ഇന്ത്യൻ രാഷ്ട്രീയത്തിൽ പ്രതിമയ്ക്ക് വലിയ പങ്കാണ് ഉള്ളത്. ഭാരതത്തിന്റെ ആദ്യ പ്രധാനമന്ത്രി ജവഹർലാൽ നെഹ്രുവിന്റെ പ്രതിമ നീക്കം ചെയ്തത് വിവാദമായിരിക്കുകയാണ്. 2019 ൽ നടക്കാൻ പോകുന്ന കുംഭമേളക്കായാണ് ആദ്യ പ്രധാനമന്ത്രിയുടെ പ്രതിമ നീക്കം ചെയ്തത്

അലബഹാദിലെ ബൽസാനിലാണ് നെഹ്റുവിന്റെ പ്രതിമ നീക്കം ചെയ്തത്. അടുത്ത വർഷം നടക്കാനിരിക്കുന്ന കുംഭമേളയോടനുബന്ധിച്ച് നഗരം സൗന്ദര്യവത്കരിക്കുന്നതിന്റെ ഭാഗമായാണ് പ്രതിമ നീക്കം ചെയ്തതെന്ന് അധികൃതർ അറിയിച്ചു. പ്രതിമ റോഡിന്റെ മധ്യത്തിലായിരുന്നുവെന്നും അടുത്തുള്ള പാർക്കിലേക്ക് മാറ്റി സ്ഥാപിക്കുമെന്നും അധികൃതർ അറിയിച്ചു.

അതേ സമയം നെഹ്റുവിന്റെ പ്രതിമ നിന്നിരുന്ന അതേ റോഡിൽ തന്നെയുള്ള ആർ എസ്എസ് ആചാര്യൻ ദീൻ ദയാൽ ഉപാധ്യായയുടെ പ്രതിമ നീക്കം ചെയ്തിട്ടില്ല എന്ന കാര്യവും വിവാദത്തിന് ആക്കം കൂട്ടി. അതേസമയം രാജ്യത്തിന്റെ മുൻ പ്രധാനമന്ത്രിയെ അപമാനിക്കുന്ന നടപടിയാണിതെന്ന് കോൺഗ്രസ് ആരോപിച്ചു. നടപടിക്കെതിരെ കോൺഗ്രസും സമാജ് വാദി പാർട്ടി പ്രവർത്തകരും പ്രതിഷേധ പ്രകടനം സംഘടിപ്പിച്ചു.