ശശീന്ദ്രന്റേയും കുട്ടികളുടേയും ദുരൂഹ മരണം: വിവാദ വ്യവസായി രാധാകൃഷ്ണനെ സി.ബി.ഐ അറസ്റ്റ് ചെയ്തു
മലബാര് സിമെന്റ്സ് മുന് കമ്പനി സെക്രട്ടറി ശശീന്ദ്രനും മക്കളും ദുരൂഹ നിലയില് മരിച്ചതുമായി ബന്ധപ്പെട്ട കേസില് വിവാദ വ്യവസായി വി.എം.രാധാകൃഷ്ണനെ സി.ബി.ഐ അറസ്റ്റ് ചെയ്തു. ആത്മഹത്യാ പ്രേരണക്കുറ്റം ചുമത്തിയാണ് അറസ്റ്റ് ചെയ്തത്. ചൊവ്വാഴ്ച ഉച്ചയ്ക്കുശേഷം പാലക്കാട് പി.ഡബ്ല്യു.ഡി ഗസ്റ്റ് ഹൗസില് വിളിച്ചു വരുത്തിയായിരുന്നു അറസ്റ്റ്. പിന്നീട് കൊച്ചിയിലേക്ക് കൊണ്ടുപോയി. 2011 മാര്ച്ചില് സി.ബി.ഐ സമര്പ്പിച്ച എഫ്,ഐ.ആറില് മൂന്നാം പ്രതിയായിരുന്ന രാധാകൃഷ്ണന് പുതിയ കുറ്റ പത്രത്തില് ഒന്നാം പ്രതിയാണ്.
രണ്ടായിരത്തി പതിനൊന്ന് ജനുവരിയിലാണ് ശശീന്ദ്രനേയും മക്കളായ വിവേക്,വ്യാസ് എന്നിവരേയും വീട്ടില് മരിച്ച നിലയില് കണ്ടെത്തിയത്. മലബാര് സിമെന്റ്സില് നടന്ന അഴിമതികളെക്കുറിച്ച് പുറത്തു പറയും എന്നതിനാല് ശശീന്ദ്രനെ കൊലപ്പെടുത്തുകയായിരുന്നു എന്ന തരത്തില് ആരോപണങ്ങള് ഉയര്ന്നിരുന്നു. ഇത്തരത്തിലുള്ള ഭീഷണികള് ചൂണ്ടിക്കാട്ടി ശശീന്ദ്രന്റെ ഭാര്യ പലതവണ കേസ് നല്കിയിരുന്നു.
ആദ്യം ലോക്കല് പോലീസാണ് കേസ് അന്വേഷിച്ചിരുന്നത്. പിന്നീട് ശശീന്ദ്രന്റെ ഭാര്യയുടെ അപേക്ഷ പരിഗണിച്ച് ഹൈക്കോടതി സി.ബി.ഐ അന്വേഷണത്തിന് ഉത്തരവിടുകയായിരുന്നു.
https://www.facebook.com/Malayalivartha