ഇന്ത്യയുടെ ഭരണതലപ്പത്ത്‌ രണ്ടാമനാണ്‌ കേന്ദ്ര പ്രതിരോധ മന്ത്രി എ.കെ. ആന്റണി. സോണിയാ ഗാന്ധിയുടേയും രാഹുല്‍ ഗാന്ധിയുടേയും വിശ്വസ്ഥന്‍. ആര്‍ക്കും ആന്റണിയെപ്പറ്റി എതിര്‍പ്പില്ല. ഒരുപക്ഷേ കേരളത്തില്‍ നിന്നും ഇത്രയേറെ ബഹുമാനം പിടിച്ചുപറ്റിയ ഒരു ദേശീയ നേതാവ്‌ ഉണ്ടോ എന്നു പോലും സംശയം. പ്രധാനമന്ത്രി സ്ഥാനാര്‍ത്ഥിയായ്‌ മലയാളികള്‍ക്ക്‌ സ്വപ്‌നം കാണാനെങ്കിലുമുള്ള അവസരം ഉള്ള ഏക വ്യക്തിയാണ്‌ എ.കെ. ആന്റണി. ആ ആന്റണി, ഗാന്ധി കുടുംബത്തെ ശക്തമായി വിമര്‍ശിച്ചിരുന്നു എന്നത്‌ ഈയൊരു സന്ദര്‍ഭത്തില്‍ ഏറെ ശ്രദ്ധേയമാണ്‌.

മുന്‍ പ്രധാനമന്ത്രി ഇന്ദിരാഗന്ധിയുടെ രണ്ടാമത്തെ മകനായ സ‍ഞ്ജയ് ഗാന്ധിക്ക് എ.കെ.ആന്റണിയില്‍ നിന്ന് പിന്തുണ ലഭിച്ചിരുന്നില്ലെന്നാണ്‌ വിക്കിലിക്സ് വെളിപ്പെടുത്തല്‍. ആന്റണി കോണ്‍ഗ്രസ് കേരള ഘടകം പ്രസി‌ഡന്റായിരുന്ന കാലത്ത് അദ്ദേഹത്തിന്റെ നേതൃത്വത്തില്‍ ഒരു വിഭാഗം സഞ്ജയ് ഗാന്ധിയെ ശക്തമായി എതിര്‍ത്തിരുന്നതായും വിക്കിലിക്സ് പറയുന്നു.
കേരളത്തില്‍ സഞ്ജയ് ഗാന്ധി അത്ര ജനകീയനായിരുന്നില്ല. കേരളത്തില്‍ കെ.കരുണാകരന്‍ മാത്രമായിരുന്നു സഞ്ജയ് ഗാന്ധിയെ പിന്തുണച്ചിരുന്നതെന്നും രേഖയില്‍ പറയുന്നു. എ.കെ.ആന്റണിയുടെ നേതൃത്വത്തില്‍ യൂത്ത് കോണ്‍ഗ്രസ് സഞ്ജയ് ഗാന്ധിയുടെ നയങ്ങളെ എതിര്‍ത്തു. 

പെട്ടെന്ന് പാര്‍ട്ടിയുടെ തലപ്പത്തേക്ക് ഉയര്‍ത്തപ്പെട്ട സഞ്ജയ് ഗാന്ധി പാര്‍‌ട്ടിക്കു വേണ്ടി എന്തു ത്യാഗമാണ് സഹിച്ചതെന്ന ചോദ്യമാണ് ആന്റണിയും കൂട്ടരും ഉയര്‍ത്തിയിരുന്നതെന്നും രേഖകള്‍ പറയുന്നു. സഞ്ജയ് ഗാന്ധിയുടെ നയങ്ങളെയും ആന്റണി എതിര്‍ത്തിരുന്നു. കേരളത്തിലെ യൂത്ത്‌ കോണ്‍ഗ്രസ്‌ മറ്റു സംസ്ഥാനങ്ങളിലേക്കാള്‍ മൗലികവാദികളായിരുന്നു. അന്ന് കോണ്‍ഗ്രസിനൊപ്പമായിരുന്ന സിപിഐയ്ക്കും സഞ്ജയ് ഗാന്ധിയോട്‌ കടുത്ത വിരോധമുണ്ടായിരുന്നു. എതിര്‍പ്പുകള്‍ മൂലം സഞ്ജയ് ഗാന്ധി കേരള സന്ദര്‍ശനം ഉപേക്ഷിച്ചുവെന്നും വിക്കിലീക്ക് പുറത്തുവിട്ട രേഖകളില്‍ വെളിപ്പെടുത്തുന്നു.