നമ്മുടെ ആദ്യ പാസഞ്ചര് ട്രെയിനിനെ നമ്മളൊക്കെ മറന്നുപോയി... ഗൂഗിളോ!
ഇന്നത്തെ ദിവസത്തിന് ഒരു പ്രത്യേകതയുണ്ട്. എന്തെന്നറിയാമോ? 1853 ഏപ്രില് 16നാണ് ബോംബെയില് താനെയിലേക്ക് ആദ്യ പാസഞ്ചര് ട്രെയിന് സര്വീസ് തുടങ്ങിയത്. 400 അതിഥികളുമായി 31 കിലോമീറ്ററാണ് ട്രെയിന് സര്വീസ് നടത്തിയത്. സിന്ധ്, സുല്ത്താന്, സാഹിബ് എന്നിങ്ങനെ മൂന്ന് ലോക്കമോട്ടീവുമായി താനെയിലെത്തിയ തീവണ്ടിയെ 21 വെടിമുഴക്കിയാണ് സ്വീകരിച്ചത്.
ലോകത്തിലെ ഏറ്റവും തിരക്കേറിയ റെയില്വെ ശൃംഖലയാണ് ഇന്ത്യന് റെയില്വെ. പ്രതിദിനം 20 ദശലക്ഷം പേരാണ് ഇന്ത്യയില് ട്രെയിനില് യാത്ര ചെയ്യുന്നത്. 20ലക്ഷം ടണ് ചരക്കാണ് ഓരോദിവസവും ട്രെയിനിലൂടെ കൊണ്ടുപോകുന്നത്. 14ലക്ഷം പേര്ക്കാണ് ഇന്ത്യന് റെയില്വേ തൊഴില് നല്കിയിരിക്കുന്നത്. ലോകത്ത് ഏറ്റവും കൂടുതല് പേര്ക്കു തൊഴില് നല്കുന്ന പൊതു മേഖലാ സ്ഥാപനവും ഇന്ത്യന് റെയില്വെയാണ്.
ഇന്ത്യയിലെ ലക്ഷണക്കണക്കിന് വരുന്ന ജനങ്ങളുടെ ആശ്രയമായ റെയിര്വേയുടെ ആദ്യ യാത്രയെ ഓര്മ്മിപ്പിച്ച് പ്രമുഖ സെര്ച്ച് എഞ്ചിനായ ഗൂഗിള്. ചൊവ്വാഴ്ച ഗൂഗിളിന്റെ പേജ് സന്ദര്ശിച്ചവര്ക്ക് ഇന്ത്യയിലെ ആദ്യ പാസഞ്ചര് ട്രെയിനിനെ കുറിച്ചുള്ള വിവരങ്ങള് അടങ്ങിയ ഗൂഗിള് ഡൂഡില് കാണാനായി.
1947ല് ഇന്ത്യയ്ക്കു സ്വാതന്ത്ര്യം ലഭിക്കുമ്പോള് 42 റെയില് സംവിധാനങ്ങളാണ് നിലവിലുണ്ടായിരുന്നത്. 1951ല് ഇത് ദേശസാല്ക്കരിച്ച് ഒറ്റ യൂണിറ്റാക്കിയതോടെ ലോകത്തിലെ ഏറ്റവും വലിയ റെയില്വെ ശൃംഖല ഇന്ത്യയുടേതായി മാറുകയായിരുന്നു. ഇതില് ദീര്ഘ ദൂര ട്രെയിനുകളും സബര്ബന് ട്രെയിനുകളും ഉള്പ്പെടും. ഇപ്പോള് ഇന്ത്യന് റെയില്വെ എന്ന സ്ഥാപനത്തിന്റെ ഉടമസ്ഥാവകാശം ഇന്ത്യാ ഗവണ്മെന്റിനാണ്. പൂര്ണ നിയന്ത്രണാവകാശവും ഗവണ്മെന്റിന്റേതാണ്. റെയില്വെ ബോര്ഡിനാണ് ഭരണ ചുമതല.
https://www.facebook.com/Malayalivartha