ആന്റണിയുടെ കാലത്തുള്ള 6,000 കോടി രൂപയുടെ ഹെലികോപ്ടര് കരാറുകള് റദ്ദാക്കി; 178000 കോടിയുടെ പുതിയ പ്രതിരോധ ഇടപാടുകള്
യുപിഎ സര്ക്കാരിന്റെ കാലത്തുള്ള 6,000 കോടി രൂപയുടെ ഹെലികോപ്ടര് കരാറുകള് കേന്ദ്ര പ്രതിരോധ മന്ത്രാലയം റദ്ദാക്കി. പ്രതിരോധമന്ത്രി അരുണ് ജെയ്റ്റ്ലിയുടെ അധ്യക്ഷതയിലുള്ള വിദഗ്ധസമിതിയാണ് തീരുമാനമെടുത്തത്. വിവാദമായ അഗസ്ത വെസ്റ്റ്ലാന്ഡ് കമ്പനിയുടേതടക്കം മൂന്നു വിദേശ കമ്പനികള് ഉള്പ്പെട്ട, 197 ലൈറ്റ് യൂട്ടിലിറ്റി ഹെലികോപ്ടര് വിദേശ രാജ്യങ്ങളില് നിന്നു വാങ്ങാനുള്ള ടെന്ഡര് നടപടികളാണു കേന്ദ്ര പ്രതിരോധ മന്ത്രാലയം റദ്ദാക്കിയത്. ഈ കാലയളവില് എ.കെ. ആന്റണിയായിരുന്നു പ്രതിരോധമന്ത്രി.
വിവിഐപി ഹെലികോപ്ടര് ഇടപാട് വിവാദമായതിനെ തുടര്ന്ന് ഇറ്റാലിയന് കമ്പനിയായ അഗസ്ത വെസ്റ്റ് ലാന്ഡ് കമ്പനി ആദ്യം തന്നെ ടെന്ഡര് നടപടികളില് നിന്നു പുറത്തായിരുന്നെങ്കിലും ഇനി ഈ ടെന്ഡര് നടപടികള് മുന്നോട്ടു കൊണ്ടു പോകേണ്ടെന്ന നിലപാടു സ്വീകരിക്കുകയായിരുന്നു കേന്ദ്ര സര്ക്കാര്.
ഇതിനു പുറമേ, 1,78,000 കോടി രൂപയുടെ പ്രതിരോധ ഇടപാടുകള്ക്കും മന്ത്രാലയം അംഗീകാരം നല്കിയിട്ടുണ്ട്. യുദ്ധമുഖത്തുപയോഗിക്കുന്ന അപ്പാച്ചെ ഹെലികോപ്ടറുകളും ചിനൂക് ഹെലികോപ്ടറുകളും അമേരിക്കയുടെ പക്കല് നിന്നും വാങ്ങാനാണു ഇപ്പോഴുള്ള തീരുമാനം. അന്തര് വാഹിനി നവീകരണത്തിനായി 4,800 കോടി രൂപയും അനുവദിച്ചിട്ടുണ്ട്. ഇതിനു പുറമേ 118 അര്ജുന് എംകെ-11 ടാങ്കുകള്ക്കായി 6,600 കോടി രൂപയും നീക്കി വെച്ചിട്ടുണ്ട്.
വിദേശ കമ്പനികളുമായുള്ള കരാര് റദ്ദാക്കി പ്രതിരോധ മേഖലയില് ഇന്ത്യന് കമ്പനികള്ക്കു കൂടുതല് പ്രാധാന്യം നല്കാനാണു പ്രതിരോധ മന്ത്രാലയത്തിന്റെ തീരുമാനം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha