ഓണത്തിന്‌ പൂസാവുമ്പോള്‍ ശ്രദ്ധിക്കണേ?.. 108 വിളിക്കേണ്ടി വരരുത്‌!
ഓണത്തിന്‌ മണിക്കുറുകള്‍ മാത്രം ബാക്കിനില്‍ക്കേ സംസ്ഥാനത്ത്‌ മദ്യദുരന്തമുണ്ടാക്കാനുളള പശ്ചാത്തലമൊരുക്കി എക്‌സൈസ്‌ ഉദ്ദ്യോഗസ്ഥര്‍ കാത്തിരിക്കുന്നു. ബാറുകളൊന്നും തുറക്കേണ്ടതില്ലെന്നും തുറന്ന ബാറുകള്‍ പൂട്ടണമെന്നുമുളള ഹൈക്കോടിതി വിധി കൈക്കൂലിക്കാരാം എക്‌സൈസ്‌ ഉദ്ദ്യോഗസ്ഥര്‍ക്ക്‌ വന്‍ പ്രഹരമായി മാറി. ഇനി ഒരേ ഒരു മാര്‍ഗം മാത്രമാണ്‌ അവശേഷിക്കുന്നത്‌. മദ്യദുരന്തമുണ്ടാക്കി മദ്യനിരോധനം ഫലപ്രദമാകില്ലെന്ന്‌ തെളിയിക്കുക.
വ്യാജ ഹോളോഗ്രം പതിപ്പിച്ച സെക്കന്റസുകള്‍ കേരളത്തില്‍ സുലഭമാണ്‌. ബാറുകള്‍ക്ക്‌ പൂട്ടുവീഴുന്നു എന്നറിഞ്ഞുകൊണ്ടാണ്‌ സംസ്ഥാനത്തേക്ക്‌ വന്‍തോതില്‍ സ്‌പിരിറ്റൊഴുകുന്നത്‌. സ്‌പിരിറ്റ്‌ മാഫിയക്ക്‌ പിന്നില്‍ പ്രവര്‍ത്തിക്കുന്നത്‌ പൂട്ടാന്‍ പോകുന്ന ബാറുകളുടെ മുതലാളിമാരാണ്‌. കേരളത്തിലെ അതിര്‍ത്തി ചെക്ക്‌ പോസ്റ്റുകള്‍ വഴി വന്‍തോതിലാണ്‌ സ്‌പിരിറ്റ്‌ ഒഴുകുന്നത്‌. കഴിഞ്ഞ ദിവസം ആര്യങ്കാവ്‌ ചെക്ക്‌ പോസ്റ്റില്‍ നിന്നുമാത്രം 7500 ലിറ്റര്‍ സ്‌പിരിറ്റാണ്‌ പിടികൂടിയത്‌. 7500 ലിറ്റര്‍ സ്‌പിരിറ്റ്‌ പിടിയൂടിയപ്പോള്‍ 75000 ലിറ്റര്‍ ചെക്ക്‌ പോസ്റ്റ്‌ കടന്നു പോയിട്ടുണ്ടെന്ന്‌ അനുമാനിക്കാം.
ബാറുകള്‍ പൂട്ടിയാല്‍ കുടിയന്‍മാരുടെ ദാഹം തീര്‍ക്കാനുളള സുനാമി പുറത്തിറങ്ങും. ബിവറേജ്‌ കോര്‍പ്പറേഷനെ വെല്ലുന്ന ഹോളോഗ്രാമാണ്‌ സെക്കന്റ്‌സില്‍ പതിക്കുന്നത്‌. മറ്റ്‌ സംസ്ഥാനങ്ങളില്‍ നിന്നാണ്‌ കേരളത്തിലേക്ക്‌ മദ്യം ഒഴുകുന്നത്‌. തെന്‍മലയില്‍ നിന്നും മദ്യം എത്തിച്ചത്‌ കായംകുളത്തെ ഉന്നതനായ മദ്യരാജാവിനാണെന്നാണ്‌ റിപ്പോര്‍ട്ടുകള്‍.
ഓണത്തിന്‌ പൂസാകുമ്പോള്‍ ശ്രദ്ധിക്കണം. ഇല്ലെങ്കില്‍ 108 വിളിക്കേണ്ടിവരും. വ്യാപകമായ തോതില്‍ റെയ്‌ഡ്‌ ആരംഭിച്ചുട്ടുണ്ടെന്നാണ്‌ എക്‌സൈസുകാര്‍ പറയുന്നത്. ചെറുകിട കച്ചവടക്കാരെയാണ്‌ പിടികൂടുന്നതെന്നുമാത്രം. കാരണം ബാക്കിയുളളവരെ പിടിക്കാനുളള ധൈര്യം കേരളാപോലീസിനും എക്‌സൈസിനും ഇല്ല. ആവശ്യമില്ലാത്ത പുലിവാലുണ്ടാക്കി കേസില്‍ പെടാന്‍ ഉദ്ദ്യോഗസ്ഥര്‍ തയ്യാറുമല്ല.
കളളുഷാപ്പുകളിലേക്കാണ്‌ സ്‌പിരിറ്റ്‌ ഒഴുകുന്നതെന്നാണ്‌ വിവരം. ബാറുകള്‍ പൂട്ടുന്നതോടെ കളളുഷാപ്പുകളില്‍ മദ്യവില്‍പന തുടങ്ങാമെന്നാണ്‌ ബാര്‍ ഉടമകള്‍. കളളുഷാപ്പുകള്‍ പാട്ടത്തിനുപിടിക്കാന്‍ ഇതിനകം ശ്രമം തുടങ്ങിക്കഴിഞ്ഞു. ഉമ്മന്‍ചാണ്ടിയുടെ കൃപാകടാക്ഷം കാരണം ബാറുകള്‍ ബെന്‍-ബിയര്‍ പാര്‍ലറുകളാക്കാമെന്ന്‌ തീരുമാനിച്ചുട്ടുണ്ട്‌. ബിയറും വൈനും തേടി വരുന്നവര്‍ക്ക്‌ ഒരല്‌പം വിദേശി കൊടുക്കും. എക്‌സൈസുകാരുടെ മാസപടിയില്‍ മുടക്കം വരുത്താതിരുന്നാല്‍ കാര്യം നടക്കും.
കേരളത്തിലെ മദ്യമുതലാളിമാര്‍ വന്‍കിട ടാങ്കറുകള്‍ വാങ്ങാനുളള ഒരുക്കത്തിലാണ്‌. മദ്യം നിരോധിക്കുമ്പോള്‍ ടാങ്കറെന്തിനെന്ന്‌ ചോദിക്കരുത്‌. കാണാന്‍ പോകുന്ന പൂരം എന്തിന്‌ നേരത്തെ പറയുന്നു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
