ഇത് അവസാനത്തെ ബാര് ഓണം… 15 ദിവസം കൂടി ആയുസ് സബ്സിഡിയില്ലാതെ കുടിപ്പിക്കാനായി ബാറുകാരും കുടിച്ച് മരിക്കാനായി ജനങ്ങളും തയ്യാര്
ഓണക്കുടിയും അതിനോടൊപ്പമുള്ള ഓണത്തല്ലും അവസാനമായി ആഘോഷിക്കാനുള്ള തയ്യാറെടുപ്പിലാണ് ബാറുകാരും ജനങ്ങളും. ഒരു പക്ഷെ ബാറുകാരുടെ അവസാനത്തെ ഓണക്കുടിപ്പിക്കലാകും. തുറന്നിരിക്കുന്ന 312 ബാറുകളും ഓണത്തിനു മുമ്പേ അടച്ചു പൂട്ടുമെന്ന് പറഞ്ഞിരുന്നെങ്കിലും അത് നിയമ കുരുക്കാകും. അതിനാല് 15 ദിവസത്തെ നോട്ടീസ് നല്കിയ ശേഷം പൂട്ടിക്കാനാണ് പരിപാടി. അതോടെ ഈ ഓണം കൂടി ബാറിലാഘോഷിക്കാന് കഴിയും.
അടച്ചുപൂട്ടുന്ന ബാറുകളില്നിന്നുള്ള മദ്യം തിരിച്ചെടുക്കുന്നതിനു ചട്ടങ്ങളില് ഭേദഗതി വരുത്തേണ്ടതുണ്ട്. ഇതുകൂടി പൂര്ത്തിയാക്കിയ ശേഷമായിരിക്കും ബാര് പൂട്ടലെന്നാണു സൂചന.
ഏതു സമയവും റദ്ദാക്കാന് അവകാശമുണ്ട് എന്ന വ്യവസ്ഥയോടു കൂടി ലൈസന്സ് നല്കിയ പശ്ചാത്തലത്തില് നോട്ടീസ് നല്കാതെ ബാറുകള് പൂട്ടാനായിരുന്നു സര്ക്കാരിന്റെ ആദ്യതീരുമാനം. നോട്ടീസ് നല്കിയാല് കോടതിയെ സമീപിച്ചു ബാറുടമകള്ക്കു സ്റ്റേ വാങ്ങാന് സാധിക്കുമെന്നും അന്ന് അഭിപ്രായമുയര്ന്നിരുന്നു. തുടര്ന്നാണ് ഉന്നതതല യോഗം ചേരാന് തീരുമാനിച്ചത്.
നിയമപ്രകാരമുള്ള രണ്ടാഴ്ചത്തെ നോട്ടീസ് നല്കി ബാറുകള് അടപ്പിച്ചാല് മതിയെന്ന് ഉന്നതതല യോഗം തീരുമാനിച്ചു. എക്സൈസ് മന്ത്രി കെ. ബാബുവിന്റെ അധ്യക്ഷതയിലാണ് ഉന്നതതല യോഗം വിളിച്ചത്. നികുതി, നിയമ വകുപ്പു സെക്രട്ടറിമാരും എക്സൈസ് കമ്മീഷണര് ഉള്പ്പെടെയുള്ള ഉന്നത എക്സൈസ് ഉദ്യോഗസ്ഥരും യോഗത്തില് സംബന്ധിച്ചു
വ്യാഴാഴ്ച ബാറുകള്ക്ക് നോട്ടീസ് നല്കും. അടുത്തമാസം 12നകം ബാറുകള് അടച്ചുപൂട്ടണമെന്ന് ആവശ്യപ്പെട്ടാകും ഉടമകള്ക്ക് സര്ക്കാര് നോട്ടീസ് നല്കുക.
സ്റ്റോക്കുള്ള മദ്യം തിരിച്ചെടുക്കും. നടപടികള് ലഘൂകരിക്കാന് ചട്ടങ്ങളില് മാറ്റം വരുത്തും. നാര്ക്കോട്ടിക്ക് കണ്ട്രോള് ബ്യൂറോയുമായി സഹകരിച്ച് പ്രവര്ത്തിക്കും. ലൈസന്സ് ഫീസിന്റെ ബാക്കി 40 കോടിയോളം രൂപ ബാര് ഉടമകള്ക്ക് മടക്കി നല്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha