീരന് ബാര്‍ വിഷയത്തില്‍ പിടിവാശി കാണിച്ചാല്‍ ഹൈക്കോടതിയില്‍ നിന്നും സര്‍ക്കാരിനെതിരെ തീരുമാനമുണ്ടാകും. വ്യാജ മദ്യദുരന്തത്തിനുള്ള സാധ്യതയും തള്ളികളയാനാവില്ല. ഓണം വരികയാണ്‌. ഓണത്തിന്‌ ആവശ്യാനുസരണം മദ്യം ലഭ്യമാക്കാനുള്ള ഉത്തരവാദിത്വം സര്‍ക്കാരിനാണ്‌. മദ്യത്തിന്റെ വരുമാനത്തിലാണ്‌ സംസ്ഥാനത്തെ ഭരണം പോലും നടക്കുന്നത്‌. അത്‌ ഇല്ലാതായാല്‍ പൊതുവെ മുഖം തിരിച്ച്‌ നില്‍ക്കുന്ന കേന്ദ്രസര്‍ക്കാര്‍ സംസ്ഥാന ഭരണത്തില്‍ ഇടപെടും. അങ്ങനെ വന്നാല്‍ കൊടിയ സാമ്പത്തിക പ്രതിസന്ധിയിലാവുന്ന സര്‍ക്കാരിന്‌ ക്ഷേമപെന്‍ഷനുകള്‍ നല്‍കാന്‍ കഴിയാതെ വരും. അത്‌ ജനങ്ങളുടെ അപ്രീതിക്ക്‌ കാരണമാകും. മാത്രവുമല്ല ബാര്‍ ഉടമകള്‍ പാര്‍ട്ടിക്ക്‌ നിര്‍ലോഭം സഹകരണം നല്‍കുന്നവരാണ്‌. വെള്ളാപ്പളളി നടേശനെ പോലുള്ളവര്‍ കോണ്‍ഗ്രസിന്‌ എക്കാലവും എതിരാകുമെന്നും ഉമ്മന്‍ചാണ്ടി സോണിയയെ അറിയിച്ചു.
ഉമ്മന്‍ചാണ്ടിയുടെ സന്ദേശം സോണിയ അതീവ ഗൗരവത്തോടെയാണ്‌ സ്വീകരിച്ചിരിക്കുന്നത്‌. കെ.പി.സിസി യോഗത്തില്‍ മുഖ്യമന്ത്രിയെ സോണിയ പരസ്യമായി പിന്തുണച്ചതും ഇതിന്റെ സൂചനയാണ്‌. സുധീരനോട്‌ പിടിവാശി വേണ്ടെന്ന സന്ദേശമാണ്‌ ഇതിലൂടെ അവര്‍ നല്‍കിയത്‌. പിടിവാശി കാണിച്ചാല്‍ സുധീരന് ഔട്ടാകും. പ്ലസ്‌ ടു വിഷയത്തിലും സുധീരന് ഇടഞ്ഞുനില്‍ക്കുകയാണ്‌. മുസ്ലീം ലീഗിനെ പിണക്കുന്ന സമീപനമാണ്‌ സുധീരന് പിന്തുടരുന്നതെന്നും ഉമ്മന്‍ചാണ്ടി ഹൈക്കമാന്റിനെ അറിയിച്ചു.
അടിയന്തിരമായി സര്‍ക്കാര്‍ പാര്‍ട്ടി ഏകോപന സമിതി വിളിച്ചു കൂട്ടി ഇരു വിഷയങ്ങളിലും തീരുമാനമെടുക്കാന്‍ സോണിയ സുധീരനും ഉമ്മന്‍ചാണ്ടിക്കും നിര്‍ദേശം നല്‍കി. കേരള കോണ്‍ഗ്രസിനെയും ലീഗിനെയും കോണ്‍ഗ്രസുകാരെയും പിണക്കാതെ മുന്നോട്ടു പോകാനാണ്‌ സോണിയ സംസ്ഥാന നേതാക്കള്‍ക്ക്‌ നല്‍കിയ കര്‍ശന നിര്‍ദ്ദേശം. മറിച്ചാണ്‌ സംഭവിക്കുന്നതെങ്കില്‍ സോണിയയുടെ ഇടപെടല്‍ ഉണ്ടാകുമെന്നും ഉറപ്പായി. ഏതായാലും കേരളത്തില്‍ ഏറെ കാലമായി നീറികൊണ്ടിരിക്കുന്ന വിഷയങ്ങളില്‍ അടിയന്തിരമായി തീരുമാനമുണ്ടാകുമെന്ന്‌ ഉറപ്പായി.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
