നിയമോപദേശം ലഭിച്ചു, തുറന്നിരിക്കുന്ന 312 ബാറുകളും ഉടന് പൂട്ടുമെന്ന് മുഖ്യമന്ത്രി
സംസ്ഥാനത്ത് തുറന്നിരിക്കുന്ന 312 ബാറുകളും ഉടന് പൂട്ടുമെന്ന് മുഖ്യമന്ത്രി ഉമ്മന്ചാണ്ടി. സര്ക്കാരിന് ഇതിനുള്ള അധികാരം ഉണ്ടെന്ന് നിയമോപദേശം ലഭിച്ചതായും അദ്ദേഹം പറഞ്ഞു. പൂട്ടുന്ന ബാറുകളുടെ ശേഷിക്കുന്ന കാലത്തെ ലൈസന്സ് ഫീ തിരിച്ച് നല്കും. മദ്യനയത്തിലെ തുടര് നടപടികള് ആലോചിക്കുന്നതിന് ചേര്ന്ന ഉന്നതതല യോഗത്തിന് ശേഷം മാധ്യമപ്രവര്ത്തകരോട് സംസാരിക്കുകയായിരുന്നു മുഖ്യമന്ത്രി.
സര്ക്കാരിന്റെ പുതിയ മദ്യനയം ഈ മാസം 26ന് ഹൈക്കോടതിയെ അറിയിക്കും. ഗാന്ധിജയന്തിക്ക് ശേഷം വരുന്ന ഞായറാഴ്ച മുതല് ഡ്രൈ ഡേയായിരിക്കും. കണ്സ്യൂമര് ഫെഡിന്റെ ബിവറേജസ് ഔട്ട്ലെറ്റുകളും പൂട്ടും. ബിവറേജസ് കോര്പ്പറേഷന്റെ 34 ഔട്ട്ലെറ്റുകളും കണ്സ്യൂമര് ഫെഡിന്റെ അഞ്ച് ഔട്ട്ലെറ്റുകളുമാണ് വര്ഷം തോറും പൂട്ടുന്നത്. ഇതിന്റെ ആദ്യ പടിയായി 39 ഔട്ട്ലെറ്റുകള് ഗാന്ധിജയന്തി ദിനത്തില് പൂട്ടുമെന്നും മുഖ്യമന്ത്രി അറിയിച്ചു.
മദ്യത്തിന് അഞ്ച് ശതമാനം സെസ് ഏര്പ്പെടുത്താന് തീരുമാനിച്ചു. ഇത് ബാര് തൊഴിലാളികളുടെ പുനരധിവാസത്തിനും മദ്യത്തിനെതിരെയുള്ള ബോധവല്ക്കരണത്തിനും ഉപയോഗിക്കും. മദ്യനിരോധനം സാമ്പത്തിക നഷ്ടമുണ്ടാക്കുമെന്ന വാദത്തോട് യോജിപ്പില്ലെന്നും മുഖ്യമന്ത്രി വ്യക്തമാക്കി. മദ്യത്തില് നിന്നും ലഭിക്കുന്ന തുക അധിക വരുമാനമായി കണക്കാക്കാന് കഴിയില്ലെന്നും ബാറുകള് പൂട്ടുന്നത് ടൂറിസത്തെ ബാധിക്കില്ലെന്നും മുഖ്യമന്ത്രി പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha