ആര്‍എസ്‌എസ്‌ നേതാവിന്റെ കൊലപാതകത്തില്‍ ജയരാജന്റെ മകനെതിരെ കേസെടുത്തു
ആര്‍എസ്‌എസ്‌ നേതാവ് മനോജിന്റെ കൊലപാതകത്തെ പരാമര്‍ശിച്ച്‌ ഫെയ്‌സ്‌ബുക്കില്‍ പോസ്‌റ്റിട്ട സിപിഎം നേതാവ് പി.ജയരാജന്റെ മകന്‍ ജെയിന്‍ രാജിനെതിരെ പോലീസ് കേസെടുത്തു. ഐടി ആക്‌ട്‌ പ്രകാരം കതിരൂര്‍ പൊലീസാണ്‌ കേസെടുത്തത്‌. `കൊലവിളിയും ഉപദേശങ്ങളുമായി വരുന്നവര്‍ ഒന്നോര്‍ക്കണം, ഞാനുമൊരു മകനാണ്‌. എന്റെ കുട്ടിക്കാലം ചോരയില്‍ മുക്കിയവര്‍, അച്‌ഛനെ ശാരിരികമായി തളര്‍ത്തിയവന്‍, ഞങ്ങളുടെ സുന്ദരേട്ടനെ വെട്ടിനുറുക്കിയവന്‍, തെരുവില്‍ കിടപ്പുണ്ടെന്നു കേട്ടാല്‍.. എന്നിലെ മകന്‍ സന്തോഷിക്കുക തന്നെ ചെയ്യും - ഇതായിരുന്നു പോസ്‌റ്റ്‌. സംഭവം ചര്‍ച്ചയ്‌ക്കും വിവാദത്തിനു വഴിമരുന്നിട്ടതോടെ പോസ്‌റ്റ്‌ പിന്‍വലിക്കുകയായിരുന്നു. ചുരുങ്ങിയ സമയം കൊണ്ട് ആയിരത്തിലധികം ലൈക്കും നിരവധി ഷെയറും ലഭിച്ചിരുന്നു.
വീട്ടില്‍ നിന്ന് കാറില്‍ തലശേരിക്കുള്ള യാത്രയ്‌ക്കിടെ ഒന്നാം തീയതി രാവിലെ 11ന്‌ ഉക്കാസ്‌മെട്ടയില്‍ വച്ചാണ്‌ മനോജിനും സുഹൃത്ത്‌ കൊളപ്രത്ത്‌ വീട്ടില്‍ പ്രമോദിനും നേരെ ആക്രമണമുണ്ടായത്‌. വാനിനു നേരെ ബോംബ്‌ എറിഞ്ഞതിനു ശേഷം മനോജിനെ വലിച്ചിറക്കി വെട്ടിക്കൊല്ലുകയായിരുന്നു. ആക്രമണത്തില്‍ പരുക്കേറ്റ പ്രമോദ്‌ ചികിത്സയിലാണ്‌. കേസ് ക്രൈംബ്രാഞ്ചാണ്‌ അന്വേഷിക്കുന്നത്‌.
സിപിഎം ജില്ലാ സെക്രട്ടറി പി. ജയരാജനെ 1999 ഓഗസ്‌റ്റ്‌ 25ന്‌ വധിക്കാന്‍ ശ്രമിച്ച കേസില്‍ വിചാരണക്കോടതി ശിക്ഷിച്ച അഞ്ചാം പ്രതിയാണ്‌ കൊല്ലപ്പെട്ട മനോജ്‌. വിധിക്കെതിരെ ഹൈക്കോടതിയില്‍ അപ്പീല്‍ നല്‍കി ജാമ്യത്തിലിറങ്ങിയതായിരുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
