ഇസഡ്‌ പ്ലസ്‌ സ്വാമി കേരളത്തില്‍ കറങ്ങിയതിന്റെ ചെലവ്‌ കേരളം തന്നെ വിഹിക്കണമെന്ന്‌ ഹരിയാന
കേരളത്തില്‍ മുഖ്യമന്ത്രിക്ക്‌ മാത്രം നല്‍കുന്ന ഇസഡ്‌ പ്ലസ്‌ സുരക്ഷയില്‍ തുടര്‍ച്ചയായി കറങ്ങിനടന്ന സ്വാമിയുടെ ചെലവ്‌ വഹിക്കാന്‍ ഹരിയാന സര്‍ക്കാര്‍ തയ്യാറല്ല. വന്‍ സുരക്ഷാ സന്നാഹവുമായി കേരളത്തില്‍ കറങ്ങിയ ഉത്തരേന്ത്യയിലെ ദേര സച്ചാ സൗദ എന്ന ആത്മീയ സംഘടനാ നേതാവ്‌ ഗുര്‍മീത്‌ റാം റഹിം സിംഗ്‌ ജി ഇന്‍സാന്റെ സുരക്ഷാചെലവാണ്‌ ഇപ്പോള്‍ വിവാദമായത്‌.
സന്ദര്‍ശനം റിയല്‍ എസ്‌റ്റേറ്റ്‌ ആവശ്യങ്ങള്‍ക്കാണെന്നു രഹസ്യാനേഷണ വിഭാഗം കണ്ടെത്തിയതിനെ തുടര്‍ന്നാണ്‌ സ്വാമിക്ക്‌ വേണ്ടി ചെലവാക്കിയ പണം ആവശ്യപ്പെട്ട്‌ കേരളം ഹരിയാന സര്‍ക്കാരിന്‌ കത്തെഴുതിയത്‌. എന്നാല്‍ ഈ തുക ഹരിയാന സര്‍ക്കാര്‍ നല്‍കാന്‍ തയ്യാറല്ല.
അടിക്കടി കേരളത്തിലെ സുഖവാസ കേന്ദ്രങ്ങള്‍ സന്ദര്‍ശിക്കുന്ന ആത്മീയ നേതാവിനു സംസ്‌ഥാന സര്‍ക്കാരിന്റെ ചെലവില്‍ സുരക്ഷ ഒരുക്കാന്‍ കഴിയില്ലെന്നായിരുന്നു കേരളത്തിന്റെ നിലപാട്‌. ഇയാള്‍ക്കു സുരക്ഷ ഒരുക്കില്ലെന്നും സുരക്ഷയ്‌ക്കായി ചെലവാക്കിയ പണം തിരികെ നല്‍കണമെന്നും കേരളം പറഞ്ഞിരുന്നു. 40 ദിവസം വാഗമണിലും ഏലപ്പാറയിലും തങ്ങി ഏക്കറുകണക്കിനു സ്‌ഥലം വാങ്ങിയശേഷമാണു ഗുര്‍മീത്‌ സിംഗ്‌ മടങ്ങിയതെന്നാണു വിവരം.
ജൂണ്‍ പകുതിയോടെ ആറു ബസുകളിലായി മുന്നൂറോളം അനുയായികളുമായെത്തിയ ഗുര്‍മീത്‌ സിംഗ്‌ റേഞ്ച്‌ റോവര്‍ കാറാണു യാത്രയ്‌ക്ക്‌ ഉപയോഗിച്ചത്‌. ബി.എം.ഡബ്ല്യു കാറിലായിരുന്നു ഹരിയാനയില്‍നിന്നുള്ള സുരക്ഷാവിഭാഗം സഞ്ചരിച്ചത്‌. കണ്ണന്‍കുളത്തെ റിസോര്‍ട്ടിലായിരുന്നു ഗുര്‍മിത്‌ തങ്ങിയത്‌. മറ്റു റിസോര്‍ട്ടുകള്‍ മുഴുവന്‍ സംഘം വാടകയ്‌ക്കുമെടുത്തു.
വാഗമണ്ണില്‍ സ്‌കൂളും ആശുപത്രിയും ആശ്രമവും തുടങ്ങാന്‍ പദ്ധതിയുള്ളതായി അറിയിച്ച്‌ പ്രാദേശിക രാഷ്‌ട്രീയ മത നേതാക്കളെ മധ്യസ്‌ഥരാക്കിയായിരുന്നു ഭൂമി ഇടപാട്‌. ഇതുസംബന്ധിച്ച്‌ ദുരൂഹതയുണ്ടെന്ന്‌ ഇ.എസ്. ബിജിമോള്‍ എം.എല്‍.എയും ആരോപിച്ചിരുന്നു. ബിജിമോളുടെ പരാതിയിന്‍ മേല്‍ കൂടുതല്‍ അനേ്വഷണത്തിന്‌ ഒരുങ്ങുകയാണ്‌ ആഭ്യന്തരവകുപ്പ്‌.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
