കെഎസ്ആര്ടിസി ടിക്കറ്റ് നിരക്കില് അഞ്ചു രൂപ വരെ വര്ധന
കെഎസ്ആര്ടിസിയില് ഒരു രൂപ മുതല് അഞ്ചു രൂപ വരെ ടിക്കറ്റ് നിരക്കു വര്ധിപ്പിക്കാന് സര്ക്കാര് തീരുമാനം. കെഎസ്ആര്ടിസിയില് യാത്ര ചെയ്യുന്നവര്ക്ക് അപകടം സംഭവിച്ചാല് ഇന്ഷുറന്സ് നല്കുന്നതിനുവേണ്ടിയിട്ടാണ് ഈ നിരക്ക് വര്ധന. 14 രൂപ മുതലുള്ള ടിക്കറ്റുകള്ക്കാണ് വര്ധനവ് വരുത്തിയിരിക്കുന്നത്. സെപ്റ്റംബര് മുതല് ഇതു പ്രാബല്യത്തില് വരും. ബസ് അപകടത്തില് പരുക്കേല്ക്കുന്നവര്ക്കു 3000 രൂപ മുതല് പരമാവധി മൂന്നു ലക്ഷം വരെ അടിയന്തര സഹായമായി നല്കും. പെന്ഷന്കാരുടെ രണ്ടു മാസത്തെ കുടിശിക അടിയന്തരമായി കൊടുത്തു തീര്ക്കാന് 76 കോടി രൂപ അനുവദിച്ചു.
ശമ്പളം, ഉല്സവബത്ത, പെന്ഷന് എന്നിവയ്ക്കു പുറമെ ഓണം അഡ്വാന്സായി 4000 രൂപ നല്കാനും തൊഴിലാളി യൂണിയന് പ്രതിനിധികളുമായി മന്ത്രി തിരുവഞ്ചൂര് രാധാകൃഷ്ണന് നടത്തിയ ചര്ച്ചയില് തീരുമാനമായി. തൊഴിലാളി സംഘടനകള് ഇന്ന് അര്ധരാത്രി മുതല് പ്രഖ്യാപിച്ചിരുന്ന പണിമുടക്ക് ഇതേത്തുടര്ന്നു പിന്വലിച്ചു.
ഹഡ്കോയില്നിന്നു 300 കോടി രൂപ വായ്പയെടുത്ത് 1500 ബസുകള് വാങ്ങാനും തല്ക്കാലത്തെ സാമ്പത്തിക പ്രതിസന്ധി മറികടക്കാന് പാലക്കാട് ജില്ലാ സഹകരണ ബാങ്കില്നിന്നു 12% പലിശയ്ക്കു 300 കോടി രൂപ വായ്പയെടുക്കാനും ധാരണയായതായി തിരുവഞ്ചൂര് അറിയിച്ചു. ശമ്പളവും പെന്ഷനും ഓണം അഡ്വാന്സും എല്ലാം കൂടി നല്കാന് ആകെ 108 കോടി രൂപ വേണ്ടിവരുമെന്നു മന്ത്രി പറഞ്ഞു.
ഓണത്തിനു മുമ്പേ പെന്ഷന് കുടിശിക ഉള്പ്പെടെ തീര്ക്കും. ഓഗസ്റ്റിലെ പെന്ഷന് സെപ്റ്റംബര് 20നു മുമ്പു കൊടുക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha