സാഹിത്യത്തിനുള്ള സരസ്വതി സമ്മാന്‍ പുരസ്‌കാരം സുഗതകുമാരിക്ക്‌. മണലെഴുത്ത്‌ എന്ന സമാഹാരത്തിനാണ്‌ പുരസ്‌കാരം. സാഹിത്യരംഗത്തെ ഉന്നതമായ സരസ്വതി പുരസ്‌കാരം കെ.കെ.ബിര്‍ള ഫൗണ്ടേഷനാണ്‌ നല്‍കുന്നത്‌. ഏഴര ലക്ഷം രൂപയാണ്‌ പുരസ്‌കാര തുക. 1991 മുതല്‍ നല്‍കിവരുന്ന പുരസ്‌കാരം ഇതിനുമുന്‍പ്‌ മലയാളത്തില്‍ നിന്ന്‌ ബാലാമണിയമ്മയ്‌ക്കും,അയ്യപ്പപ്പണിക്കര്‍ക്കുമാണ്‌ ലഭിച്ചിട്ടുള്ളത്‌.

സ്വാതന്ത്ര്യ സമരസേനാനി ബോധ്വശ്വരന്റെയും കാര്‍ത്ത്യായനി അമ്മയുടെയും മകളായി 1934-ലാണ്‌ സുഗതകുമാരിയുടെ ജനനം. 1961-ല്‍ ആദ്യ കവിത മുത്തുച്ചിപ്പി പുറത്തിറക്കി. 67-ല്‍ പാതിരാപ്പൂക്കള്‍ എന്ന കവിതാസമാഹാരത്തിന്‌ സാഹിത്യ അക്കാഡമി പുരസ്‌കാരം ലഭിച്ചു. രാത്രിമഴയ്‌ക്ക്‌ 77-ല്‍ കേന്ദ്ര സാഹിത്യ അക്കാഡമി പുരസ്‌കാരവും ലഭിച്ചു. 81-ല്‍ പുറത്തിറങ്ങിയ അമ്പലമണികള്‍ക്ക്‌ വയലാര്‍ അവാര്‍ഡും ആശാന്‍ പുരസ്‌കാരവും ഓടക്കുഴല്‍ അവാര്‍ഡും ലഭിച്ചു.

ദേവദാസി, കുറിഞ്ഞിപ്പൂക്കള്‍, കൃഷ്‌ണകവിതകള്‍, വാഴത്തേന്‍ മലമുകളിലിരിക്കെ, തുലാവര്‍ഷപ്പച്ച തുടങ്ങിയവയാണ്‌ പ്രധാന കൃതികള്‍. ലളിതാംബിക അന്തര്‍ജനം അവാര്‍ഡ്‌, വള്ളത്തോള്‍ പുരസ്‌കാരം, ബാലാമണിയമ്മ പുരസ്‌കാരം, എഴുത്തച്ഛന്‍ പുരസ്‌കാരം എന്നിവ സുഗതകുമാരിയെ തേടിയെത്തിയിട്ടുണ്ട്‌. 2006-ല്‍ രാജ്യം സുഗത കുമാരിയെ പത്മശ്രീ നല്‍കി ആദരിച്ചു.