എല്ലാവര്ക്കും ഇമേജ് നന്നാക്കണം; സുധീരന് അരവിന്ദ് കെജ്രിവാളായി...
സോളാര് കേസിനുശേഷം മുഖ്യമന്ത്രി ഉമ്മന്ചാണ്ടി പ്രതിസന്ധിയിലേക്ക്. ബാര് വിഷയത്തില് ഘടകകക്ഷികള് മുഖ്യമന്ത്രിക്ക് എതിരായതോടെയാണ് അദ്ദേഹത്തിന് ശനിദശ ബാധിച്ചത്. ബാര് വിഷയത്തില് വിഎം സുധീരനൊപ്പമാണ് തങ്ങളെന്ന് ലീഗ് നേതാക്കള് പരസ്യമായി പ്രഖ്യാപിച്ചു. ഇതിന്റെ ഭാഗമായി വിഎം സുധീരന് സി.എച്ച്. മുഹമ്മദുകോയ സെന്ററിലെത്തുകയും ചെയ്തു. പി.കെ കുഞ്ഞാലിക്കുട്ടിയുമായി വേദി പങ്കിട്ട് സുധീരന് ലീഗ് തനിക്കൊപ്പമാണെന്ന് പ്രഖ്യാപിക്കാനും മറന്നില്ല. യുഡിഎഫിലെ രണ്ട് പ്രബല കക്ഷികളായ ലീഗും കേരള കോണ്ഗ്രസും വിഎം സുധീരനൊപ്പം നിന്നത് ഉമ്മന്ചാണ്ടിയെ പ്രതിസന്ധിയിലാക്കിയിരിക്കുകയാണ്.
ബാര് വിഷയം തന്റെ ഇമേജ് തകര്ത്തതായി ഉമ്മന്ചാണ്ടിയും കരുതുന്നു. പ്ലസ് ടു വിഷയത്തില് ലീഗുകാര് കാണിച്ച അഴിമതി സ്വമേധയാ ഏറ്റെടുത്ത തന്നോട് ഇത്രയും വേണ്ടായിരുന്നു എന്നാണ് ഉമ്മന്ചാണ്ടി പറയുന്നത്. പ്ലസ് ടു വിഷയത്തില് ലീഗിന്റെ നിലപാട് ഉമ്മന്ചാണ്ടി സര്ക്കാരിന് വളരെയേറെ ദോഷം ചെയ്തു. ഹയര് സെക്കന്ഡറി എഡ്യൂക്കേഷന് ഡയറക്ടറുടെ നിര്ദ്ദേശങ്ങള് തൃണവത്ക്കരിക്കാന് മുന്നില് നിന്നത് മുസ്ലീം ലീഗാണ്. ലീഗിന്റെ പ്രാദേശിക നേതാക്കള് പ്ലസ് ടു അഴിമതി വഴി കോടികള് സമ്പാദിച്ചതായി ഇന്റലിജന്സ് കണ്ടെത്തിയിട്ടുണ്ട്. എന്നാല് ഉമ്മന്ചാണ്ടിക്ക് ഒന്നും സാധിക്കാത്ത അവസ്ഥായാണുള്ളത്.
പ്ലസ് ടു വില് തന്നെ പ്രതിസന്ധിയിലാക്കിയ ലീഗ് ബാര് വിഷയത്തില് തന്നെ കൈവിട്ടെന്നതാണ് ഉമ്മന്ചാണ്ടിയുടെ പ്രധാന പരാതി. ഇതിനിടെ ഹൈക്കമാന്റും ഉമ്മന്ചാണ്ടിക്കെതിരെ പ്രതികരിച്ചു. ജനഹിതം അനുസരിച്ചുള്ള തീരുമാനമായിരിക്കും സ്വീകരിക്കുകയെന്ന് ഹൈക്കമാന്റ് പറഞ്ഞു. കേരള സര്ക്കാരിനെ അട്ടിമറിക്കാന് സുധീരന് ശ്രമിക്കുകയാണെന്ന ഉമ്മന്ചാണ്ടിയുടെ ആരോപണത്തോട് പ്രതികരിക്കുകയായിരുന്നു ഹൈക്കമാന്റ്.
ഫലത്തില് സുധീരനെതിരെ സംസാരിക്കാന് ഘടകകക്ഷികള്ക്ക് സാധിക്കാത്ത അവസ്ഥായാണുള്ളത്. അങ്ങനെ പ്രതികരിച്ചാല് തങ്ങളുടെ ഇമേജ് നഷ്ടമാകുമെന്ന് ഘടകകക്ഷി നേതാക്കള് ഭയക്കുന്നു. ദൃശ്യ-പത്ര മാധ്യമങ്ങള് സുധീരനൊപ്പമാണ്. ബാര് തുറക്കാന് ഹൈക്കോടതി അനുവദിച്ചാല് ജനം ഹൈക്കോടതിക്കും എതിരാവും. ഇതാണ് ഇന്നത്തെ അവസ്ഥ. ബാറില് കയറി മൂക്കറ്റം കുടിക്കുന്നവര് പോലും പുറത്തിറങ്ങി ബാറിനെതിരെ പ്രതികരിക്കുകയും ബാറുകള് അടച്ചു പൂട്ടണമെന്ന് ആവശ്യപ്പെടുകയും ചെയ്യും.
ഇതാണ് അവസ്ഥയെങ്കില് കേരള സര്ക്കാരിന് ബാര് തുറക്കുന്നതിന് അനുകൂലമായ നിലപാടെടുക്കാന് കഴിയുകയില്ല. അത്തരമൊരു നിലപാട് എടുത്താല് ഉമ്മന്ചാണ്ടി സര്ക്കാര് ഇത്രയും നാളും ഉണ്ടാക്കികൊടുത്ത ഇമേജ് തകരുകയായിരിക്കും ഫലം. ഏക പോംവഴി ഹൈക്കോടതി ഇടപെടലാണ്. ഹൈക്കോടതി ഇടപെടല് വഴി ബാര് തുറപ്പിക്കണമെങ്കില് പൂട്ടി കിടക്കുന്ന ബാറുകളില് നിലവാരമുള്ളവ തുറക്കണമെന്ന് ഹൈക്കോടതിയില് സര്ക്കാരിന് ആവശ്യപ്പെടേണ്ടി വരും. ഇതിനാവശ്യമായ പരിശോധനകള് സംസ്ഥാനത്ത് നടന്നു വരികയാണ്.
സുധീരന്റെ ഇമേജിന് പിന്നാലെ ഘടകകക്ഷികള് സഞ്ചരിക്കുകയാണെന്ന് മുഖ്യമന്ത്രിക്കറിയാം. മുഖ്യമന്ത്രിയും ഇമേജ് നന്നാക്കാന് തീരുമാനിച്ചാല് പി.കെ. കുഞ്ഞാലിക്കുട്ടിയും അബ്ദുറബ്ബുമൊക്കെ അകത്തുപോകും. ചവറ കെഎംഎംഎല്, പ്ലസ്ടു വിഷയങ്ങളുടെ ഫയലുകള് ഉമ്മന്ചാണ്ടിയുടെ ലോക്കറിലുണ്ട്. കാണാന് പോകുന്ന പൂരം ഇപ്പോഴേ പറയണോ? ഫലത്തില് സുധീരന് അരവിന്ദ് കെജ്രിവാളാകുന്നു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha